Read Achang ZEKHARIA 11 Bible Online

ZEKHARIA 11 - Achang bible

ZEKHARIA 11

¹Lebanon eh, nah Arit saiq lyis nyi yoh ngeh tyamp das zis, nah khomh tsain phank aq.

²Shvxoeuh zains jens eh, kuk ngaus geh! Arit zains tsain lains goeus, hau phunk bos saiqzains tsain monh tyamp goeus. Bashan wons zains jens eh, kuk ngaus geh, thoeu dah yoszanh khyam thoeuq tyamp zis xauh goeus!

³Guon bang gas nyamoq dah phunk dyuk loh las kuk zis yah tsain ngaus. Khangkhyi nyings thwe lhyi gyo geh, Yodan lvng yvm chank yah nyamoq dah yhen saiqkhyam dyoq tyamp goeus.[11]

⁴YHENSAIN, ngah Mangso ngos lyis taiq, Nvng gas sat das xiklyis toeuq toh yvng phung lhyi yoeuh soeu teh kuot aq.

⁵Yvng sain jens gas hau yvng lyis tsain sat laus eq yobos ma xauh. Nyamoq hauh shoh ungh zo las, ngamoq dis los, YHENSAIN ngelhoq bas jungh, tsain ge. Nyamoq nyang dah yvng yoeuh bang yangh yvng jens lyis nhaiq ma nyen.

⁶YHENSAIN taiq, Ngos nyeisjvng thoq mas hank lyis eq nhaiq ma nyen lo das. Dius jens dvnganh lyis nyamoq dah yomsoq bos dah guon bang loq mas ngos nyang kyauh tyamp das. Hau guon bang gas nyeisjvng lyis thyoqpi tyamp das las ngos nyamoq lyis nyamoq yomsoq masyah ma khyuot yoeus das, ge.[12]

⁷Hau yvng ungh bang wis bang gas ngos lyis nghoh las, ngos gas sat das zis sont toh dah yvng jens lyis yoeuh soeu bweh los. Ngos lhamloq aiq koeuq yoeus las dvkoeuq lyis "Jyehjuh kuot cho" gohtoeu dvkoeuq lyis "Xonh Cho" oen nyhink las ngos yvng phung lhyi loqzamh zwi.

⁸Ngos gas ngos lyis hoeng dah gohtoeu yvng yoeuh somh yuk lyis ma yoh jhen lo las lhamhmuh dvkhyvp kyingh lyis dvnganh thyuk tyamp.

⁹Hauh thang lhyi ngos hau yvng phung lhyi taiq zis gas, Ngos namoq lyis yoeuh dah yvng yoeuh soeu ma nghuot lo das. Shei das bang gas shei goeus jungh, mhont zis xauh das bang eq mhont zis xauh goeus jungh. Nyet bang gas dvyuk yah dvyuk mhont goh das.

¹⁰Hauh thang lhyi ngos gas dius nyau jens dvnganh yah YHENSAIN kuot toh dah thanghchvp lyis thyoq tyamp khyvlyis "Jyehjuh kuot cho"ge dah lhamloq lyis yoeus las khyauh tyamp.

¹¹Housoeh las hau thanghchvp gas hauh nyeih lyis thyoq tyamp zis xauh goeus. Yvng ungh bang, wis bang gas ngos lyis zungh yoeuh nyeis las nyamoq gas ngos kuot cho yah YHENSAIN taiq nyeis yvlyis tsain seq loh.

¹²Ngos nyamoq lyis taiq, Namoq mes lyis gas ngah uhkung phauh dyei geh. Ma mes lyis gas nghuot goeus jungh, oen. Housoeh las nyamoq ngos lyis ngah uhkung phauh khyvlyis ngwis kyvp somhci khaih.

¹³YHENSAIN ngos lyis taiq, Hauh zis Yhenmuh ziskwi mha kat toh aq, ge. Housoeh las ngos mon ge nyamoq nghamh dah phauh zainsmuh ngwis kyvp somhci lhyi yoeus las Yhenmuh ziskwi mha kat toh.[13]

¹⁴Hauh thang lhyi ngos "Xonh Cho" ge dah lhamloq aiq vkoeuq lyis yoeus las khyauh tyamp. Hauh uhlyis Yuda yahge Israel dah xonh cho ka dvyos dvsanh mus loh.

¹⁵Tsai YHENSAIN ngos lyis taiq, Yvng yoeuh soeu teh dvlhain doms kuot aq, haq lhain ka ma lyungs soeu nghuot.

¹⁶Ngos ngah yvng phung lhyi yoeuh das xiklyis yvng yoeuh soeu dvyuk toh goeus, nghuot laus eq nyang dyoqbis cho yah kyuk tant zis xauh dah yvng lyis ma pangh. Dyuk loh yvng lyis ma xo. Nos bang lyis ma lhoq gis, yanghzan bang lyis ma tsoh. Hauh gungsthaiq nyang coeu thank yvng shoh zo las, nyamoq dah khyeikhu lhyi khyuot tyamp.

¹⁷Hau ma lyungs yvng yoeuh soeu ka mvtanhzoe nghuot. Nyang gas nyah yvng phung lhyi tyamp toh. Moengzan zis gas nyah yomsoq lyis shank shoq mhont das. Nyah loqyom nyhauh las nyah loqyos nyoq jet das, ge.