Read Achang ZEKHARIA 5 Bible Online

ZEKHARIA 5 - Achang bible

ZEKHARIA 5

¹Ngos doms yoeuh, haq lhain ka lyeis mas sauhdain dvkoeuq dang yenh zis lyis nyvng.

²Loeuswons soeu ka, ngos cha nyvng zis nyei. Ngos phuk taiq zis gas, Lyeis mas sauhdain dvkoeuq dang yenh; hauh zis gas xing choeu 30 pe, lywas choeu 15 pe nghuot, oen.

³Hauh thang lhyi nyang ngos lyis taiq, Haih zis gas dvmau gonh mas loh das xiklyis nhoengh cho lhaih toh. Sauhdain dvkhyamh pheh, Khauh soeu khanghmuh hauh mau masyah shang tyamp zis xauh das, ge. Gohtoeu dvkhyamh mas gas, kyamp tang las hwah soeu khanghmuh eq shang tyamp zis xauh das, ge toh.

⁴Maukhung Jesphung YHENSAIN taiq zis gas nyang hai nhoengh zis nhang kat las houka khauh soeu khanghmuh yhen, kyamptang lha hwah soeu khanghmuh dah yhen mha nhang kat las hauh zis nyamoq yhen mha wvng loh das. Houka nyamoq yhen mha joq joq las houmha thyoq khyoq toh khoq.

⁵Hauh loeuswons soeu doms thuq los las taiq, yoeuh aq dvja los nyeis, ge.

⁶Ngos gas, Haih zis cha nghuot, oen nyei. Nyang toeuh zis gas, Houka kyunk nghuot, hauh zis dvmau gonh dah yaunos[4] xiklyis nghuot, ge.

⁷Hauh kyunk mas cui yah kuot dah vnghop bos. Ngos zungh yoeuh nyeis lyis, hauh vnghop phank los las hauh vkhau mha vmesbih dvyuk tsung toh!

⁸Hauh loeuswons soeu taiq, Heika lhung cho lhyi chixoeuq zis nghuot, ge. Hauh thang lhyi nyang hauh vmesbih lyis kyunk khau mha duon kat las vnghop doms nghop toh.

⁹Ngos nghank yoeuh lyis nghoq kywank dah dungs teh mvn bos dah dungs tsain dap dah vmesbih aiq yuk ngah jyank pheh dang los yvlyis nyvng. Nyah aiq yuk gas hauh kyunk lyis lyih dvng las dang loh dyuk.

¹⁰Ngos hau loeuswons soeu lhyi, Nyamoq hauh zis khalhye dvng loh, oen nyei.

¹¹Nyang phuk taiq zis gas, Nyah aiq yuk hauh yvlyis yhenmuh kuot dyei das zis Babilon pheh dvng loh. Hau yhenmuh dye tsuk lyis nyah aiq yuk hau kyunk lyis paiq das zis houmha toh das, ge.