Read Achang ZEKHARIA 6 Bible Online

ZEKHARIA 6 - Achang bible

ZEKHARIA 6

¹Ngos nyoqnyvng gohtoeu dvkoeuq yoh. Haq lhain ka thunk boms aiq koeuq dah jo masyah jeslhyingh nyei koeuq thuq los yvlyis nyvng.

²Cangxeih vlhyingh lyis nyang nes jens yah she, aiq vlhyingh lyis nyang noq jens yah she.

³Somh vlhyingh lyis nyang thyoeu jens she, nyei vlhyingh lyis nyang kywank tsain she.

⁴Hauh thang lhyi ngos gas loeuswons soeu lhyi, Svra eh, haih jeslhyingh vjyuk gas cha nghuot, oen nyei.

⁵Nyang phuk taiq zis gas, Haih zis gas nyei lyeis nghuot. Nyamoq gas nyeisjvng gonh dah Yhensain xikkhonh masyah thuq los.

⁶Nyang noq she dah jeslhyingh gas mautsung shot, Babilon pheh loh. Nyang thyoeu jens gas buiswvng shot pheh loh, nyang kywank jens gas mautyi shot dah mau pheh loh.

⁷Yombos nyang kywank jens gas, nyeisjvng thoq lyis yoeuh das zis gyen gyen tsain thuq los. Loeuswons soeu taiq, nyeisjvng thoq mas loh las yoeuh geh, ge lyis nyamoq kuot.

⁸Hauh thang lhyi loeuswons soeu ngos lyis lui los. Mautsung shot, Babilon pheh loh dah nyang jens gas, YHENSAIN dah nhaiqyo bi nhang goeus, ge.

⁹YHENSAIN ngos lyis haih loeus dyei.

¹⁰Nyang taiq, Jonsdoeus bang Heldai, Tobiya, Yedaia moq dyei dah jyungshuk yoeus las, Zephania lo Yosia yhen mha lvnyap loh geh. Nyamoq dvnganh gas Babilon mas jonsdoeus masyah tauh los goeus bang nghuot.

¹¹Nyamoq dyei dah ngwis xing mhayah buismuk[5] dvkoeuq kuot lho lha Yehozadak lo, Phudyei Zainsmuh Yoshua uhloms mas tsungh dyei geh.

¹²Nyang lyis Maukhung Jesphung YHENSAIN taiq zis taiq kyoh geh. Vko ge lui soeu nyang nyeis yvmas lho lho nghuot das las YHENSAIN dah yhenmuh lyis soq tsuk das.

¹³Nyang gas haih yvlyis tsuk das soeu nghuot, hwankti yah mon-yih dah nyoqnho ngelang xauh kham yoeus das soeu nghuot, lho lha nyang nyah dius jens lyis guon das. Nyah hwankti tank yvm mas, phudyei soeu dvyuk yap das las nyamoq dvgeh nyenstap zis yah shop shop kuot das.

¹⁴Hauh buismuk gas YHENSAIN dah Yhenmuh mas Heldai,[6] Tobiya, Yedaia yahge Yosia[7] moq lyis nyoqnho ngelang dyei dah nyoqnyhank duot das.

¹⁵We mas nyeis bang YHENSAIN dah Yhenmuh doms tsuk yvmas los bos pangh das. Hauh zis doms tsuk toh lyis Maukhung Jesphung YHENSAIN ngos lyis namoq jyank mas nhang zis namoq seq das. Namoq gas YHENSAIN, namoq dah Mangso tyingtoh zis domsyos vlhomuh gyo lyis gas haih cho bweh los das, ge.