Read Achang MATHE 13 Bible Online

MATHE 13 - Achang bible

MATHE 13

¹Hauh nyeihyo Yesu gas hauh yhen mhayah thuq loh las thomh yvm mas tsung toh.

²Dius moqjens nyah jyank mas zain huom los las, nyang lhyik khau mha loh wvng tsung toh. Moqjens gas jyankyvm mas yap joq.

³Nyang nyamoq lyis dangtoeuq yah nyoshoq ja taiq kyoh zis gas, Yoeuh aq, jyo khyoq soeu ka, jyo nyau sanh das xiklyis nghe pheh thuq loh.

⁴Nyang jyo sanh khyoq kat lyis, dvkhamh gas chokhyoh mas gyoh las hauh yvlyis nghoq jens yah lyih kui zo tyamp.

⁵Gohtoeu dvkhamh gas tsoh ma thoeu dah lukjvp yos mas gyoh loh. Tsoh ma thoeu lha hauh zis gas lvnyap yuk thuq los.

⁶Nghuot laus eq vnyet ma yoh chent yvmvyah buis tso los lyis lhap nyhauh tyamp.

⁷Dvyhamh gas zoeu gyomh mas gyoh loh, zoeu zains yuk kuh los las hauh yvlyis huop tyamp.

⁸Gohtoeu ka nyeisjvng gis yvmas gyoh las, jyo dvxo huon, khyukci huon, somhci huon je los.

⁹Gyo yoeus das no dap soeu ka xauhgyo bas jungh, ge.

¹⁰Changlo jens nyang lyis nyei zis gas, Nyamoq lyis chamus dangtoeuq yah taiq kyoh lah, ge.

¹¹Nyang nyamoq lyis phuk taiq zis gas, Maukhung munghdan dah nghop toh cho ka namoq lyis seq nhang goeus. Nghuot laus eq nyamoq lyis gas ma seq nhang shih.

¹²Yoh bang lyis lung dyei das: Housoeh nyamoq gas magons magoh yoh das; ma yoh bang jyank masyah gas nyamoq yoh joq zis yangh yoeus tyamp dyei das.

¹³Ngos nyamoq lyis dangtoeuq yah taiq zis gas, nyamoq yoeuh laus eq ma nyvng, xauhgyo laus eq ma seqgyo yvmvyah nghuot.

¹⁴Housoeh yvmvyah lvpe Esaia taiq khoq zis gas, nyamoq jyank mas nyuk los. Houka: Namoq xauhgyo laus eq ma daq gyo khyen yoeus. Namoq yoeuh laus eq ma nyvng.

¹⁵Khasoeh ge lyis, haih bang dah ehnyet gas nhaiq chuot nonungs las, nyamoq nojet, nyoq eq chenh goeus. Housoeh ma nghuot ya nyamoq dah nyoq nyvng los. Nyamoq no xauhgyo, nyamoq dah ehnyet mas seq los las, ngos nyamoq lyis yhoh dyei das xiklyis ngah jyank mas lhain los das, ge.

¹⁶Nghuot laus eq namoq nyoq nyvng zis yahge namoq no xauhgyo yvmvyah ngelhoq.

¹⁷Ngos namoq lyis jyoengh taiq bah, namoq nyvng yvlyis lvpe jens yahge dan bang nyoshoq moq nyvng mes laus eq ma xauh nyvng khoq. Namoq xauhgyo yvlyis gyo mes laus eq ma xauhgyo khoq.

¹⁸Housoeh yvmvyah jyo nyau sanh dah dangtoeuq lyis gyo yoeus geh.

¹⁹Dvyuk yuk Mangso munghdan dang lyis xauhgyo laus eq nyah ehnyet khau mha sanh toh dah jyo nyau lyis ma shop soeu yah yoeus tyamp dyei las nyang ma seqgyo. Hauh zis gas cho mas gyoh dah jyo nyau nghuot.

²⁰Lukjvp yos mas gyoh dah jyo nyau gas, Dang lyis xauhgyo las lvnyap lhom yoeus dah soeu nghuot.

²¹Nghuot laus eq nhaiqlom khau mha vnyet ma chent yvmvyah, dvyoq kyingh dvyoh kham. Nyang hauh dang gvng mas shoeuhshih zis xauh lyis ehnyet dyet las lvnyap nungsdoms loh.

²²Zoeu gyomh mas gyoh dah jyo nyau gas, Dang lyis xauhgyo laus eq mungkvn mas dah chiqjyen zis yahge mhuih jyomh dah zisyos gas hauh dang lyis huop las vshih ma yoh shih bang nghuot.

²³Nghuot laus eq nyeisjvng gis yvmas gyoh goeu gas, Dang lyis xauhgyo zis yah dvyhangteh hauh zis lyis seqgyo yoeus, vshih shih las, dvxo huon, khyukci huon, somhci huon je los bang nghuot.

²⁴Nyang nyamoq lyis gohtoeu dangtoeuq eq taiq: Maukhung munghdan gas, nyah yos mas jyo nyau gis sanh kat soeu yah doeusgoh.

²⁵nyamoq yhet joq dah uhlyis, ma gis dah jes lyih las sunghso sanh toh yvmas yohnoq los sanh khoq.

²⁶Nghuot laus eq jyo nyau yuk los las vshih shih dah uhlyis yohnoq eq thuq los.

²⁷Housoeh las hauh yhensain dah uhkung jens nyang lyis taiq zis gas, Yhensain eh, nah yos mas gis dah jyo kyingh dvkhyoq ma nghuot lhyeh? Housoeh lyis chamus yohnoq yuk los lah, ge.

²⁸Nyang nyamoq lyis taiq zis gas, Haih zis gas jes yah kuot zis dvnghuot, ge. Uhkung jens nyang lyis taiq zis gas, Housoeh lyis ngamoq yohnoq pom lhyi nuot tyamp das zis nvng vgyo lah, ge.

²⁹Nyang gas, Ma nghuot, namoq nyoq nuot lyis sunghso nyet lyis ma bos zangh nuot tyamp bas jungh.

³⁰Aiq ja yah dvgeh yet yhomh nyos jweh shoq yuk joq bas jungh. Jyo yhomh nyos lyis, jyo yhomh bang lyis, Nyoq lyis ngheq tyamp das xiklyis cangxeih yet dain toh geh, sunghso lhyi ka yet las ngah jyi mha kat toh geh oen das, ge.

³¹Nyang nyamoq lyis dangtoeuq taiq shih zis gas, Maukhung munghdan gas, dius dvyuk nyah yos mha yoeus sanh kat dah anghwvng shih yah doeusgoh.

³²Hauh zis gas vnyau dvnganh thoq mas zes ngis. Nghuot laus eq hauh zis kuh los goeus ya, angh nyaus phoqywi thoq lyis kuh thank vzains bweh los las, hauh vko mha mau dang nghoq jens sot yoh sot.

³³Nyang nyamoq lyis gohtoeu dangtoeuq taiq shih zis gas, Maukhung munghdan gas, vmesbih dvyuk sunghso mons somh pan mha yoeus kat lyis, sunghso dvnganh yvlyis yoh dau los nhang dah bicheih yah doeusgoh, ge.

³⁴Housoeh Yesu gas, haih zis dvnganh, moqjens lyis dangtoeuq yah taiq. Dangtoeuq ma bos bos nyang nyamoq lyis cha eq ma taiq kyoh.

³⁵Hauh zis gas, Ngos gas ngah nhuot haq las dangtoeuq yah taiq bah, Mungkvn xi lhyi yah shung toh zis lyis taiq das, ge lvpe taiq toh dang nyuk los das xiklyis nghuot.

³⁶Yesu gas moqjens lyis pont kat lho lha yhen khau mha wvng loh lyis, nyah changlo jens gas nyah jyank mas los las taiq zis gas, Yos mas dah yohnoq dangtoeuq ngamoq lyis doms phui kyoh aq, ge.

³⁷Nyang nyamoq lyis phuk taiq zis gas, Gis dah jyo nyau sanh soeu ka, Cangsoeu Lo nghuot.

³⁸Yos gas mungkvn nghuot; gis dah jyo nyau gas munghdan lo jens lyis taiq. Nghuot laus eq yohnoq gas ma gis soeu dah lo jens nghuot.

³⁹Hauh yohnoq lyis sanh dah jes gas Satan nghuot; yet yhomh dah shishenh gas mungkvn thank zis nghuot. Jyo yhomh bang gas loeuswons bang nghuot.

⁴⁰Hauh yohnoq lyis tsainh yoeus las nyi mas ngheq teh, mungkvn thank uhlyis housoeh bweh das.

⁴¹Hauh Cangsoeu Lo gas nyah loeuswons bang lyis nhang kat das las, nyamoq gas nyah munghdan mas dah ehnyet lainszo nhang bang yahge lyi ma chi dah muh kuot bang dvnganhmoq lyis tsainh las,

⁴²nyamoq lyis nyikhyomp mas khyoq kat das zis nghuot. Hauh yvmas nyamoq ngausdyeis ngausnhvp yah zwis khih chap loh das.

⁴³Hauh uhlyis dan bang gas, nyamoq Uwus dah munghdan mas buis soeh bvng los das. Gyo yoeus das no dap soeu ka xauhgyo bas jungh, ge.

⁴⁴Maukhung munghdan gas yos mas shung toh dah zisyos yah doeusgoh. Hauh zis lyis dius dvyuk nyvng lyis, doms shung toh khoq las gaus ehnyet yah loh las, yoh ya yoh goeu lyis ungh las hauh yos lyis wis yoeus.

⁴⁵Tsai, maukhung munghdan gas, gis dah uhshot lyis xo dah soenghi phoq yah doeusgoh.

⁴⁶Nyang gas svsoh phauhdap dah uhshot lyis xo nyvng lyis, loh las vsainnyang yoh ya yoh zis lyis ungh las hauh yvlyis wis yoeus.

⁴⁷Tsai maukhung munghdan gas, thomh mas doeuh las oeng vja ja lyis yoh nghop yoeus dah nyho yah doeusgoh.

⁴⁸Hau dyingh joq zis lyis jyankyvm mas yoeus los las tsung uhlyis yah gis yvlyis khyont mas kat, nghuot laus eq ma gis yvlyis gas doeuh tyamp.

⁴⁹Mungkvn thank uhlyis eq houyah dvyhangteh bweh los das. Loeuswons bang gyoh los las ma shop bang lyis dan bang masyah kangh yoeus las,

⁵⁰Nyikhyomp mas doeuh khyoq tyamp das. Hauh yvmas ngausdyeis ngausnhvp yahge zwis khih chap loh das.

⁵¹Yesu nyamoq lyis taiq zis gas, Hai dvnganh zis lyis vtsain seqgyo shih lah, ge. Nyamoq nyang lyis phuk taiq zis gas, Seqgyo goeus Yhensain eh, ge.

⁵²Housoeh las nyang nyamoq lyis taiq zis gas, Maukhung munghdan xiklyis maussauh lhaih svra duot das zis xuq goeus soeu khanghmuh gas, vsainnyang dah zisyos kyunk masyah vsaiq eq vcauh eq lap thuq los dah yhensain dvyuk yah doeusgoh.

⁵³Hauh thang lhyi Yesu gas, dangtoeuq dye taiq lyis hou mhayah thuq loh.

⁵⁴Nyah wus mas doms jweh loh lyis, nyamoq dah lyi jungs mas nyamoq lyis jyauh yvlyis gyo mauh las, Hauh soeu ka heisoeh teh dah joeui yahge yomzains muhzoh kuot das yomsoq khalhye yah yoh au lhyeh?

⁵⁵Nyang gas hai soehfuh dah lo ma nghuot lhyeh? Nyah ungwes gas Mari ge soeu nghuot las, nyah vnoeuh moq Yaku, Yosep, Simon yahge Yuda moq nghuot ma nghuot lhyeh?

⁵⁶Nyah nhamhmuh jens dvnganhmoq eq yang yah dvgeh ma nghuot lhyeh? Housoeh dvnghuot zis haih soeu housoeh teh yomsoq khalhye yah yoh au lhyeh, tsain ge.

⁵⁷Housoeh nyamoq gas nyang lyis ehnyet lainszo gus bweh. Nghuot laus eq Yesu nyamoq lyis taiq zis gas, Lvpe ka vsainnyang mau, yahge yhen mas lai las nyoqnho ngelang ma yoh zis ma bos, ge.

⁵⁸nyamoq lomsjingh ehnyet ma bos yvmvyah, hauh joqyos mas nyang yomsoq zains muhzoh nyoshoq ma yoh kuot khoq.