Read Achang MATHE 17 Bible Online

MATHE 17 - Achang bible

MATHE 17

¹Khyuk nyeih dah thang lhyi Yesu gas Petru, Yaku yahge nyah vnoeuh Yohan moq lyis shwih las boms nyhang thoq mas nyamoq nyang kyingh doq loh.

²Nyang gas nyamoq dah xikkhonh mas vwot thaiq los las nyah nyoqnho ka buis teh bvng los, nyah dyi eq thyoeu lha kyi kyi bvng los.

³Nyang yah jisgoh nyeis dah Moshe yahge Eliya eq nyamoq lyis nyetlos nyettant nyvng xoeuq.

⁴Housoeh Petru Yesu lyis taiq zis gas, Yhensain eh, heimha yang nyeis das xiklyis gis. Nvng gyo nghuot lyis gas, ngamoq heimha zvng somh koeuq nvng, Moshe, Eliya xiklyis dvyuk dvkoeuq kuot dyei das, ge.

⁵Nyang housoeh taiq nyeis shih lyis bvng dah jyommauh yah nyamoq lyis nghop tyamp las: yoeuh aq, jyommauh khau mhayah thwe dvkoeuq taiq zis gas, Haih soeu ka ngos jyetdap dah ngah Lo nghuot, ngos nyang lyis nhaiq doeus - nyah dang gyo geh, ge.

⁶Changlo jens haih zis xauhgyo lyis, gyuk nvn las gop pyeh toh.

⁷Housoeh Yesu nyamoq lyis los tanh las taiq zis gas, Toq geh, vgyuk goh, ge.

⁸Nyamoq tsain nghank yoeuh lyis, Yesu masyah lai las gohtoeu hank lyis eq ma nyvng lo.

⁹Nyamoq boms masyah gyoh los dah uhlyis, Yesu nyamoq lyis khyangh com zis gas, Cangsoeu Lo shei masyah ma doms dwis toq los dvchank, haih nyoqnyvng hank lyis eq vtaiq kyoh goh, ge.

¹⁰Nyah changlo jens nyang lyis nyei zis gas, Maussauh lhaih bang chamus Eliya shih jweh los chah ge taiq au lhyeh, ge.

¹¹Yesu nyamoq lyis phuk taiq zis gas, Jyoengh Eliya shih los las dvnganh yvlyis soq das.

¹²Nghuot laus eq ngos namoq lyis taiq bah, Eliya gas jweh los goeus zis nyamoq gas nyang lyis ma seq yvmvyah nyamoq o khyvlyis kuot. Houyah dvyhangteh Cangsoeu Lo eq nyamoq dah loq mas shanghsenh zis xauh das, ge.

¹³Changlo jens gas nyang nyamoq lyis jeisnyhop dyei soeu Yohan dah cho taiq kyoh nyeis ge seqgyo.

¹⁴Nyamoq moqjens jyank mas jweh e lhyi, dius dvyuk nyah jyank mas lyih las nyah xikkhonh mas phvluk zomhgyuis las taiq zis gas,

¹⁵Yhensain eh, ngah lo lyis nhaiqnyen aq: khasoeh ge lyis, nyang gas chuot las shanghsenh nyeis. Nyi mas eq, jeis mas eq dvsoq soq lyis lains wvng loh.

¹⁶Ngos nyang lyis nah changlo jens jyank mas shwih e laus eq nyamoq ma yoh lhoq gis dyei, ge.

¹⁷Yesu phuk taiq zis gas, Lomsjingh cho ma bos, ung lhung dah vcaiq mas bang eh, Ngos namoq yah khanyhank jweh shoq yoh nyeis nyeis das lah? Khanyhank jweh shoq namoq lyis jhen chah das lah? Nyang lyis ngah jyank mas shwih los aq, ge.

¹⁸Yesu yius lyis nyho lho lhyi yius gas loshang jyank masyah thuq loh goeus las, hauh shishenh masyah nyang gas gis los.

¹⁹Hauh thang lhyi changlo jens nyang kyingh Yesu jyank mas los las taiq zis gas, Ngamoq hauh yius lyis chamus ma yoh khat thuq au lhyeh, ge.

²⁰Yesu nyamoq lyis taiq zis gas, Namoq lomsjingh ehnyet nain yvmvyah nghuot. Ngos namoq lyis jyoengh taiq bah, namoq mas lomsjingh ehnyet anghshih chvp iq bos nghuot lyis gas, namoq haih boms lyis, Thyimha ywi cheh loh aq, ge lyis ywi cheh loh das. Housoeh nghuot lyis gas namoq xiklyis ma duot zis cha eq ma bos lo das.

²¹Nghuot laus eq shvmanh dung zis yahge womkyi zis yah kyingh ma nghuot lyis gas haih ja gas ma yoh thuq loh, ge.[3]

²²Gvshih nyamoq Galile mau mas nyeis dah uhlyis, Yesu nyamoq lyis taiq zis gas, Cangsoeu Lo gas dius jens dah loq mas phanhlyen dyei zis xauh das.

²³Nyamoq gas nyang lyis sat das, hauh thang lhyi somh vnyeih lyis nyang dwis toq das, ge. Changlo jens gas vthanklang masyah ohyom.

²⁴Kaperna-um mha jweh loh lyis, yhenmuh khoenghdaus khywi bang gas Petru jyank mas los las, Namoq dah svra gas yhenmuh khoenghdaus ma kat lah, ge lyis nyang phuk taiq zis gas, Kat, ge.

²⁵Petru yhen khau mha wvng loh lyis Yesu nyang lyis lhom taiq zis gas, Simon eh, nvng khasoeh nghamh? Nyeisjvng hwankti jens khoenghdaus, vkhoq khywi zis gas hank jyank masyah nghuot au lhyeh? Nyamoq lo jens masyah lah? Gohnyau bang jyank masyah lah, ge.

²⁶Petru gas, Gohnyau bang jyank masyah nghuot ge lyis, Yesu gas, Lo jens gas luiq goeus.

²⁷Nghuot laus eq yah gvng mas nyamoq ehnyet ma dyet bas jungh, thomh mas oeng nghweh e khyoq aq; cangxeih yoh dah oeng lyis lap yoeus las nhuot lang haq lyis ngwis dvkyvp nyvng das: hauh zis yoeus las nvng yahge ngah xiklyis nyamoq lyis dyei aq, ge.