Read Achang ZEKHARIA 10 Bible Online

ZEKHARIA 10 - Achang bible

ZEKHARIA 10

¹Zvn wvng zoh lyis mauwus das xiklyis YHENSAIN lhyi dung geh. Mau bos dah jyommauh yah mauwus nhang lha mau mas yuk khanghmuh xiklyis nyaus los nhang soeu ka YHENSAIN nghuot.

²Dius jens gas phvra, botthyet bang yah nyei gyo goh, nghuot laus eq nyamoq yoh dah phuk dang gas vjyuk ma bos hwah cho dvnghuot. Dvyhamh gas yhetmoq pho, nghuot laus eq ma jus yvpheh dvshwih loh. Nyamoq dyei dah nhaiqtaink cho ka vkyuh ma bos. Housoeh las dius jens gas dyuk loh yvng teh chowhang whang loh. Nyamoq gas uhshe soeu ma yoh yvmvyah yau cho bos.

³YHENSAIN taiq, Ngah dius jens lyis guon dah lvbaus lyis ngos nhaiqyo las ngos nyamoq lyis joeng das. Yuda dius jens gas ngah zis nghuot las, ngos Maukhung Jesphung YHENSAIN nyamoq lyis loqzamh zwi das. Nyamoq gas ngah dah yomsoq bos jesnyang jens nghuot.

⁴Nyamoq masyah guon bang, choshe bang, ngah dius jens lyis guon das vmingh bos bang tsain thuq los das.

⁵Yuda dius jens gas jeslo jens, nyamoq dah jeswus jens lyis wus talhoeu thomhbop mas nang nheh tyamp teh ung das. YHENSAIN ka nyamoq yah dvgeh nghuot yvmvyah nyamoq gas jeswus nyang ji bang lyis yangh zan ung das.

⁶Ngos gas Yuda dius jens lyis yombos nhang das. Israel dius jens lyis khyuot das. Ngos nyamoq lyis nhaiqnyen cho bos las nyamoq dvnganh lyis yhen mha shwih tauh los das. Nyamoq gas ngos nyamoq lyis khanhamp eq ma peq tyamp teh nghuot das. Ngos YHENSAIN, nyamoq dah Mangso nghuot; ngos nyamoq shvmanh dung lyis toeuh dyei das.

⁷Israel dius jens gas jeslo jens teh yombos das, zvbiq shuk goeus bang pyo teh pyo das. Nyamoq vnyau vshih jens gas haih ung cho lhyi soh las YHENSAIN kuot dyei goeus yvmvyah tsain gaus das.

⁸Ngos ngah dius jens lyis khi lha dvgeh tsainh toh das. Ngos nyamoq lyis khyuot las xikpheh teh nyoshoq jebais los nhang das.

⁹Ngos nyamoq lyis dius nyau jens mas sanh kat goeus laus eq, nyamoq gas we dah joqyos masyah ngos lyis soh shih das. Nyamoq eq nyamoq lo jens eq doeng nyeis das las, nyamoq dvgeh yhen mha tauh los das.

¹⁰Ngos nyamoq lyis Egutu yahge Asiria masyah yhen mha shwih los las, nyamoq nyang mau mas nyeis nhang das. Nyamoq lyis Gilead yahge Lebanon mas eq nyeis nhang lha mau gonh mas dius jens yah dyingh das.

¹¹Nyamoq gas nyamoq dah yau cho thomh goeu lai lyis, ngos YHENSAIN changhphauq lyis lyuk las nauh dah Nile lvng kyuk tyamp das. Khwank dah Asiria gas nyhen mha gyoh tyamp las yombos dah Egutu gas nyah yomsoq chithyuk das.

¹²Ngos ngah dius jens lyis yombos nhang lha, nyamoq gas ngos lyis paiq las domsyos gyo das ge, YHENSAIN taiq goeus.