Read Achang MATHE 15 Bible Online

MATHE 15 - Achang bible

MATHE 15

¹Yerusalem mas dah maussauh lhaih bang yahge Pharishe jens Yesu jyank mas los taiq zis gas,

²Nah changlo jens gas chamus nyamoq loq ma cheih wom zo las logis jens dah thungh lyis thyoq goh lah, ge.

³Nyang nyamoq lyis phuk taiq zis gas, Namoq dah thungh chank das xiklyis Mangso dah tyingtoh dang lyis chamus thyoq goh lah?

⁴Mangso taiq zis gas, Nah ungwes uwus lyis phauh nyang aq; ungwes uwus lyis ma gis zis taiq soeu ka shei nyang shei bas jungh, ge.

⁵Nghuot laus eq namoq taiq zis gas, Nah ungwes uwus lyis, Namoq ngah loq masyah xauh yoeus das vyhang ka Mangso lhyi dyei ge las,

⁶nyah nyhiphoq lyis ma phauh lyis gas, nyang gas shuot zis ma bos ge namoq dah thungh yah Mangso dah tyingtoh dang lyis peq toh.

⁷Gis guons kuot bang eh, namoq yah sen lha Esaia pe khoq zis gas jyoengh nyang nghuot.

⁸Hauh zis gas: Haih dius jens gas nyamoq nhuotkuk yah ngos lyis phauh nyang laus eq, Nyamoq dah nhaiqlom gas ngos yah we goh joq.

⁹Dius dah tyingtoh dang lyis kyingh vgungs toh las jyauh chah yhangteh jyauh nyeis yvmvyah, nyamoq ngos lyis paiq zis gas vkom dvnghuot, ge.

¹⁰Housoeh nyang moqjens lyis khi lha taiq zis gas, Gyo yoeus las seqgyo geh.

¹¹Nhuot mas wvng zis gas dius lyis vwot v-oeu bweh nhang zis ma nghuot; nhuot masyah thuq loh zis gas dius lyis vwot v-oeu bweh nhang, ge.

¹²Hauh uhlyis changlo jens nyah jyank mas los las taiq zis gas, Haih dang Pharishe jens xauhgyo lyis nhaiq gyo nos zis nvng vseq lah, ge.

¹³Nyang nyamoq lyis phuk taiq zis gas, Maukhung mha dah ngah Uwus ma xoh toh vzains dvnganh yah khuot tyamp zis xauh das.

¹⁴Nyamoq housoeh nghuot langh shih bas jungh, nyamoq gas nyoqjet dah choshe bang nghuot. Nyoqjet soeu ka nyoqjet soeu lhyi choshe lhyi ka, aiq yuk yah dwang mas gyoh das, ge.

¹⁵Petru nyang lyis phuk taiq zis gas, Haih dangtoeuq ngamoq lyis phui kyoh aq, ge.

¹⁶Nyang nyamoq lyis taiq zis gas, Namoq haih zis lyis gvshih jweh shoq do ma lhain goh lhyeh?

¹⁷Nhuot mas wvng dah vyhang cha nghuot laus eq womdau khau mha wvng loh thang lhyi nghe pheh thuq loh goeus zis lyis namoq ma seq goh lhyeh?

¹⁸Nghuot laus eq nhuot masyah thuq loh zis gas, nhaiqlom khau mhayah bweh thuq los las, haih goeu gas dius lyis vwot v-oeu bweh nhang.

¹⁹Khasoeh ge lyis nhaiqlom masyah ma gis zis nghamh, dius sat, nyi shuot lvng shuot, yauxi, khauh, ma ying kanghjyoeng kat zis yahge loeusmus soqzo zis bweh thuq los.

²⁰Haih goeu gas dius lyis vwot v-oeu bweh nhang zis nghuot. Nghuot laus eq loq ma cheih wom zo zis gas, dius lyis vwot v-oeu bweh nhang zis ma nghuot, ge.

²¹Yesu gas hou mhayah thuq las Taire yahge Sidon wuxom pheh jhank loh.

²²Hauh uhlyis yoeuh aq, Khanan vmesbih dvyuk hauh mau masyah los las kaiq sang zis gas, Dawi dah Lo Yhensain eh, ngos lyis nhaiqnyen aq, ngah lonyi lo yius kuq las svsoh shanghsenh nyeis, ge.

²³Housoeh ge nghuot laus eq Yesu gas, nyang lyis dang dvkhonh eq ma toeuh dyei. Nyah changlo jens nyang lyis los taiq zis gas, Nyang lyis loh nhang aq: Khasoeh ge lyis nyang gas yah thang mha chank kaiq ngaus yenh, ge.

²⁴Nyang phuk taiq zis gas, Ngos lyis gas Israel yhen bang mas dyuk tyamp dah yvng jens jyank mas kyingh dvnhang kat, ge.

²⁵Hauh uhlyis nyang ywi los las gyuis gop zoh lyis yah taiq zis gas, Yhensain eh, ngos lyis bos pangh aq, ge.

²⁶Nyang phuk taiq zis gas, Loshang jens dah zonoms lyis yoeus las lvkhuih jens lyis doeuh dyei zis gas ma doeus, ge.

²⁷Hauh vmesbih nyang lyis phuk taiq zis gas, Nghuot goeus Yhensain eh, nghuot laus eq lvkhuih eq nyah yhensain kihgus masyah gyoh dah zopop kui zo, ge.

²⁸Housoeh Yesu nyang lyis phuk taiq zis gas, Vmesbih eh, nah lomsjingh zis gas kuh joq. Nvng omes zis yah dvyhangteh bweh bas jungh, ge. Nyah lonyi lo gas hauh shishenh lyis nyang gis los goeus.

²⁹Yesu gas hauh mau masyah thuq loh lyis, Galile thomh nvm mas jweh loh. Housoeh boms mas doq loh las houmha tsung toh.

³⁰Hauh uhlyis moqjens nyah jyank mas zain los las khyei gis loq ma yoh, nyoqjet, nhuotjet bang yahge gohtoeu noslom vja ja yoh bang nyoshoq moq lyis nyamoq shwih nhoenk lyih las, nyah khyeiyang mas toh. Housoeh las nyang nyamoq lyis gis los nhang.

³¹Housoeh nhuotjet bang yoh jis los, shei nhui bang gis los, khyei dyoq bang yoh suh loh, nyoqjet bang nyvng los zis lyis moqjens nyvng lyis mauh. Housoeh las nyamoq gas Israel dah Mangso phunk lyis tsain chungh.

³²Hauh thang lhyi Yesu gas nyah changlo jens lyis khi lha taiq zis gas, Ngos haih moqjens lyis nhaiqnyen: Khasoeh ge lyis, nyamoq ngos yah nyeis zis gvshih somh nyeih nyangh goeus, nyamoq zo das zis cha eq ma yoh. Ngos nyamoq lyis wom yuot zis yah ma mes nhang kat, nyamoq cholvt mas wom yuot lhyauh das, ge.

³³Changlo jens nyang lyis taiq zis gas, Mhanhdyvp mas heinyhoq moq lyis tham shoq dah ohlhyoq gas khamha yoh xo das lah, ge.

³⁴Yesu nyamoq lyis phuk taiq zis gas, Ohlhyoq khanyhoq koeuq yoh goh lah, ge lyis, Nyamoq taiq zis gas, Nyhet koeuq yahge oengdoq dvtsiq dvbos lo, ge.

³⁵Moqjens lyis nyeisjvng mas tsung das xiklyis taiq toh lho lha,

³⁶Nyang hau ohlhyoq nyhet koeuq yahge oengdoq lyis yoeus chi lha jyehjuh chungh thang lhyi khyiq las, changlo jens lyis dyei. Changlo jens eq moqjens lyis gvm dyei.

³⁷Housoeh nyamoq dvnganhmoq zo jo thang lhyi, nyet dah vpop vsop kui tsainh lyis nyhet dang muis nghuot.

³⁸Zo bang vmesbih yahge loshang jens ma suon, yukgis komshang nyei khyoengh nghuot.

³⁹Nyang moqjens lyis pont kat thang lhyi, lhyik khau mha wvng tsung lha Magadan wuxom mha jweh loh.