Read Achang MATHE 18 Bible Online

MATHE 18 - Achang bible

MATHE 18

¹Hauh shishenh lyis changlo jens gas Yesu jyank mas los las taiq zis gas, Maukhung munghdan mas kuh thank zis hank nghuot, ge.

²Nyang loshang dvyuk nyah jyank mas khi yoeus las nyamoq vgungs mas yap nhang lha taiq zis gas,

³Ngos namoq lyis jyoengh taiq bah, namoq ehnyet thaiq las loshang jens teh ma bweh los nghuot lyis gas, namoq maukhung munghdan mas ma xauh wvng loh das.

⁴Housoeh yvmvyah haih loshang teh ehnyet o mha gyoh soeu hank laus eq, maukhung munghdan mas zes kuh soeu nghuot los das.

⁵Heisoeh teh dah loshang dvyuk lyis ngah nyings masyah lhom yoeus soeu hank laus eq ngos lyis lhom yoeus zis nghuot.

⁶Nghuot laus eq ngos lyis lomsjingh dah haih ngis bang dvyuk yuk lyis yaunos kuot nhang soeu hank laus eq, nyah lainzain mas mhoq shan tyaulhangh las hauh dah thomh noq mas khyoq kat lyis nyah xiklyis zes gis.

⁷Yaunos kuot das xiklyis shiwu cho nyoshoq bos yvmvyah mungkvn gas mvtanhzoe nghuot: khasoeh ge lyis hau yaunos thuq los zis gas soengh choenk nghuot. Nghuot laus eq hau shiwu cho lhyi bweh nhang soeu ka mvtanhzoe nghuot.

⁸Nah loq nah khyei dvjaja yah nvng lyis shuot nhang lhyi, hauh yvlyis thyet doeuh tyamp aq; Nah dah aiq loq nghuot ya, aiq khyei dap zis yah vcaiq vto nyi mas kat zis xauh das thoq lyis, loqdung khyeidung yah kang dwis yvmas xauh wvng loh das zis gas nah xiklyis zes gis.

⁹Nah nyoqjeih yah nvng lyis shuot nhang lhyi ka, hauh yvlyis thuiq tyamp aq. Nyoq dvjeih yah kang dwis yvmas xauh wvng zis gas, nyoq aiq jeih yah munyi thomh mas wvng loh thoq lyis zes gis.

¹⁰Housoeh yvmvyah ngis bang dvyuk lyis eq chaxwe ma nhang vkuot goh. Khasoeh ge lyis ngos namoq lyis taiq bah, maukhung mha nyamoq dah loeuswons bang eq, maukhung mha nyeis, ngah Uwus nyoqnho lhyi vjangh yoeuh nyeis.

¹¹Cangsoeu Lo gas dyuk loh soeu lyis khyuot yoeus das xiklyis lyih.[4]

¹²Namoq khasoeh nghamh goh lah? Dius dvyuk yuk yvng dvxo doeu yoh: hou mhayah dvdoeu chowhang whang dyuk loh lyis, gauci gau lyis boms mas nyhei toh khoq las, chowhang whang dyuk loh dah vdoeu lyis loh xo ma nghuot lhyeh?

¹³Ngos namoq lyis jyoengh taiq bah, hauh vdoeu xo nyvng lyis, chowhang ma whang dyuk dah gauci gau doeu nyhenshang gauslaus thoq lyis hau dvdoeu xiklyis zes gauslaus.

¹⁴Houyah dvyhangteh maukhung mha dah namoq Uwus[5] gas, hau ngis bang mas dvyuk yuk dyuk das zis yangh ma bauh.

¹⁵Nah vmang vnoeuh yah nvng lyis cu lhyi, nvng e lha nah aiq yuk nyang kyingh nyeis yvmas, nyang chah zis lyis taiq aq. Nyang nah dang gyo yoeus lyis gas, nvng nah vmang vnoeuh lyis yoh doms jyoeuq yoeus goeus.

¹⁶Nghuot laus eq nyang ma gyo dyei lyis gas, nvng yah dvgeh kanghjyoeng dvyuk, nghuot ya aiq yuk shwih e lha, dang khonh khanghmuh lyis kanghjyoeng aiq yuk somh yuk dah xikkhonh mas taiq jyoeng aq.

¹⁷Nyamoq dang lyis eq ma gyo dyei nghuot lyis gas, tsainhtoh phung lhyi taiq kyoh aq. Tsainhtoh phung lhyi eq nyang ma gyo dyei nghuot lyis gas, nyang gas gohnyau bang yahge khoengh khywi soeu teh nghuot bas jungh.

¹⁸Ngos namoq lyis jyoengh taiq bah, nyeisjvng mas namoq twih ya twih zis lyis maukhung mha twih toh das. Nyeisjvng mas namoq phui ya phui kat zis lyis maukhung mha eq phui kat das.

¹⁹Ngos namoq lyis taiq shih bah, nyeisjvng thoq mas namoq aiq yuk xamxonh las dung lyis gas, cha nghuot laus eq namoq dung zis lyis maukhung thoq mas ngah Uwus gas namoq lyis kuot dyei das.

²⁰Khasoeh ge lyis ngah nyings mas aiq yuk, nghuot ya somh yuk dvgeh huom dah nyamoq vgungs mas ngos bos, ge.

²¹Hauh uhlyis Petru nyah jyank mas los taiq zis gas, Yhensain eh, ngah vmang vnoeuh ngos lyis doms shuot doms shuot nghuot lyis, ngos nyah yobos lyis khanyhoq lhain khyuot dyei chah das lah? Nyhet lhain jweh shoq lah, ge.

²²Yesu nyang lyis taiq zis gas, Ngos nvng lyis nyhet lhain kyingh oen ma taiq; nyhetci lhain mulas nyhet lhain jweh shoq khyuot dyei aq, ge.

²³Housoeh yvmvyah maukhung munghdan gas, uhkung jens lyis jyen suon mes dah hwankti dvyuk yah doeusgoh.

²⁴Housoeh jyen suon nyeis lyis, nyang lyis ngwis jyen sens sens wvn wvn dap soeu dvyuk nyah jyank mas tsain shwih los.

²⁵Hauh soeu ka jyen cap das zis cha eq ma yoh yvmvyah, nyah gungs, nyah yhensain nyhiq, nyah lo jens yahge nyang yoh ya yoh zis dvnganh ungh las jyen cap das xiklyis nyah yhensain vmingh dyei.

²⁶Hauh uhkung ka nyah xikkhonh mas phvluk zomhgyuis paiq las taiq zis gas, Yhensain eh, ngos lyis jenh jhen dyei shih aq, ngos nvng lyis dvnganh yah cap das, ge.

²⁷Hauh uhkung dah yhensain ka nhaiqnyen las kat kat: nyah jyen lhyi lhuiq tyamp dyei.

²⁸Nghuot laus eq uhkung hauh vyuk thuq loh lyis, nyang lyis jyen dvxo shauh soeu uhkung changh dvyuk yah xauhgoh lyis, nyang gas hauh soeu lhyi nyhik yoeus lho lha, lainzain mas chih toh las, Ngah ngwis jyen cap aq, ge sang.

²⁹Hau uhkung changh eq nyah khyeiyang mas gyuis las nyang lyis khyoeuq zis gas, Ngos lyis jenh jhen dyei shih aq, ngos nvng lyis dvnganh yah cap das, ge.

³⁰Jyeih dyei soeu eq ma gyo dyei, jyen dye cap shoq nyang lyis thung mha lhunk toh.

³¹Hauh cho lhyi nyah uhkung changh jens nyvng lyis, ehnyet ma tap las nyang kuot ya kuot zis dvnganh nyamoq dah yhensain lhyi loh tsain taiq kyoh.

³²Hauh thang lhyi nyah yhensain nyang lyis khi yoeus las taiq zis gas, Ung lhung dah uhkung eh, nvng ngos lyis dung yvmvyah, nvng cap chah jyen dvnganh yah ngos lhuiq dyei goeus.

³³Ngos nvng lyis nhaiqnyen zis yah dvyhangteh, nvng nah uhkung changh lyis eq nhaiqnyen chah ma nghuot lhyeh, ge.

³⁴Nyah yhensain svsoh nhaiqyo las nyang cap chah goeu dye cap shoq thung vgyis jens loq mas kyauh toh.

³⁵Houyah dvyhangteh, namoq yuk khanghmuh nah vmang vnoeuh cu zis lyis ehnyet nhaiqlom dvnganh yah ma khyuot dyei lyis gas, maukhung mha dah ngah Uwus eq namoq lyis houyah dvyhangteh kuot das, ge.