Read Achang MATHE 21 Bible Online

MATHE 21 - Achang bible

MATHE 21

¹Nyamoq gas Yerusalem mas jweh ni los las, Tsanlun boms khyei, Betphage wukhau mha jweh loh lyis Yesu gas changlo aiq yuk lyis nhang lha taiq kat zis gas,

²Nah aiq yuk xik mas dah wukhau mha wvng loh geh. Houjang houmha twih toh dah mauhlyihzoe zains yahge mauhlyihzoe lo lyis nah aiq yuk nyvng das. Hauh yvlyis ngah jyank mas phui she los geh.

³Dvyuk yuk nah aiq yuk lyis dvja ja taiq lyis gas, Yhensain hauh yvlyis yhung chah ge, oen nyamoq lyis taiq geh. Houjang nyang hauh yvlyis tsain nhang kat das.

⁴Hau dvnganh gas lvpe dah dang nyuk los das xiklyis bweh los zis nghuot.

⁵Houka: Zion lonyi lyis heisoeh oen taiq aq: Yoeuh aq, nah Hwankti ka noeuh nhamp dah nhaiqlom yah mauhlyihzoe thoq mas, Nghuot goeus mauhlyihzoe zains dah lo mauhlyihzoe lo thoq mas ji las, Nah jyank mas jweh los, ge.

⁶Hauh changlo tang ka Yesu nyah aiq yuk lyis tying kat vgus loh kuot las,

⁷Mauhlyihzoe zains yahge mauhlyihzoe lo tsain she los las, nyamoq dah dyimis nyhoeuh dyei lho lha nyang hauh thoq mas ji.

⁸Moqjens zainsmuh gas nyamoq dah dyi yah cho mha tsain nyhoeuh dyei. Dvyhamh gas saiqzains mas dah saiqko zan las cho mha nyhoeuh dyei.

⁹Nyah xik pheh thang pheh chank bang moqjens gas kaiq las, Dawi dah Lo lyis chungh goh! (Hosana!) Yhensain dah nyings mas jweh los soeu ka ngelhoq. Nyhang thank Mangso lhyi chungh goh, ge.

¹⁰Gvshih Yerusalem mas wvng loh lyis dvwus gonh hoeu lha, Haih soeu ka hank nghuot lah, ge.

¹¹Moqjens gas, Haih soeu ka Galile mau, Nazaret wukhau mha dah Yesu ge dah lvpe nghuot, tsain ge.

¹²Hauh thang lhyi Yesu gas Mangso dah yhenmuh mas wvng loh las hauh yhenmuh khau mha ungh bang wis bang dvnganhmoq lyis khat thuq las, ngwis thaiq bang dah kihgus yahge khotjyauh ungh bang dah tank lyis toeu phanh tyamp.

¹³Ngah yhen lhyi shvmanh dung yhen oen das, ge lhaih toh goeus lyis eq, namoq gas haih yvlyis khyanktau khyung tsain kuot nyvng! ge taiq.

¹⁴Yhenmuh khau mha, nyah jyank mas lyih dah nyoqjet bang yahge khyei dyoq bang lyis nyang gis los nhang.

¹⁵Nghuot laus eq phudyei uhjyung jens yahge maussauh lhaih bang gas, nyang kuot dah mauhphoh zis yahge yhenmuh khau mha, Dawi dah Lo lyis chungh goh, ge tsain kaiq nyeis dah loshang jens lyis nyvng lyis nhaiq tsain yo.

¹⁶Nyamoq cha taiq yvlyis nvng vxauhgyo lah, ge nyang lyis taiq lho lhyi, Yesu taiq zis gas, Xauhgyo. Lonoeuh yahge loshang jens dah nhuot masyah dyinghjet dah Chungh Dang thuq los das, ge yvlyis namoq khanhamp eq ma nghap yoeuh ku goh lhyeh, ge.

¹⁷Nyang gas nyamoq lyis nyhei toh khoq las wus nghe pheh thuq las Bethani mas loh yhet khoq.

¹⁸Nungs lyis nvpyo noq yah, nyang hauh wugungs mas tauh los lyis, nyang wom yuot.

¹⁹Choyvm mas maiphang dvzains nyvng las nyang e lhyi cha eq ma dap, vhuq kyingh dvnghuot las, nyang gas hauh saiqzains lyis, Gvshih masyah nvng mas khanhamp eq shih ma shih lo bas jungh, ge lho lhyi, maiphang zains gas houjang yah kyuk loh.

²⁰Changlo jens hauh yvlyis nyvng lho lhyi, nyamoq svsoh mauh las taiq zis gas, Haih maiphang zains houjang yah chamus kyuk tyamp, ge.

²¹Yesu nyamoq lyis phuk taiq zis gas, Ngos namoq lyis jyoengh taiq bah, namoq lomsjingh ehnyet bos las khamkhvv zis ma bos nghuot lyis gas, haih maiphang zains mas bweh thoq lyis namoq yoh tsain kuot das zis yahge haih boms lyis eq ywi las thomh mas cheh wvng aq, ge lyis, namoq taiq vgus bweh das.

²²Hauh thoq lyis namoq lomsjingh ehnyet yah shvmanh dung zis dvnganh yah namoq xauh yoeus das, ge.

²³Nyang yhenmuh khau mha wvng loh las jyauh nyeis lyis, phudyei uhjyung jens yahge dius jens dah logis jens nyah jyank mas los nyei zis gas, Nvng gas chah vmingh yah haih zis tsain kuot lah? Nvng lyis haih vmingh hank dyei, ge.

²⁴Yesu nyamoq lyis phuk taiq zis gas, Ngos eq namoq lyis dvja nyei yoeuh bah, namoq eq hauh zis lyis taiq kyoh lyis gas, ngos chah vmingh yah heinyhoq zis kuot yvlyis ngos namoq lyis taiq kyoh das.

²⁵Yohan dah jeisnyhop cho ka maukhung mhayah nghuot lah? Dius masyah nghuot lah, ge. Nyamoq nyang changh tsain xamgoh zis gas, Yang, Maukhung mhayah nghuot oen ya, Housoeh lyis namoq nyang lyis chamus ma lomsjingh goh, ge das.

²⁶Dius masyah nghuot oen yang taiq lyis gas, yang moqjens lyis gyuk: khasoeh ge lyis Yohan gas lvpe nghuot zis lyis dvnganhmoq jingh, ge.

²⁷Housoeh las nyamoq Yesu lyis taiq zis gas, Ngamoq ma seq, ge. Nyang nyamoq lyis taiq zis gas, Ngos haih muh chah vmingh yah kuot zis namoq lyis ma taiq kyoh das, ge.

²⁸Namoq khasoeh nghamh goh lah? Dius dvyuk gas lo aiq yuk yoh. Nyang gas lomons jyank mas e lha, Nauh mons eh, khvnyhik zvbiq khyam mha e zwi aq, ge lyis,

²⁹Nyang gas, Ngos ma e, ge laus eq thang lhyi nyang ehnyet thaiq las e goeus.

³⁰Tsai, nyang ngis vyuk jyank mas e lha vgus housoeh taiq lyis, Ngos e das ge las ma e.

³¹Hau aiq yuk mas nyah uwus o mes zis khayuk kuot, ge. Nyamoq taiq zis gas, Lomons nghuot, ge. Yesu nyamoq lyis taiq zis gas, Ngos namoq lyis jyoengh taiq bah, khoengh khywi bang yahge nghe nyhiq jens gas namoq dah xik pheh Mangso munghdan mas wvng loh.

³²Khasoeh ge lyis Yohan gas dan cho lhyi chank las namoq jyank mas los laus eq namoq gas nyang lyis ma tsain jingh. Nghuot laus eq khoengh khywi bang yahge nghe nyhiq jens gas nyang lyis jingh. Namoq hauh zis lyis nyvng laus eq nyang lyis jingh das xiklyis namoq ehnyet ma tsain thaiq.

³³Gohtoeu dah dangtoeuq lyis gyo yoeus shih geh: Yhensain dvyuk gas zvbiq dvkhyam ba tsungh toh lho lha, yvmlhaink yah khyam kyamp las zvbiq nyhet zwvng eq doeu toh. Tyoeuq zvm eq thung lho lha khyam muh zwi bang lyis tsoeuh dyei khoq las nyang we mau pheh loh.

³⁴Vshih nyhink nyos jweh lyis houmha dah vshih xauh yoeus das xiklyis nyah jyeidwis jens lyis khyam tsoeuh zwi bang jyank mas nhang kat.

³⁵Khyam zwi bang gas nyah jyeidwis jens lyis nyhik las, dvyuk lyis bat, dvyuk lyis sat, gohtoeu dvyuk lyis lukzains yah tsain doeuh.

³⁶Tsai, nyang gas xik pheh thoq lyis nyo dah gohtoeu jyeidwis jens lyis doms nhang kat lyis eq, nyamoq gas xikpheh yhangteh nyamoq lyis kuot.

³⁷Thang thank lyis, nyah lo lyis gas nyamoq phauh nyang das ge, nyamoq jyank mas nyah lo lyis nhang kat.

³⁸Nghuot laus eq khyam zwi bang hauh lo lyis nyvng lyis, Haih soeu ka yhenzis zom das soeu nghuot. Los geh, nyang lyis sat las, nyah yhenzis yang yoeus goh, ge nyamoq nyang changh tsain taiq goh.

³⁹Nyamoq gas nyang lyis nyhik las, zvbiq khyam nghe pheh she thuq las sat.

⁴⁰Housoeh las zvbiq khyam sain doms los lyis haih khyam tsoeuh zwi bang lyis khasoeh kuot das lah, ge nyei.

⁴¹Nyamoq taiq zis gas, Hau lhung bang lyis gas ma gis khyvlyis nyang mhont das las, shishenh jweh lyis, nyang lyis vshih yoh dyei bang, gohyuk lyis hauh khyam cheh tsoeuh toh das, ge.

⁴²Yesu nyamoq lyis taiq zis gas, Yhen tsuk bang khyen tyamp dah luklom gas, Yhenthunk lukzains bweh los. Haih zis gas Yhensain nyang kuot las, yah xikkhonh mas mauhphoh zis nghuot, ge dah lhaihtoh dang lyis khanhamp eq ma nghap yoeuh goh lhyeh, ge.

⁴³Housoeh las ngos namoq lyis taiq bah, Mangso munghdan gas namoq jyank masyah yoeus las hauh dah vshih yoh dyei bang lyis dyei das.

⁴⁴Haih lukzains thoq mas gyoh soeu hank laus eq dyis tyamp das. Hank thoq mas laus eq hauh zis gyoh lyis gas, phih soeh nhoeuq tyamp das.[6]

⁴⁵Hauh dangtoeuq lyis phudyei uhjyung jens yahge Pharishe moq xauhgyo lyis, nyang nyamoq lyis toeuq las taiq yvlyis nyamoq seq.

⁴⁶Nyang lyis nyhik das zis yomkat laus eq, moqjens lyis nyamoq gyuk: khasoeh ge lyis, nyang gas lvpe nghuot zis lyis nyamoq jingh.