Read Achang ZEKHARIA 14 Bible Online

ZEKHARIA 14 - Achang bible

ZEKHARIA 14

¹YHENSAIN soetuon yvmas tsung das buisnyeis ni goeus. Hauh thang lhyi Yerusalem gas thyoq zis xauh das las, hau lvnyhvp gas namoq xikkhonh mas tsain gvm yoeus das.

²YHENSAIN ka Yerusalem lyis jeszan das xiklyis dius nyau jens dvnganh lyis dvgeh shwih tsainh toh das. Hauh wus gas yoeus loh zis xauh das, yhen jens gas lvnyhvp duot das, vmesbih jens gas zaiq zis xauh das. Wus mas bang dvgohyih jonsdoeus loh laus eq, nyet bang lyis gas hauh wus masyah ma shwih loh das.

³Hauh thang lyis YHENSAIN ka, hauh dius nyau jens lyis xik pheh zan ku teh thuq las zan das.

⁴Hauh shishenh lyis nyang gas Yerusalem dah buisthuq shot pheh dah Tsanlun boms thoq mas yap das, Housoeh Tsanlun boms gas buisthuq shot pheh yah buiswvng shot pheh jweh shoq, aiq khyamh gwi las langhkhau zainsmuh bweh das. Hauh boms dah dvgohyih gas mautsung pheh, dvgohyih gas mautyi pheh ywi loh das.

⁵Namoq gas hau boms aiq chink gwi dah langhkhau chank yah tsain phang luiq das. Yuda hwankti Uzia zaih lyis maunyeis dwis gvng mas, namoq dah phauh thyeih moq phang teh tsain phang das.YHENSAINngah Mangso ka nyang yah dvgeh loeuswons bang dvnganh shwih las jweh los das.[16]

⁶Hauh shishenh jweh lyis, ma ngamh lo, nghan ma bos lo das,[17]

⁷chuot zis ma bos lo. Nyenh lyis yangh vjangh buis bvng joq das. Heisoeh khanhamp bweh das zis gas YHENSAIN kyingh dvseq.

⁸Hauh nyeih jweh lyis Yerusalem masyah jeiscingh yaus thuq das; dvgohyih gas Coh thomh pheh, gohtoeu dvgohyih gas Mediteranean Thomh pheh yaus loh das. Houka cungh cungh zvn zvn dvzvn gonh yaus das.

⁹Hauh uhlyis YHENSAIN ka nyeisjvng gonh dah hwankti duot das. Yuk khanghmuh nyang lyis Mangso khyvlyis paiq das las, nyang lyis hau dvnyings yah seq das.

¹⁰Mautsung pheh Geba wus masyah mautyi shot pheh Rimon wus jweh shoq dvjanggyon gonh dvm shoq kuot das. Yerusalem wus gas vyvm vwi wus jens thoq lyis nyhang mau joq das. Hauh wus gas Benyamin khyam khomh masyah gohlhain dah khyam khomh joq khoq dah joqyos wus Vthunk khyam khomh jweh shoq, Hananel Tyoeuqzvm masyah hwankti zvbiq nyhetzwvng jweh shoq duons das.

¹¹Dius jens gas houmha jesluiq shohluiq nyeis das, dyoqbis cho yah ma kyuk ma tant lo das.

¹²Yerusalem lyis jes kuot dah dius nyau dvnganh thoq mas YHENSAIN ka gyukphoh noslom she los das. Nyamoq kang dwis nyeis shih lyis nyamoq shoh bop loh das, nyamoq nyoqjeih yahge nyamoq lhyo bop tyamp das.

¹³Hauh shishenh lyis YHENSAIN ka nyamoq lyis khamkhvv cho gyuk dvn cho kuot dyei las, yuk khanghmuh vsainnyang vyvm mas soeu lhyi nyhik las zan goh das.

¹⁴Yuda dius jens gas Yerusalem lyis gos las jeszan das. Dius nyau jens dvnganh dah zisyos ge, ngwis xing, dyimis vbomsdom lvnyhvp khyvlyis yoeus das.

¹⁵Jeswus dah thoenggus mas dah gaunyhauq dvnganh, nyang jens, luzoe jens, gola-u, mauhlyihzoe jens thoq mas eq gyukphoh noslom gyoh das.

¹⁶Hauh thang lhyi Yerusalem lyis zan dah dius nyau jens mas doeng nyeis bang dvnganh gas dvzvn dvzvn, houmha Maukhung Jesphung YHENSAIN lhyi hwankti khyvlyis paiq das xiklyis eq, Phunk pwe kuot das xiklyis eq loh das.

¹⁷Maukhung Jesphung YHENSAIN lhyi hwankti khyvlyis loh paiq das zis dius dvnyau nyau ngoek lyis, nyamoq dah mau thoq mas mau ma wus das.

¹⁸Egutu jens Phunk pwe kuot das zis ngoek lyis, nyamoq gas housoeh loh das zis ngoek dah dius nyau khanghmuh lyis YHENSAIN dyei das dah hau dvyhangteh dah noslom xauh das.

¹⁹Heika Phunk pwe ma kuot dah Egutu yahge gohtoeu dius nyau jens dvnganh thoq mas gyoh das dah joeng cho nghuot das.

²⁰Hauh shishenh lyis nyang lyis shauq dah nyangjyoeu mha "YHENSAIN lhyi kyauh toh" ge dah dang lhaih tap toh das. Yhenmuh mas dah auh jens gas, phon xik mas dah khuq jens teh gyingshang das.

²¹Yerusalem wus yahge Yuda mau gonh mas joq dah auh dvnganh gyingshang lha Maukhung Jesphung YHENSAIN lhyi paiq cho mha yhung das xiklyis gohtoeu tsain toh das. Lomhxangh dyei soeu ka lomhxangh shoh jyauq das xiklyis hauh zis tsain yhung das. Hauh shishenh jweh lyis, Maukhung Jesphung YHENSAIN dah Yhenmuh mas soenghi hank eq ma kuot lo das.