Read Achang MATHE 11 Bible Online

MATHE 11 - Achang bible

MATHE 11

¹Yesu gas nyah changlo dvci aiq yuk lyis dyens dye mhoq kat las, nyamoq dah wus mas jyauh das zis yahge taiq hoeuh das xiklyis, nyang eq hou mhayah thuq loh.

²Khristu kuot dah muhzoh lyis Yohan thung mhayah xauhgyo lyis, nyang nyah changlo jens lyis nhang lha taiq zis gas,

³Nvng gas hau jweh los das soeu nghuot lah? Nghuot ya ngamoq gohtoeu lhyi nghamhloms shih das lah, ge.

⁴Yesu nyamoq lyis phuk taiq zis gas, Namoq nyvng las xauhgyo zis Yohan lyis loh taiq kyoh geh.

⁵Nyoqjet bang nyoq nyvng los; khyei gyau bang yoh suh loh; mvnggvng dap bang eq thyauh lhyang loh; nojet bang no gyo los; shei goeus bang eq doms dwis los nhang zis xauh las, nyungs bang lyis gausyis dang taiq kyoh nyeis.

⁶Ngos mas ehnyet zis ma bos soeu hank laus eq ngelhoq, ge.

⁷Nyamoq loh khoq thang lhyi Yesu gas, Yohan cho dius phung lhyi taiq zis gas, Namoq mhanhdyvp pheh cha loh yoeuh goh? Lyeis muot kamh dah jvmbu lyis lhyeh?

⁸Housoeh lyis cha loh thuq yoeuh goh? Lungphauq dyi wuot soeu lhyi lah? Yoeuh aq, nhamp dah dyimis wuot bang gas hwankti yhen mha nyeis.

⁹Housoeh lyis cha loh thuq yoeuh goh? Lvpe lhyi lah? Nghuot goeus, ngos namoq lyis taiq bah, lvpe thoq lyis zes kuh soeu nghuot.

¹⁰Yoeuh aq, nah cho sont langh das xiklyis, Ngos ngah loeuskyoh soeu lhyi nah xik pheh nhang kat, ge lhaih toh zis gas nyah cho nghuot.’

¹¹Ngos namoq lyis jyoengh taiq bah, vmesbih masyah khoeu los bang mas jeisnyhop dyei soeu Yohan thoq lyis zes soeu hank ma thuq los ku. Nghuot laus eq maukhung munghdan mas ngis thank soeu ka, nyah thoq lyis zes kuh.

¹²Jeisnyhop dyei soeu Yohan dah buisnyeis masyah gvshih jweh shoq, maukhung munghdan gas shohbop shohjyen xauh nyeis las, shohbop shohjyen kuot bang gas hauh zis lyis tsoengh lhuot yoeus nyeis.

¹³Khasoeh ge lyis, lvpe jens dvnganh yahge Moshe dah lyi gas, Yohan dah buisnyeis jweh shoq cha bweh los das cho uhlhomh taiq toh.

¹⁴Namoq lhom yoeus mes nghuot lyis gas, Yohan gas jweh los das dah Eliya nghuot.

¹⁵Gyo yoeus das no dap soeu ka xauhgyo bas jungh.

¹⁶Haq caiq mas bang lyis cha yah byi xoeuq das lah? Nyamoq gas kaih jang mas tsung lha dvyuk yah dvyuk lui goh nyeis dah loshang jens yah doeusgoh.

¹⁷Ngamoq gas namoq lyis khvlhank muot dyei lyis eq namoq ma goh; Ngamoq kukxi lyis eq namoq ma ngaus.

¹⁸Khasoeh ge lyis Yohan jweh los las ma zo ma shuk nyeis lyis eq nyamoq gas, Nyang mas yius bos, tsain ge.

¹⁹Cangsoeu Lo lyih las zo shuk lyis eq, Yoeuh aq, wom lvm soeu, zvbiq yet soeu, khoengh khywi bang yahge yaunos wons bang dah dyenschangh, tsain ge. Nghuot laus eq Mangso dah joeui lhyi ka hau muhzoh yah jyoeng yvlyis tuonh shet nyeis.

²⁰Housoeh nyang dang zoh yoeus las, nyah yomsoq zains muhzoh nyothyang kuot goeus dah wugungs, ehnyet ma tsain thaiq yvmvyah, nyang nyamoq lyis heisoeh ge nyho.

²¹Korazin eh, nvng mvtanhzoe nghuot. Betsaida eh, nvng mvtanhzoe nghuot. Khasoeh ge lyis, namoq jyank mas nyvng nhang dah yomsoq zains muhzoh lyis Taire yahge Sidon mas nyvng nhang nghuot lyis gas, hauh wus mas bang gohnhamp yah yanghthung dyi wuot, nyiyvp boms mas lhoeuh las nhaiqlom yoh thaiq hah das.

²²Nghuot laus eq ngos namoq lyis taiq bah, soetuon dah buisnyeis lyis Taire yahge Sidon xauh zis gas namoq thoq lyis sunghhuq das.

²³Kaperna-um eh, nvng maukhung jweh shoq chunghtoq zis xauh das lah, munyi thomh jweh shoq khyoq zis xauh das: khasoeh ge lyis, nah jyank mas kuot dah yomsoq zains muhzoh lyis Sodom mas toq kuot nghuot lyis gas, hauh zis gas khvnyhik jweh shoq joq shih das.

²⁴Khasoeh ge lyis, ngos namoq lyis taiq bah, soetuon dah buisnyeis lyis Sodom xauh zis gas nah thoq lyis zes sunghhuq das, ge.

²⁵Hauh shishenh lyis Yesu gas dang phank las, Maukhung nyeisjvng dah Yhensain Uwus eh, joeui bos bang yahge ehnyet yik bang jyank masyah nvng haih cho jens lyis tsain nghop shung toh las, lonoeuh jens lyis chixoeuq yvmvyah, ngos nvng lyis nhaiqshoqlang.

²⁶Nghuot goeus Uwus eh, heisoeh bweh los zis gas nvng nhaiqdoeus khyvlyis nghuot.

²⁷Ngah Uwus gas, ngos lyis dvnganh dyei toh goeus: Lo hank nghuot yvlyis Uwus mas lai las hank ma seq. Uwus hank nghuot yvlyis Lo yahge hauh Lo yah nyah cho chixoeuq das xiklyis khyen yoeus zis xauh soeu mha lai las hank ma seq.

²⁸Nyung daus las yvwons lyei bang dvnganhmoq eh, ngah jyank mas los geh, ngos namoq lyis no nhang das.

²⁹Ngah tanzoe lyis dvng geh, ngah jyank masyah xuq geh, khasoeh ge lyis, ngos gas noeuh nhamp las, o mha gyoh soeu nghuot: housoeh lyis namoq xauh no das.

³⁰Khasoeh ge lyis ngah tanzoe gas dvng lwis zis yahge ngah yvwons eq siq, ge.