Read Achang MATHE 16 Bible Online

MATHE 16 - Achang bible

MATHE 16

¹Hauh uhlyis Pharishe yahge Saduke moq los las, nyang lyis shiwu zoh lyis maukhung mha dah vlho dvkoeuq chixoeuq aq, ge sang.

²Nyang nyamoq lyis taiq zis gas, nyenhthang lhyi namoq taiq zis gas, maukhung nes las mau phangh das.

³Nvpsangh pheh maukhung nes, mau eq noq lyis gas, Khvnyhik mau thunghkyei gyoh das ge gyangh daq taiq. Namoq maukhung wuhsoh lyis seq yoeuh laus eq, shishenh yah sen dah vlho lhyi ka ma seq yoeuh ma nghuot lhyeh?

⁴Ma shop zis yahge Mangso lhyi toh tyamp bang gas, vlho tsain xo. Nghuot laus eq lvpe Yona dah vlho mha lai las gohtoeu chah vlho eq nyamoq lyis ma dyei das, ge. Housoeh nyang nyamoq lyis toh khoq las thuq loh.

⁵Changlo jens gas thomh thyitvp pheh goeu dap loh lyis, nyamoq ohlhyoq wons los das zis tohnyhik khoq.

⁶Yesu nyamoq lyis taiq zis gas, Pharishe yahge Saduke jens dah bicheih lyis zaih geh, ge.

⁷Housoeh nyamoq nyang changh taiq goh zis gas, Yang ohlhyoq ma tsain wons yvmvyah nghuot, ge.

⁸Yesu hauh yvlyis seq las, Lomsjingh ehnyet nain bang eh, namoq ohlhyoq ma wons cho lhyi chamus taiq goh nyeis lah?

⁹Namoq ma seqgyo shih goh lhyeh? Ohlhyoq oeng koeuq yah dius oeng khyoengh lyis tsoh las khanyhoq dang yoh kui tsainh shih zis lyis namoq ma soh goh lhyeh?

¹⁰Ohlhyoq nyhet koeuq yah dius nyei khyoengh lyis tsoh las khanyhoq dang yoh kui tsainh shih zis lyis ma tsain soh lo goh lhyeh?

¹¹Ngos namoq lyis ohlhyoq dah cho ma taiq zis gas namoq chamus ma seqgyo goh lah? Pharishe yahge Saduke moq dah bicheih lyis zaih geh, oen dvtaiq, ge.

¹²Hauh uhlyis ohlhyoq dah bicheih lyis taiq zis ma nghuot, Pharishe yahge Saduke moq jyauh dah cho lhyi zaih das zis dvtaiq yvlyis tsain seqgyo.

¹³Gvshih Yesu gas Kesare mau Philipi mas jweh loh lyis, nyang nyah changlo jens lyis nyei zis gas, Dius jens Cangsoeu Lo lyis hank nghuot ge goh lah, ge.

¹⁴Nyamoq, nyang lyis taiq zis gas, Dvyhamh gas jeisnyhop dyei soeu Yohan; dvyhamh gas Eliya; gohtoeu dvyhamh gas, Yeremia, nghuot ya, lvpe dvyuk yuk nghuot, ge.

¹⁵Housoeh lyis namoq gas ngos lyis hank nghuot oen goh lah, ge nyamoq lyis taiq.

¹⁶Simon Petru phuk taiq zis gas, Nvng gas dwis nyeis Mangso dah Lo Khristu nghuot, ge.

¹⁷Yesu nyang lyis phuk taiq zis gas, Yona dah lo Simon eh, nvng gas ngelhoq, nvng lyis haih zis chixoeuq zis gas suihshoh ma nghuot, maukhung mha dah ngah Uwus chixoeuq zis dvnghuot.

¹⁸Petru eh, ngos nvng lyis taiq bah, nvng gas luk nghuot las, Ngos ngah tsainhtoh phung lhyi haih lukmuh lom thoq mas ci toh das las, hauh yvlyis shei dah yomsoq ge munyi thomh khomh yah yoh ung das zis ma nghuot, ge.

¹⁹Maukhung munghdan suhshih ngos nvng lyis dyei das: nyeisjvng thoq mas nvng twih ya twih toh zis gas, maukhung mha eq twih toh zis xauh das. Nyeisjvng thoq mas nvng phui ya phui kat zis cha nghuot laus eq maukhung mha phui kat zis xauh das, ge.

²⁰Hauh thang lhyi nyang gas Yesu Khristu nghuot zis hank lyis eq ma taiq das xiklyis nyah changlo jens lyis khyangh wontang com toh.

²¹Hauh shishenh masyah Yesu gas Yerusalem mas e lha logis jens yahge phudyei uhjyung jens, maussauh lhaih bang dah loq mas shanghsenh zis vja ja xauh thang lhyi nyang lyis sat las, somh vnyeih lyis dwis toq das cho nyah changlo jens lyis chixoeuq zoh loh.

²²Housoeh las Petru gas nyang lyis khi yoeus las nyho zis gas, Yhensain eh, ma gis bweh, hauh zis gas nvng masyah we loh bas jungh; haih zis nah jyank mas khanhamp eq ma bweh bas jungh, ge.

²³Nghuot laus eq nyang Petru lyis lhain yoeuh las phuk taiq zis gas, Satan eh, ngah nungsthank pheh jik loh aq, nvng gas Mangso shot pheh yah ma nghamh, dius shot pheh yah dvnghamh yvmvyah, nvng gas ngah dah lainszo gus nghuot, ge.

²⁴Housoeh Yesu nyah changlo jens lyis taiq zis gas, Dvyuk yuk ngah thang chank soeu duot mes lyis gas, nyah gungs lyis nungsyos toh, nyah tapzains wuq las ngah thang mha chank bas jungh.

²⁵Khasoeh ge lyis vsainnyang kang lhyi khyuot yoeus mes soeu ka, kang dyuk das. Nghuot laus eq ngah gvng mas kang dyuk soeu ka kang xo nyvng das.

²⁶Dius dvyuk gas mungkvn gonh lyis sain toh laus eq nyah kang dyuk tyamp lyis gas nyah xiklyis chah vkyuh bos lah? Cangsoeu dius gas nyah kang lhyi cha yah yoh thaiq yoeus das lah?

²⁷Khasoeh ge lyis hauh Cangsoeu Lo gas Uwus dah phunk mas nyah loeuswons bang yah dvgeh jweh los das; hauh uhlyis yuk khanghmuh gas nyah muhzoh lyis tank las phauh shangh zis xauh das.

²⁸Ngos namoq lyis jyoengh taiq bah, heimha yap joq bang dvyhamh gas hauh Cangsoeu Lo nyah munghdan yah jweh los zis ma nyvng dvchank ma shei das, ge.