Read Achang MATHE 22 Bible Online

MATHE 22 - Achang bible

MATHE 22

¹Yesu nyamoq lyis dangtoeuq yah phuk taiq zis gas,

²Maukhung munghdan gas nyah lo xiklyis nyihwank pwe kuot dyei dah hwankti dvyuk yah doeusgoh.

³Hauh nyihwank pwe mha khi toh bang lyis nyah jyeidwis jens lyis yah khi nhang kat lyis, nyamoq ma los.

⁴Nyang gohtoeu jyeidwis jens lyis doms nhang lha taiq zis gas, Ngah nyenhcon ba sont toh goeus. Noeu eq, nyhuk toh dah gaunyhauq eq sat goeus: dvnganh yah cicont nghuot goeus, nyihwank pwe mha dvlyih lo geh, ge kat.

⁵Nghuot laus eq nyamoq hauh yvlyis pvlhyahlyoeus kuot las nyamoq nyang cho pheh tsain loh. Dvyuk gas nyah danh pheh, gohtoeu dvyuk gas soenghi kuot loh.

⁶Nyeis shih dah bang gas, nyah jyeidwis jens lyis nyhik yoeus las xoq lhoeu phuh zis yah sat.

⁷Hwankti hauh zis xauhgyo lyis nhaiqyo las jeslo jens nhang lha dius sat bang lyis mhont nhang. Nyamoq dah wugungs lyis eq ngheq.

⁸Hauh thang lhyi nyang nyah jyeidwis jens lyis taiq zis gas, Ngah nyihwank pwe cicont nghuot goeus, nghuot laus eq khi toh bang gas ma mon.

⁹Housoeh yvmvyah namoq talhoeu chokangh mas loh las nyvng ya nyvng nyhoq pwe mha tsain khi los geh, ge.

¹⁰Jyeidwis jens talhoeu mha tsain thuq e lha, gis lyis gang lyis nyamoq nyvng ya nyvng bang dvnganh lyis yoh khi tsainh toh goeus las, hauh nyihwank pwe mha boenghwus dyingh nhoenk joq.

¹¹Hwankti ka boenghwus yoeuh das ge wvng los lyis, houmha pwe dyi ma wuot soeu dvyuk lyis nyvng.

¹²Housoeh las nyang gas, Buisnoms phoq eh, nvng nyi hwank pwe dyimis ma wuot zis heimha khasoeh los lah, ge nyei lyis nyang cha ma daq taiq lo.

¹³Hwankti nyah jyeidwis jens lyis taiq zis gas, Nyang lyis khyei mha loq mas twih las shwih loh zis yah, ngausdyeis ngausnhvp yah zwis khih chap loh dah nghe pheh, mauchuotdwang mas khyoq kat geh.

¹⁴Khi zis xauh bang nyo laus eq khyen yoeus zis xauh bang nain, ge.

¹⁵Hauh thang lhyi Pharishe moq thuq los las nyang taiq dang mas thangzoe khasoeh kuot las yoh xo das zis xamgoh nyeis.

¹⁶Hauh uhlyis nyamoq gas, nyamoq dah changlo jens yahge Herodia moq lyis Yesu jyank mas nhang kat las, Svra eh, nvng gas jyoeng nyeis zis yahge, hank lyis eq nyoqnho ma khyen, dvnganhmoq lyis Mangso dah cho jyoeng khyvlyis jyauh las hank nyoqnho lhyi eq ma yoeuh, hank lyis eq gungsyaus ma yaus yvlyis ngamoq seq.

¹⁷Housoeh yvmvyah nvng khasoeh nghamh zis ngamoq lyis taiq aq, hwankti Kesar lyis khoengh kat das zis, lyi bos lah, ma bos lah, ge.

¹⁸Nghuot laus eq Yesu gas nyamoq dah lhung ehnyet lyis seq las taiq zis gas, Gis guons kuot bang eh, namoq ngos lyis chamus shi yoeuh goh lah?

¹⁹Ngos lyis hau ngwis chixoeuq geh, ge taiq lyis, nyamoq gas ngwis dvkyvp nyah jyank mas chi los dyei.

²⁰Housoeh las nyang nyamoq lyis doms taiq zis gas, Haih zis hank gungslho yahge maussauh dap lah, ge.

²¹Nyamoq gas nyang lyis, Kesar zis nghuot, ge. Hauh uhlyis nyang gas, Kesar zis nghuot lyis gas Kesar lyis dyei geh, Mangso zis nghuot lyis gas Mangso lhyi dyei geh, ge.

²²Nyamoq hauh dang lyis xauhgyo lyis mauh las, nyang lyis toh khoq las tsain thuq loh.

²³Dwis toq cho ma bos ge dah Saduke moq gas, hauh nyeihyo nyang, nyah jyank mas los nyei zis gas,

²⁴Svra eh, nyihwank goeus dah yukgis dvyuk loshang ma bos shei khoq lyis nyah yhensain nyhiq lyis nyah vnoeuh shoeuh las nyah vmang dah vshih tsoq bas jungh, ge Moshe taiq.

²⁵Gvshih heisoeh teh vmang vnoeuh nyhet yuk ngamoq yah dvgeh nghuot. Cangxeih vyuk nyihwank las loshang ma bos shih lyis shei khoq las, vnoeuh gas chauhmuh shoeuh.

²⁶Hau aiq vyuk eq, somh vyuk eq, vnoeuh moq nyhet yuk jweh shoq hauh vmesbih lyis tsain shoeuh.

²⁷Thang thank lyis hauh vmesbih eq shei loh.

²⁸Housoeh las dwis toq los uhlyis hauh vmesbih gas nyhet yuk gonh mas khayuk dah yhensain nyhiq nghuot das lah? Khasoeh ge lyis nyang gas nyamoq dvnganhmoq yah phoengh wvng goeus, ge.

²⁹Yesu nyamoq lyis phuk taiq zis gas, Namoq lhaihtoh dang lyis ma seq, Mangso dah yomsoq cho lhyi eq ma seq yvmvyah shuot zis nghuot.

³⁰Khasoeh ge lyis, dwis toq los yvmas, nyamoq nyi hwank zis ma bos, lonyi dyeizo zis eq ma bos, maukhung mha loeuswons bang teh dvnghuot lo.

³¹Nghuot laus eq shei masyah dwis toq cho, Mangso namoq lyis taiq zis lyis namoq ma nghap yoeuh goh lhyeh?

³²Nyang taiq zis gas, Ngos gas Abraham dah Mangso, Isak dah Mangso, Yakop dah Mangso nghuot: Mangso ka shei bang dah Mangso ma nghuot, dwis bang dah Mangso dvnghuot, ge.

³³Moqjens hauh zis lyis xauhgyo lyis nyang jyauh dah cho gvng mas mauh.

³⁴Saduke moq dah dang lyis taiq nhoeuh zis Pharishe moq xauhgyo lyis, nyamoq zain los las,

³⁵Nyamoq mas lyi svra nghuot soeu dvyuk, nyang lyis shi yoeuh zoh lyis yah taiq zis gas,

³⁶Svra eh, lyi mas dah tyingtoh dang mas khah zis zes kuh lah, ge.

³⁷Yesu nyang lyis taiq zis gas, Hau nah Yhensain Mangso lhyi nah nhaiqlom dvnganh yah, nah ehnyet dvnganh yah, nvng dolhain zis dvnganh yah nvng jyetdap chah, ge.

³⁸Haih zis gas cangxeih dah dang yahge tyingtoh dang zainsmuh nghuot.

³⁹Aiq vkhonh eq hauh zis yah doeusgoh las, Nah yhenkyoh lyis nah gungs yah dvyhangteh jyetdap chah, ge zis nghuot.’

⁴⁰Haih tyingtoh dang aiq khonh gas, Moshe dah lyi yahge lvpe jens dah dang dvnganh dah vpom nghuot.

⁴¹Pharishe moq dvgeh huom toh yvmas Yesu nyamoq lyis nyei zis gas,

⁴²Khristu dah cho lhyi namoq khasoeh tsain nghamh goh lah? Nyang hank dah lo nghuot lah, ge. Nyamoq, nyang lyis taiq zis gas, Dawi dah lo nghuot, ge.

⁴³Nyang nyamoq lyis taiq zis gas, Housoeh lyis Dawi gas dyos kat dyei zis xauh las nyang lyis Yhensain ge lui las,

⁴⁴Hauh Yhensain ngah Yhensain lhyi taiq zis gas, Ngos nah jeswus lyis nah khyei o mha toh shoq, Nvng ngah loqyos shot pheh tsung toh aq, ge.

⁴⁵Housoeh Dawi gas nyang lyis, Yhensain ge lui lyis, nyah lo khasoeh yoh nghuot das lah, ge.

⁴⁶Housoeh las hauh nyeihyo masyah nyang lyis dang dvkhonh yangh hank ma yoh toeuh lo. Nyang lyis dang hank ma womh nyei lo.