Read Achang MATHE 19 Bible Online

MATHE 19 - Achang bible

MATHE 19

¹Gvshih Yesu haih dang dye taiq lyis, nyang Galile mau masyah toq las Yodan lvng thyitvp, Yuda wuxom mha jweh loh.

²Moqjens zainsmuh nyah thang mha chank los las, nyang houmha nyamoq lyis gis los nhang.

³Hauh uhlyis Pharishe moq nyah jyank mas los las nyang lyis shiwu zoh lyis nyei zis gas, Dvyuk yuk gas nyah yhensain nyhiq dvja ja chah shuot lyis she tyamp das zis lyi vbos lah, ge.

⁴Nyang nyamoq lyis phuk taiq zis, Cangxeih lyis yah nyah zomh lyis gvnkhanh soeu ka, vbusbih yahge vmesbih lyis gvnkhanh toh goeus yvlyis namoq ma nghap ku goh lhyeh?

⁵Hauh gvng mas vbusbih gas nyah ungwes uwus lyis toh khoq zis yah nyah yhensain nyhiq yah tsoq las, nyah zomh gas gungsshoh dvkoeuq kyingh duot das, ge.

⁶Housoeh yvmvyah nyah zomh gas aiq yuk ma nghuot, gungsshoh dvkoeuq dvnghuot lo. Housoeh Mangso tsomp toh yvlyis dius yah ma kangh bas jungh, ge.

⁷Nyamoq nyang lyis taiq zis gas, Housoeh lyis gas, kangh maussauh lhaih dyei las nyang lyis yoh nhang kat, ge Moshe chamus tying toh au lhyeh, ge.

⁸Nyang nyamoq lyis taiq zis gas, Namoq nhaiqlom tsain than yvmvyah, namoq dah yhensain nyhiq jens lyis tsain she tyamp das xiklyis Moshe vmingh dyei zis nghuot. Nghuot laus eq cangxeih gas heisoeh ma nghuot.

⁹Ngos namoq lyis taiq bah, yauxi cho mhayah lai las, vsainnyang dah yhensain nyhiq lyis she tyamp las gohtoeu nyihwank yoeus soeu hank laus eq nyi shuot soeu nghuot, ge.

¹⁰Nyah changlo jens nyang lyis taiq zis gas, Nyi lvng dah cho heisoeh nghuot lyis gas, nyi yoeus, yhenloh ma kuot lyis gis, ge.

¹¹Nghuot laus eq nyang nyamoq lyis phuk taiq zis gas, Hai jyauh cho lhyi dius dvnganhmoq yah ma yoh lhom yoeus: hauh zis dyei toh zis xauh bang kyingh dvyoh lhom yoeus.

¹²Khasoeh ge lyis dius dvyhamh gas, nyah ungwes ung mhayah khoeu los lyis yah yukgis ma dyeh bang bos. Dvyhamh gas dius yah shan toh. Dvyhamh gas maukhung munghdan xiklyis nyi ma yoeus yhen ma loh bang eq bos. Yoh lhom yoeus soeu ka lhom yoeus bas jungh, ge.

¹³Hauh thang lhyi loshang jens thoq mas loq kih las shvmanh dung dyei bas jungh ge, nyamoq lyis nyah jyank mas shwih lyih uhlyis, changlo jens gas nyamoq lyis nyho.

¹⁴Nghuot laus eq Yesu taiq zis gas, Loshang jens ngah jyank mas los nhang geh, nyamoq lyis vtomp toh goh: khasoeh ge lyis maukhung munghdan gas housoeh teh bang xiklyis nghuot, ge.

¹⁵Housoeh nyang nyamoq thoq mas loq kih dyei lho lha, hou mhayah toq loh.

¹⁶Yoeuh aq, dius dvyuk nyah jyank mas los las, Svra eh, ngos vcaiq vto kang yoh das xiklyis gis zis cha kuot chah lah, ge.

¹⁷Nyang taiq zis gas, Nvng ngos lyis gis cho yah sen lha chamus nyei? Gis soeu dvyuk kyingh dvbos. Nvng kang o mes lyis gas tyingtoh dang lyis chank aq, ge.

¹⁸Nyang, Yesu lyis taiq zis gas, Lyi kha koeuq nghuot lah, ge. Yesu phuk taiq zis gas, Dius vsat, nyi vshuot, vkhauh, ma ying kanghjyoeng vkat;

¹⁹Nah ungwes uwus lyis phauh nyang aq, nah yhenkyoh lyis nvnyang gungs lyis teh yoh jyetdap das, ge.

²⁰Hauh loyvm phoq nyang lyis taiq zis gas, Hauh goeu dvnganh yvlyis ngos loyvm yoq lyis yah chank kuot goeus: ngos cha chah shih lah, ge.

²¹Yesu nyang lyis taiq zis gas, Nvng dyinghjet mes lyis gas, Loh aq, nvng yoh zis ungh las nyungs bang lyis dyei tyamp aq, housoeh lyis nvng maukhung mha zisyos yoh das. Housoeh las ngah thang mha chank los aq, ge.

²²Nghuot laus eq hau loyvm phoq hauh dang xauhgyo lyis nhaiqkuk zis yah loh lo: Khasoeh ge lyis nyang gas zisyos nyoshoq yoh soeu nghuot.

²³Housoeh las Yesu nyah changlo jens lyis taiq zis gas, Ngos namoq lyis jyoengh taiq bah, dis soeu ka maukhung munghdan mas svsoh wvng yau.

²⁴Ngos namoq lyis taiq shih bah, Dis soeu dvyuk Mangso munghdan mas yoh wvng das thoq lyis gas, nghvpnho mha gola-u wvng das zis zes lwis, ge.

²⁵Nyah changlo jens hauh zis xauhgyo lyis nyamoq svsoh mauh las, Housoeh lyis gas khyuot yoeus zis hank xauh das lah, ge.

²⁶Nghuot laus eq Yesu nyamoq lyis yoeuh lho lha taiq zis gas, Haih zis gas dius yah gas ma yoh bweh, nghuot laus eq Mangso ka dvnganh zis lyis yoh bweh nhang, ge.

²⁷Petru nyang lyis phuk taiq zis gas, Yoeuh aq, ngamoq dvnganh yah toh khoq las nah thang mha chank los goeus. Housoeh las ngamoq cha xauh yoeus das lah, ge.

²⁸Yesu nyang lyis taiq zis gas, Ngos namoq lyis jyoengh taiq bah, Cangsoeu Lo gas nyah phunk yah hwankti tank mas tsung dah dius caiq vsaiq mas namoq ngah thang mha chank bang eq, hwankti tank dvci aiq lom mas tsung lha Israel dvci aiq nyau lyis soetuon das, ge.

²⁹Ngah nyings gvng mas yhen, vmang vnoeuh, nhamhmuh, ungwes, uwus, yhensain nyhiq, lo jens, maunyeis lyis tyamp soeu hank laus eq vkyuh dvxo huon xauh yoeus las, vcaiq vto kang vso vlho xauh kham yoeus das.

³⁰Nghuot laus eq cangxeih bang nyoshoq gas thang thank nghuot das. Thang thank bang cangxeih nghuot das, ge.