Read Achang ZEKHARIA 8 Bible Online

ZEKHARIA 8 - Achang bible

ZEKHARIA 8

¹Maukhung Jesphung YHENSAIN haih loeus Zekharia lyis dyei.

²Ngos Yerusalem lyis pangh das zis soh nyeis, khasoeh ge lyis ngos nyah dius jens lyis svsoh jyet, hau jyet cho ka ngos lyis nyah jeswus jens lyis nhaiqyo nhang.

³Ngos ngah gyingshang wus, Yerusalem mas tauh los las, houmha nyeis das. Hauh wus gas lomluk dah wus ge seq las, Maukhung Jesphung YHENSAIN dah jing lyis eq gyingshang jing ge lui das, ge.

⁴Mang goeus dah vbusbih jens vmesbih jens dvlhain doms nyeis das. Nyamoq gas mang las suh lyis lhamloq yhung, nyamoq wus vgungs noyos mas tsung toh das.

⁵Wus talhoeu ka lhoeu nyeis dah nyelo yukgis lo jens yah doms dyingh das.

⁶Gvshih nyet joq dah dius nyau xiklyis haih zis ma gis bweh teh nghuot das. Nghuot laus eq ngah xiklyis gas ma gis bweh ge zis ma bos.

⁷Ngos ngah dius jens lyis nyamoq lyis shwih loh dah mau jens masyah khyuot das.

⁸Nyamoq gas Yerusalem mas nyeis das zis buisthuq buiswvng pheh yah shwih tauh los das. Nyamoq gas ngah dius jens duot das las, ngos gas nyamoq Mangso duot las nyamoq thoq mas lyi jus jus wontang guon das.

⁹Womh ehnyet bos aq, ngah Yhenmuh doms tsuk das zis yhen pom xi dah shishenh lyis lvpe jens taiq dah dang yah dvyhangteh dah dang nvng gvshih xauhgyo.

¹⁰Hauh shishenh ma jweh shih yoq lyis hank eq dius lyis eq gaunyhauq lyis eq ma thyeh nghoh yhung, hank eq jeswus masyah ma luiq. Ngos dius jens dvyuk yah dvyuk lyis tyixo goh nhang.

¹¹Nghuot laus eq gvshih gas ngos hai doeng los dah vnyau lyis shaih las dvkuot lo.

¹²Nyamoq gas nyamoq jyo lhyi nyenstap zis yah khyoq das. Nyamoq dah zvbiq nwis vshih shih das. Mau nyoshoq wus das las, nyeisjvng gas jyo thuq los nhang das. Doeng nyeis, ngah dius nyau dah dius jens lyis hai shvmanh tsain dyei das.

¹³Yuda yahge Israel dius jens eh, xikpheh lvbaus jens dvyuk yah dvyuk nhoengh goh lyis, Yuda yahge Israel mas gyoh dah dyoqbis zainsmuh yah dvyhangteh gyoh bas jungh ge sang. Nghuot laus eq ngos namoq lyis khyuot das, hauh thang lhyi hau lvbaus jens gas dvyuk yah dvyuk, namoq Yuda yahge Israel mas jweh los dah shvmanh yah dvyhangteh xauh yoeus bas jungh ge sang das. Housoeh las womh ehnyet bos geh, vgyuk goh, ge.

¹⁴Maukhung Jesphung YHENSAIN taiq. Namoq dah Phauh thyeih moq ngos lyis nhaiqyo nhang lhyi, ngos nyamoq xiklyis dyoqbis zainsmuh toeuq las ngos ngah ehnyet ma thaiq, ngos toeuq zis kuot.

¹⁵Nghuot laus eq gvshih ngos Yerusalem bang yahge Yuda jens lyis shvmanh das zis toeuq nyeis. Housoeh las vchiq goh.

¹⁶Heika namoq kuot chah zis nghuot. Namoq dvyuk yah dvyuk dang jyoeng taiq goh geh. Nyenstap cho she los das xiklyis soetuon jang mas lyi jus khyvlyis tuon geh.

¹⁷Namoq dvyuk yah dvyuk nos nhang cho vtoeuq goh. Kyamptang lha ma jus dah kanghjyoeng vkat. Ngos gas hwah cho, lyi ma jus cho yahge lhuotzo cho lhyi hoeng.

¹⁸Maukhung Jesphung YHENSAIN ka haih loeus Zekharia lyis dyei.

¹⁹Lhamhmuh nyei vkhyvp, oeng vkhyvp, nyhet vkhyvp, dvci vkhyvp lyis kuot dah womkyi zis gas Yuda dius jens xiklyis zvn yau gausyis pyo ngon pwe bweh das. Nvng gas jyoeng cho yahge nyenstap cho lhyi jyet chah.

²⁰Maukhung Jesphung YHENSAIN taiq, Wus jens nyoshoq[9] mas dah dius jens Yerusalem pheh los das shishenh jweh los.

²¹Dvwus mas bang gas gohtoeu dvwus mas bang lyis taiq das zis gas, Ngamoq gas Maukhung Jesphung YHENSAIN lhyi loh paiq zis yah nyah shvmanh dung yoeus das, ngamoq yah loh goh.

²²Dius jens nyoshoq yahge yomsoq bos dah dius nyau jens gas Maukhung Jesphung YHENSAIN lhyi paiq zis yah nyah shvmanh dung yoeus das xiklyis Yerusalem mas tsain jweh los das.

²³Hauh buisnyeis lyis lvbaus dvci yuk gas Yuda dvyuk jyank mas los las taiq das zis gas, Mangso ka namoq yah dvgeh nghuot zis ngamoq xauhgyo goeus yvmvyah, ngamoq namoq yah dvgeh bos loh mes, ge.