Read Achang MATHE 2 Bible Online

MATHE 2 - Achang bible

MATHE 2

¹Gvshih hwankti Herod zaih lyis, Yuda mau Betlehem mas Yesu khoeu los lyis yoeuh aq, joeui bos bang buisthuq shot pheh yah Yerusalem mas jweh los las,

²Khoeu los dah Yuda Hwankti ka khamha nyeis lah? Buisthuq shot pheh nyah kyi lhyi ngamoq nyvng yvmvyah nyang lyis paiq das xiklyis ngamoq jweh los, ge.

³Hwankti Herod hauh dang xauhgyo lyis, nyang yahge Yerusalem mas bang dvnganhmoq chiq las,

⁴nyang gas nyamoq mas dah phudyei uhjyung jens yahge maussauh lhaih bang lyis tsainh toh las, Khristu khamha khoeu das zis lyis nyei.

⁵Nyamoq taiq zis gas, Nyang lyis Yuda mau, Betlehem wugungs mas khoeu das: khasoeh ge lyis lvpe lhaihtoh zis gas,

⁶Yuda mau Betlehem nvng gas, Yuda zau jens mas ngis thank soeu ma nghuot; Ngah vnyau Israel dius lyis shwih guon das zau gas, Nvng masyah thuq los das, ge.

⁷Hauh uhlyis Herod gas, joeui bos bang lyis tsoek yah gauh khi yoeus las, hau kyi thuq los dah shishenh lyis jyuk-yang nyei gyo las,

⁸nyang nyamoq lyis Betlehem mas nhang lha taiq zis gas, Namoq loshang lhyi jyuk-yang loh nyei xo lha, nyang lyis nyvng lho lhyi, ngos eq nyang lyis yoh paiq bas jungh, ngos lyis los taiq kyoh geh, ge.

⁹Hwankti phoq dah dang lyis xauhgyo las, nyamoq thuq loh lyis, nyamoq buisthuq shot pheh nyvng kat dah kyi ka, loshang nyeis dah vtoeu mha loh no joq shoq nyamoq dah xik mas loh nyeis.

¹⁰Hauh kyi lhyi tsain nyvng lyis, nyamoq svsoh gaus.

¹¹Hauh yhen mha tsain wvng loh lyis, loshang yahge nyah ungwes Mari lyis nyvng las, nyamoq phvluk zomhgyuis las nyang lyis paiq. Nyamoq dah zisyos phank las nyang lyis xing, loban yahge mura jyungshuk tsain dyei.

¹²Nyamoq Herod jyank mas ma tauh loh das xiklyis yhetmoq mas thuq xoeuq las zaih nhang zis xauh yvmvyah, nyamoq gas nyamoq nyang mau pheh gohcho yah tauh loh.

¹³Gvshih nyamoq loh khoq thang lhyi,YHENSAINdah loeuswons soeu ka, Yosep lyis yhetmoq mas thuq xoeuq las taiq zis gas, Toq aq, Loshang yahge nyah ungwes lyis shwih las Egutu pheh cangh aq, ngos nvng lyis doms khi shishenh jweh shoq houmha nyeis aq: khasoeh ge lyis Herod gas loshang lhyi mhont das zis xo das, ge.

¹⁴Housoeh nyang toq las nyenh lyis hauh loshang yahge nyah ungwes lyis shwih las Egutu pheh e.

¹⁵Herod shei buisnyeis jweh shoq houmha nyeis. Hauh zis gas, Ngos ngah Lo lyis Egutu masyah khi yoeus goeus, ge lvpe dah nhuot masyah Yhensain taiq dah dang gas nyuk los bas jungh, ge bweh los.

¹⁶Herod gas hau joeui bos bang yah nyang lyis hwah khoq zis seq lyis, nhaiqlom tsoeu zis yah, joeui bos bang nyang lyis taiq toh khoq dah shishenh lyis suon yoeuh las, hauh mau mas dius nhang lha, Betlehem yahge hauh wuxom mha nyeis dah yukgis lo aiq zvn masyah o pheh bang lyis sat nhang.

¹⁷Lvpe Yeremia taiq khoq dah dang nyuk los goeus.

¹⁸Hauh zis gas, Rama mas shei uhngauh, ngausdyeis ngausnhvp yah kukxi thwe lhyi xauhgyo; Rakhel gas nyah lo jens gvng mas kuk nyingh shohthang thauh zis lyis nhaiq ma yoh taink lo: Khasoeh ge lyis nyamoq ma nyeis lo, ge.

¹⁹Gvshih Herod shei thang lhyi, yoeuh aq, Yhensain dah loeuswons soeu ka, Yosep lyis Egutu mas yhetmoq mas thuq xoeuq las taiq zis gas,

²⁰Toq aq, loshang yahge nyah ungwes lyis shwih las Israel mau mas loh aq, hauh loshang dah kang lhyi xo bang shei goeus, ge.

²¹Nyang toq las loshang yahge nyah ungwes lyis shwih las Israel mau pheh los.

²²Nghuot laus eq Akhela-u gas nyah uwus Herod gungsthaiq Yuda mau mas guon nyeis zis lyis nyang xauhgyo lyis, houmha wvng loh das zis gyuk nyeis. Hauh thoq lyis nyang lyis yhetmoq mas zaih nhang yvmvyah, Galile mau pheh loh las,

²³Nazaret ge dah wugungs dvkoeuq mas loh nyeis. Hauh zis gas, Nyang lyis Nazaret phoq ge lui das ge, lvpe jens taiq khoq dang nyuk los.