Read Achang MATHE 20 Bible Online

MATHE 20 - Achang bible

MATHE 20

¹Maukhung munghdan gas zvbiq khyam mha muh zwi uhkung lhung kat das zis nvpsangh yah thuq loh dah yhensain dvyuk yah doeusgoh.

²Hauh soeu ka dvnyeih lyis ngwis kyvp dvkoeuq dyei das xiklyis tsain xam woengh goh las uhkung jens lyis zvbiq khyam mha nhang kat.

³Gau shishenh ko lhyi nyang thuq e lhyi kaih jang mas gohtoeu mvgon yap joq bang lyis nyvng las,

⁴nyamoq lyis taiq zis gas, Namoq eq zvbiq khyam mha tsain e geh, phauh mon yih nyhoq ngos namoq lyis dyei das, ge lho lhyi nyamoq e loh.

⁵Tsai nyang dvci aiq shishenh yahge somh shishenh lyis doms thuq e lha houyah dvyhangteh kuot.

⁶Oeng shishenh lyis doms thuq e lyis eq, gohtoeu mvgon yap joq bang lyis nyvng las, Namoq dvbuis yah heimha mvgon chamus yap joq goh, ge nyamoq lyis taiq.

⁷Nyamoq gas nyang lyis, Ngamoq lyis hank ma lhung yvmvyah nghuot ge lho lhyi, nyang nyamoq lyis taiq zis gas, Namoq eq zvbiq khyam mha tsain e geh, ge.

⁸Nyenhthang jweh lyis, zvbiq khyam sain ka, muh zwi bang lyis khi los aq, thang thank wvng soeu masyah cangxeih wvng soeu jweh shoq uhkung phauh khaih aq, ge nyah ziszom lyis taiq toh.

⁹Hauh uhlyis oeng shishenh lyis lhung zis xauh bang los las, ngwis dvyuk dvkyvp tsain xauh yoeus.

¹⁰Nghuot laus eq cangxeih wvng bang los las, nyamoq zes xauh yoeus das ge nghamh laus eq, dvyuk dvkyvp kyingh dvtsain xauh yoeus.

¹¹nyamoq tsain xauh yoeus dah thang lhyi nyamoq gas, yhensain lhyi lop zoh lyis yah taiq zis gas,

¹²Hai thang thank wvng bang gas dvshishenh kyingh dvkung, nghuot laus eq khvnyhik dvnyeih yah wons wuq las buis gywes zis kham bang, ngamoq lyis nvng, nyamoq yah dvyhangteh kuot nyvng! ge.

¹³Nghuot laus eq nyang nyamoq mas dvyuk lyis phuk taiq zis gas, Buisnoms phoq eh, ngos nvng lyis ma kuot cu. Ngwis dvkyvp khyoq toh zis lyis nvng gyo goeus ma nghuot lhyeh?

¹⁴Nah zis yoeus las loh aq; thang thank wvng bang lyis nvng yah dvyih dyei das zis ngos o.

¹⁵Ngah vyhang lhyi ngos o khyvlyis kuot das zis, lyi ma bos lhyeh? Ngos gis yvmvyah nah nyoq yoeuh zoeu vnghuot lah?

¹⁶Housoeh yvmvyah thang thank soeu ka xik pheh nghuot los das, cangxeih soeu ka thang thank nghuot los das, ge.

¹⁷Yesu gas nyah changlo jens dvci aiq yuk lyis shwih las Yerusalem pheh doq loh nyeis uhlyis cho mha nyamoq lyis lhyenwhei taiq zis gas,

¹⁸Yoeuh aq, yang Yerusalem pheh doq loh nyeis: Cangsoeu Lo gas phudyei uhjyung jens yahge maussauh lhaih bang loq mas kyauh tyamp las, nyamoq gas nyang lyis shei das cho dang thang thyet das zis yahge,

¹⁹Nyang lyis jwangh, lyuk las tapzains mas taplhangh tyamp das xiklyis gohnyau bang lyis kyauh tyamp das. Somh vnyeih lyis dwis toq kat zis xauh das, ge.

²⁰Hauh thang lhyi Zebedi lotang ungwes gas Yesu jyank mas nyah lotang yah dvgeh e dupaiq lho lha nyang lyis dvja sang.

²¹Nyang gas, Cha o mes lah, ge nyei. Hau vmesbih taiq zis gas, Nah munghdan mas ngah lotang lhyi nah loqwi pheh dvyuk, loqyos pheh dvyuk tsung nhang aq, ge.

²²Nghuot laus eq Yesu gas, Namoq cha dung zis lyis namoq nyang ma seq. Ngos shuk das kom lhyi namoq yoh shuk goh das lhyeh, ge lyis, nyamoq gas, Ngamoq yoh kuot, ge.

²³Nyang nyamoq lyis taiq zis gas, Ngah kom lhyi namoq shuk nyang shuk chah das. Nghuot laus eq ngah loqwi loqyos mas yoh tsung das dah vmingh ngos ma yoh dyei. Houka ngah Uwus sont toh dyei bang xiklyis dvnghuot, ge.

²⁴Hauh zis dvci yuk moq xauhgyo lyis nyamoq gas hau vmang vnoeuh aiq yuk lyis nhaiq tsain yo.

²⁵Nghuot laus eq Yesu nyamoq lyis khi yoeus las taiq zis gas, Gohnyau bang lyis guon bang gas nyamoq thoq mas zau las, vmingh yoh bang eq nyamoq thoq mas vmingh tsain bos yvlyis namoq seq.

²⁶Nghuot laus eq namoq gas housoeh ma nghuot das. Namoq vzainsmuh kuot mes soeu hank laus eq namoq dah jyeidwis duot chah.

²⁷Namoq mas uhjyung duot mes soeu hank laus eq namoq dah jyeidwis duot bas jungh.

²⁸Cangsoeu Lo gas, phuqsoe kham das xiklyis jweh los zis ma nghuot. Phuqsoe das zis yahge, nyoshoq lyis khyuot yoeus das xiklyis nyah kang dyei das zis dvjweh los, ge.

²⁹Yerikho masyah nyamoq thuq los lyis, moqjens zainsmuh nyah thang mha tsain chank los.

³⁰Hauh uhlyis nyoqjet aiq yuk choyvm mas tsung toh zis, Yesu lai loh sam gyo lyis nyah aiq yuk kaiq zis gas, Dawi dah Lo Yhensain eh, ngah aiq yuk lyis nhaiqnyen aq, ge.

³¹Moqjens gas nyah aiq yuk lyis samlo nyeis bas jungh ge nyho laus eq, nyah aiq yuk gas zes kaiq las, Dawi dah Lo Yhensain eh, ngah aiq yuk lyis nhaiqnyen aq, ge.

³²Yesu yap las nyah aiq yuk lyis khi yoeus lho lha taiq zis gas, Ngos nah aiq yuk lyis cha kuot dyei das zis o goh lah, ge.

³³Nyah aiq yuk gas, Yhensain eh, ngah aiq yuk dah nyoqjeih phank dyei das zis o, tsain ge.

³⁴Housoeh las Yesu gas nyah aiq yuk lyis nhaiqnyen las nyoqjeih mas tanh dyei. Houjang yah nyah aiq yuk dah nyoq nyvng los las nyah thang mha tsain chank loh.