Read Achang MATHE 14 Bible Online

MATHE 14 - Achang bible

MATHE 14

¹Hauh shishenh lyis Galile mungh zau Herod gas Yesu dah nyings hoeuh zis xauhgyo lyis,

²nyah jyeidwis jens lyis taiq zis gas, Haih zis gas jeisnyhop dyei soeu Yohan nghuot. Nyang gas shei masyah dwis toq los goeus, housoeh yvmvyah nyang yomsoq zains muhzoh yoh kuot, ge.

³Housoeh Herod gas nyah boek Philip dah yhensain nyhiq Herodia gvng mas Yohan lyis nyhik nhang lha thung mas lhunk toh.

⁴Khasoeh ge lyis Yohan gas Herod lyis nyah boek Philip dah yhensain nyhiq Herodia lyis yoeus das lyi ma bos ge taiq yvmvyah nghuot.

⁵Nyang gas Yohan lyis sat mes laus eq moqjens lyis gyuk: khasoeh ge lyis nyamoq gas nyang lyis lvpe dvyuk nghuot ge loms.

⁶Nghuot laus eq Herod khoeu dah buisnyeis lyis, hauh pwe mha los bang dah xikkhonh mas Herodia dah lonyi lo goh xoeuq zis yah Herod lyis nhaiqtap nhang.

⁷Hauh uhlyis nyang gas hau lonyi lo lyis, nyang cha sang cha dyei das, ge das-ing dah khonh toh.

⁸Housoeh hauh lonyi lo gas nyah ungwes joeui dyei zis yah dvyhangteh, Jeisnyhop dyei soeu Yohan dah uhloms lyis bvn masyah kat los dyei aq, ge taiq.

⁹Hwankti ka nhaiqkuk laus eq maukhi toh dang yahge nyah boenghwus jens gvng mas nyang lyis dyei das xiklyis taiq kat las,

¹⁰nyang dius nhang lha thung mha Yohan dah uhloms lyis thyet goeus.

¹¹Nyah uhloms lyis bvn masyah yoeus los las hauh lonyi lo lyis dyei lyis, nyang gas nyah ungwes lyis dyei.

¹²Nyah changlo jens gas, mvng lyis loh yoeus nyhop thang lhyi Yesu lyis loh tsain taiq kyoh.

¹³Yesu hauh yvlyis xauhgyo lyis, nyang gas lhyik mas tsung lha sam joqyos pheh jhank loh. Nghuot laus eq dius jens hauh zis xauhgyo lyis wus masyah thuq las khyei cho yah nyah thang mha tsain chank loh.

¹⁴Nyang lhyik masyah thuq loh lyis moqjens lyis nyvng kat. Nyamoq lyis nhaiq yoeuh nyen las, nyamoq dah nos bang lyis gis los nhang.

¹⁵Nyenhthang jweh lyis, nyah changlo jens nyah jyank mas los taiq zis gas, Haih zis gas mhanhdyvp nghuot, shishenh eq lai loh goeus, moqjens lyis wukhau mha nyamoq xiklyis zonoms loh tsain wis bas jungh, nyamoq lyis nhang kat aq, ge.

¹⁶Yesu taiq zis gas, Nyamoq lyis ma loh nhang noh nyamoq lyis namoq zonoms dyei geh, ge.

¹⁷Nyamoq, nyang lyis taiq zis gas, Ngamoq ohlhyoq oeng koeuq yahge oengdoq aiq doeu dvyoh, ge.

¹⁸Nyang gas, Hauh zis ngah jyank mas chi los aq, ge.

¹⁹Housoeh nyang gas moqjens lyis mhanh thoq mas tsung das zis taiq toh lho lha, ohlhyoq oeng koeuq yahge oengdoq aiq doeu lyis yoeus chi lho lha, maukhung pheh nghank las shvmanh dung. Hauh thang lhyi khyiq las hauh ohlhyoq nyah changlo jens lyis dyei. Changlo jens gas moqjens lyis gvm dyei.

²⁰Nyamoq dvnganhmoq zo jo thang lhyi, nyet dah vpop vsop tsain kui tsainh lyis dvci aiq dang muis nghuot.

²¹Zo bang vmesbih yahge loshang jens ma suon, yukgis goeu oeng khyoengh ko nghuot.

²²Yesu moqjens lyis pont nyeis uhlyis nyah changlo jens lyis lhyik mas tsung lha thyitvp pheh, nyah xik pheh goeu loh nhang.

²³Nyang gas moqjens lyis pont lho lha, shvmanh dung das xiklyis boms mas nyang kyingh doq loh. Mauchuot los lyis houmha nyang kyingh nyeis.

²⁴Nghuot laus eq hauh uhlyis lhyik gas jyankyvm yah svsoh we yvmas loh nyeis. Hauh uhlyis lyeis ma doeus yvmvyah changhphauq doeuh nyeis.

²⁵Nvpsangh nyoq nyvng zoh lyis Yesu gas thomh thoq cho yah nyamoq jyank pheh suh los nyeis.

²⁶Housoeh thomh thoq cho suh los yvlyis changlo jens nyvng lyis nyamoq gyuk las kaiq zis gas, Haih zis gas sidyos nghuot, ge.

²⁷Nghuot laus eq houjang yah Yesu nyamoq lyis taiq zis gas, Vgyuk goh, ngos dvnghuot, yomhont geh, ge.

²⁸Petru nyang lyis phuk taiq zis gas, Yhensain eh, nvng dvnghuot lyis gas jeis thoq cho yah ngos lyis nah jyank mas los nhang aq, ge.

²⁹Los aq, ge nyang lyis taiq lho lhyi, Petru gas lhyik masyah gyoh las Yesu jyank mas loh das xiklyis jeis thoq mas suh loh.

³⁰Nghuot laus eq lyeismuh jyang lhyi nyvng lyis nyang gyuk los: hauh uhlyis nyang nyop loh nyeis las kaiq zis gas, Yhensain eh, ngos lyis khyuot yoeus aq, ge.

³¹Yesu loq lvnyap yhuonh kat las, nyang lyis lang she uhlyis yah taiq zis gas, Lomsjingh Ehnyet nain soeu eh, chamus khamkhvv lah, ge.

³²Nyamoq lhyik khau mha wvng goeus ya, lyeis eq tam goeus.

³³Hauh lhyik khau mha bang nyang lyis dupaiq uhlyis yah taiq zis gas, Nvng gas Mangso dah lo jyoengh nghuot, ge.

³⁴Nyamoq thyitvp pheh dap loh lyis, Genesaret mau mas jweh loh.

³⁵Hauh joqyos mas bang gas nyang lyis seq las, nyamoq gas hauh wuxom gonh mas dah nos bang dvnganh lyis Yesu jyank mas loh shwih los nhang.

³⁶Housoeh nyamoq gas nyah dyithang lhyi khvlangh tanh das xiklyis nyang lyis dung. Nyang lyis xauh tanh bang dvnganh gis los.