Read Achang MALAKHI 3 Bible Online

MALAKHI 3 - Achang bible

MALAKHI 3

¹Maukhung Jesphung YHENSAIN phuk taiq zis gas, Ngah xiklyis cho sont das zis ngos ngah loeuskyoh soeu lhyi nhang kat das. Hauh thang lhyi namoq xo nyeis dah YHENSAIN ka nyah Yhenmuh mas nyetlos nyettant los das; namoq yoeuh mes nyeis dah loeuskyoh soeu ka los las ngah thanghchvp taiq hoeuh das.

²Nghuot laus eq nyang jweh das buisnyeis lyis hank yoh kham das lah? Nyang thuq los lyis hank yoh doeng das lah? Nyang gas kank bos sapya teh, xing shauq soeu dah nyi teh nghuot.

³Nyang gas ngwis lyis shauq las cheihshang soeu teh, soe los tuon das. Ngwis xing muh kuot soeu ka ngwis xing lhyi shauq teh YHENSAIN dah loeuskyoh soeu ka phudyei bang lyis cheihshang das. Housoeh lyis nyamoq gas YHENSAIN jyank mas jus dah jyungshuk ja chi los das.

⁴Hauh thang lhyi Yuda yahge Yerusalem dius jens YHENSAIN jyank mas chi los dah jyungshuk gas xikpheh nyamoq kuot khoq teh nyang lyis nhaiqdoeus nhang das.

⁵Maukhung Jesphung YHENSAIN taiq, Namoq lyis soetuon das xiklyis ngos namoq jyank mas thuq los das las, hweq kat bang, nyi lvng shuot bang, ma ying kanghjyoeng kat bang, uhkung phauh ma dyei mhuih bang, chauhmuh, chauhlo, lvbaus lyis zaiq bang, yahge ngos lyis ma phauh ma nyang kuot bang dvnganh lyis tyi lha lvnyap kyink das.

⁶Ngos YHENSAIN nghuot, ngos ma thaiq loh. Housoeh las namoq Yakop dah vnyau vshih jens gas shank shoq ma dyuk tyamp shih.

⁷Namoq gas namoq xik mas dah namoq phauh thyeih moq teh, ngah lyi lyis nungs phuk loh las hauh yvlyis ma chank kuot lo. Ngah jyank tauh los geh, ngos eq namoq jyank pheh, tauh los das. Nghuot laus eq namoq gas, Tauh los das zis ngamoq khasoeh kuot das lah, ge tsain nyei.

⁸Ngos namoq lyis nyei bah, Dius dvyuk gas Mangso lhyi mhuih zis gas jus lhyeh? Housoeh ma gis kuot, nghuot laus eq namoq gas ngos lyis mhuih nyeis. Namoq gas, Khasoeh mhuih ge, tsain nyei. Houka ciboms dvboms yahge jyungshuk cho nghuot.

⁹Dvnyau gonh ngos lyis mhuih nyeis yvmvyah namoq dvnganhmoq nhoengh zis tsain xauh.

¹⁰Ngah Yhenmuh mas zonoms nyoshoq joq das xiklyis houmha ciboms dvboms dyingh shoq chi los geh. Ngos lyis shi yoeuh geh. Hauh uhlyis ngos gas maukhung khomhbaiq phank las gis cho vja ja nyoshoq huot khyoq dyei yvlyis namoq nyvng das.

¹¹Ngos gas nah jyo lhyi tungde yah ma mhont nhang, nah zvbiq nwis lyis eq zvbiq shih nyoshoq shih nhang das.

¹²Hauh uhlyis namoq dah mau gas nyeis gis phoh dah joqyos nghuot das yvmvyah dius nyau dvnganh gas namoq lyis ngelhoq bang ge lui das.

¹³YHENSAIN taiq, Namoq ngah cho gyukphoh zis tsain taiq goeus. Nghuot laus eq namoq gas, Ngamoq nah cho cha taiq goeus? ge tsain nyei.

¹⁴Namoq taiq zis gas, Mangso lhyi phuqsoe zis gas vkyuh ma bos. Nyang taiq zis chank kuot zis eq, ngamoq kuot goeus zis lyis ohyom cho Maukhung Jesphung YHENSAIN lhyi tungh chixoeuq zis eq chah vkyuh bos, ge.

¹⁵Ngamoq nyvng zis yah dvyhangteh, khwank bang gas ngelhoq bang nghuot. Ma gis zis kuot bang gas nyeisgis nyeis. Hauh thoq lyis nyamoq Mangso lhyi ma gis zis kuot zoh lyis nyang jhen cho lhyi shi yoeuh laus eq yoh luiq, tsain ge.

¹⁶Hauh thang lhyi YHENSAIN lhyi gyukwoms bang nyamoq nyang changh tsain taiq goh zis lyis YHENSAIN gyo nyeis las nyamoq cha taiq zis xauhgyo. YHENSAIN lhyi gyukwoms las nyang lyis phauh nyang bang lyis comh cho nyah xikkhonh, maussauh buk mas lhaih toh.

¹⁷Maukhung Jesphung YHENSAIN taiq, Nyamoq ngah dius nghuot das. Ngos hauh muh bweh nhang buisnyeis lyis nyamoq gas ngvnyang dius tsain nghuot das. Nyhiphoq gas nyamoq lyis phuqsoe dah lo jens lyis nhaiqnyen teh ngos nyamoq lyis nhaiqnyen das.

¹⁸Tsai ngah dius jens gas dan bang yahge lhung bang jo mas bweh cho khasoeh shaih zis yahge ngos lyis phuqsoe soeu yahge ma phuqsoe soeu khasoeh shaih cho lhyi nyvng das, ge.