Read Achang ZEKHARIA 3 Bible Online

ZEKHARIA 3 - Achang bible

ZEKHARIA 3

¹Gohtoeu nyoqnyvng mas YHENSAIN ka ngos lyis Phudyei Zainsmuh Yoshua gas YHENSAIN dah loeuswons soeu xikkhonh mas yap joq zis chixoeuq. Houmha Yoshua dah vyvm mas Satan ka nyang lyis kauq das xiklyis cicont yap joq.

²YHENSAIN Satan lyis taiq zis gas, Satan eh, YHENSAIN nvng lyis dang thang thyet bas jungh. Yerusalem lyis jyet dah YHENSAIN ka nvng lyis dang thang thyet bas jungh. Haih soeu ka nyi masyah she thuq kat dah lhamloq teh nghuot, ge.

³Yoshua gas houmha ma lhoq dah dyimis wuot las yap joq.

⁴Loeuswons soeu ka maukhung mha dah nyah jyeidwis jens lyis, Haih dius yuk wuot toh, ma lhoq dah dyimis yoeus tyamp dyei geh, ge. Hauh thang lhyi nyang Yoshua lyis, Ngos nah yaunos yoeus tyamp dyei goeus las nvng wuot das zis dyisaiq dyei das, ge.

⁵Nyang gas Yoshua dah uhloms mas lhoq dah uhthop thop dyei geh, ge hauh jyeidwis jens lyis taiq toh.[2] Housoeh nyamoq kuot goeus, hauh thang lhyi YHENSAIN dah loeuswons soeu houmha yap joq uhlyis nyamoq gas Yoshua lyis dyisaiq gvm huot.

⁶Hauh thang lhyi hau loeuswons soeu Yoshua lyis taiq zis gas,

⁷Maukhung Jesphung YHENSAIN taiq goeus. Nvng ngah lyi lyis domsyos gyo las ngos nvng lyis toeuq dyei toh dah yvwons chank kuot lyis gas, nvng ngah Yhenmuh yahge nyah khyam mha tsoq yoeuh das las ngah xikkhonh mas nyeis dah loeuswons bang dung dang gyo dyei teh, ngos nvng dung dang lyis gyo dyei das.

⁸Nvng Phudyei Zainsmuh Yoshua eh, gyo aq, nyah phudyei changh jens eh, gyo geh, Namoq gas thang pheh xiklyis gis dah vlho duot bang nghuot. Ngos ngah jyeidwis Vko ge soeu lhyi chixoeuq das.

⁹Ngos Yoshua xikkhonh mas nyoqnho nyhet shot bos dah luk dvlom toh. Hauh yvmas ngos loeus thwang tap toh das. Ngos dvnyeih dvm lyis haih mau mas dah yaunos yoeus tyamp das, ge.

¹⁰Hauh nyeih jweh lyis namoq hank eq hank nyang dah zvbiq nwis yahge maiphang zains yah lhaink toh yvmas nyenstap gausyis jesluiq shohluiq los nyeis das xiklyis yhenkyoh lyis yus das, ge.