Read Achang MATHE 24 Bible Online

MATHE 24 - Achang bible

MATHE 24

¹Yesu hau yhenmuh masyah thuq loh nyeis lyis, nyah changlo jens gas hau yhenmuh mas dah yhen lhyi tuonh shet das ge nyah jyank mas los.

²Yesu nyamoq lyis taiq zis gas, Hai dvnganh yvlyis namoq nyvng ma nghuot lhyeh? Ngos namoq lyis jyoengh taiq bah, hauh goeu gas ma thyoq thyoq luk dvlom thoq mas dvlom kih toh zis ma bos lo das, ge.

³Nyang Tsanlun boms thoq mas tsung toh lyis, nyah changlo jens nyang lyis lhyenwhei los nyei zis gas, Hounyhoq zis gas khanhamp nghuot los das lah? Nvng doms jweh das zis yahge mungkvn thank das lyis chah vlho thuq los das lah? Ngamoq lyis taiq kyoh aq, ge.

⁴Yesu nyamoq lyis phuk taiq zis gas, Namoq lyis hank eq chowhang ma shwih whang bas jungh, zaih geh.

⁵Khasoeh ge lyis, nyoshoq moq ngah nyings masyah thuq los das. Ngos gas Khristu nghuot ge, nyoshoq lyis chowhang shwih whang das.

⁶Moeng zan goh zis yahge moeng dyoq dah loeus namoq xauhgyo los das. Nghuot laus eq vdvn goh: Khasoeh ge lyis hauh goeu gas bweh los das. Nghuot laus eq thang thank gas ma nghuot shih.

⁷Khasoeh ge lyis dius dvnyau yah dvnyau, munghdan dvkoeuq yah dvkoeuq jes sont goh los das. Joqyos vdeh deh mas panghkhauq gyoh zis yahge maunyeis dwis zis bweh los das.

⁸Hau dvnganh gas lo khoeu nos nos xi zis dvnghuot shih.

⁹Nyamoq gas namoq lyis shanghsenh zis xauh nhang das yvmas kyauh tyamp las, sat das. Ngah nyings gvng mas dius nyau khanghmuh namoq lyis hoeng das.

¹⁰Hauh uhlyis dius nyoshoq lomsjingh cho mhayah nungsdoms loh das, dvyuk yah dvyuk phanhlyen goh das, nyang changh nyang hoeng goh das.

¹¹Lvpe hwah jens eq nyoshoq thuq los las, nyoshoq lyis chowhang shwih whang das.

¹²Lyi ma chi dah muh je los das yvmvyah nyoshoq moq dah jyetdap nhaiqlom eq jam loh das.

¹³Nghuot laus eq thang thank jweh shoq jhen soeu ka khyuot yoeus zis xauh das.

¹⁴Hauh munghdan gausyis dang gas dius nyau khanghmuh xiklyis kanghjyoeng yoh bweh bas jungh, nyeisjvng thoq mas nyeis dah dius dvnganh lyis taiq hoeuh das nghuot. Hauh thang lhyi thang thank buisnyeis jweh los das.

¹⁵Housoeh yvmvyah lvpe Daniel taiq toh, lhoeu thyoq dah vchoqh vjyot zis gas hau gyingshang joqyos mas yap joq yvlyis namoq nyvng lyis, maussauh nghap soeu ka hauh yvlyis seqgyo bas jungh.

¹⁶Hauh uhlyis Yuda mau mas nyeis bang gas boms pheh phang loh bas jungh.

¹⁷Yhenkhung mha nyeis soeu ka, nyah yhen khau mha dah vyhang yoeus das zis ma gyoh los goeus jungh.

¹⁸Yos mas nyeis soeu ka nyah shanhzoe yoeus das zis ma tauh los goeus jungh.

¹⁹Hauh buisnyeis lyis loshang gungs nghuot bang yahge lonoeuh nauh gvmshuk bang gas mvtanhzoe nghuot!

²⁰Nghuot laus eq namoq phang shishenh gas Yuda No Buisnyeis yahge cungh lyis ma nghuot bas jungh, shvmanh dung nyeis geh.

²¹Khasoeh ge lyis, mauthuq nyeiszvn masyah khvnyhik jweh shoq ma bweh ku, thang pheh eq ma bweh lo das shanghsenh gas hauh buisnyeis gyo lyis bweh thuq los das.

²²Hauh buisnyeis lyis ma shungh dyei lyis gas hank eq ma yoh luiq das. Nghuot laus eq khyen yoeus bang xiklyis gas, hauh buisnyeis shungh dyei das.

²³Hauh uhlyis dvyuk yuk namoq lyis, Yoeuh aq, Khristu heimha nyeis, thyimha nyeis, ge laus eq vjingh goh.

²⁴Khasoeh ge lyis, ma ying dah Khristu jens eq, lvpe hwah jens eq thuq los las, gis bweh lyis khyen toh goeus bang lyis yangh chowhang yoh shwih whang shoq, vlho zainsmuh yahge mauh loqmuh chixoeuq das.

²⁵Yoeuh aq, ngos namoq lyis uhlhomh taiq toh.

²⁶Housoeh las nyamoq gas namoq lyis, Yoeuh geh, nyang gas mhanhdyvp mas nghuot, ge taiq laus eq namoq vloh goh. Nyang gas khau lhunk mas nyeis, ge laus eq hauh yvlyis vjingh goh.

²⁷Khasoeh ge lyis, buisthuq masyah maunyoq nyik zis buiswvng jweh shoq bvng loh zis yah dvyhangteh, hau Cangsoeu Lo doms jweh los zis gas housoeh teh nghuot das.

²⁸Mvng joq yvmas lvngda eq houmha zain los das.

²⁹Tsai, hauh shanghsenh dah buisnyeis lai loh thangjang buis eq soeng soeng noq los das. Lhamhmuh eq ma tso lo das. Kyi eq maukhung mhayah gyoh las maukhung yomsoq nonh das.

³⁰Hauh uhlyis Cangsoeu Lo dah vlho ka maukhung mha thuq los das. Houjang nyeisjvng thoq mas dah dius nyau khanghmuh gas kuk nyingh shoh thang thauh uhjyangh, hauh Cangsoeu Lo gas yomsoq yahge phunk zainsmuh yah maukhung jyommauh yah gyoh los zis lyis nyvng das.

³¹Nyah loeuswons bang lyis lvbuh thwe zainsmuh yah nhang kat las, nyamoq gas lyeis nyei shot, maukhung dvthang mhayah gohtoeu dvthang jweh shoq, nyang khyen toh bang lyis xwih tsainh das.

³²Gvshih hau maiphang zains masyah xuq yoeus geh, hauh dah vnyuk tuot las vhuq thuot los goeus ya, zvn wvng los goeus zis lyis namoq seq.

³³Houyah dvyhangteh namoq gas, hau bweh los zis dvnganh lyis nyvng lyis nyang gas khomhdwang mas ni los goeus yvlyis seq geh.

³⁴Ngos namoq lyis jyoengh taiq bah, Haih zis ma nyuk los dvchank haq caiq ma lai das.

³⁵Maukhung nyeisjvng lai loh laus eq ngah dang gas ma lai loh das.

³⁶Nghuot laus eq hauh buisnyeis yahge shishenh lyis gas hank eq ma seq. Maukhung mha dah loeuswons bang ma seq, Lo eq ma seq, Uwus kyingh dvseq.

³⁷Cangsoeu Lo doms lyih das buisnyeis gas, Noa zaih lyis bweh yhangteh nghuot los das.

³⁸Khasoeh ge lyis jeis ma nhauq shih lyis dah dius jens gas, Noa jeis sangpho khau mha wvng loh buisnyeis jweh shoq zo, shuk, nyihwank, lonyi dyeizo tsain kuot nyeis.

³⁹Jeis nhauq los las dvnganh yvlyis khyuot loh shoq nyamoq ma soh ma thamh nyeis. Houyah dvyhangteh Cangsoeu Lo jweh lyih lyis eq housoeh nghuot das.

⁴⁰Hauh uhlyis danh mas yukgis aiq yuk dvgeh nyeis mhayah dvyuk lyis shwih loh las dvyuk gas nyet joq das.

⁴¹Vmesbih aiq yuk dvgeh wom mhoq nyeis masyah dvyuk lyis shwih loh las dvyuk gas nyet joq das.

⁴²Housoeh las namoq Yhensain khah shishenh lyis lyih das zis ma seq yvmvyah, zungh nyeis geh.

⁴³Nghuot laus eq yhensain ka nyenh lyis khauh soeu wvng das shishenh lyis seq nghuot lyis gas, nyah yhen lhyi ma los yoh thyoq wvng shoq nyang zungh nyeis das zis namoq seq geh.

⁴⁴Housoeh yvmvyah namoq eq cicont kuot geh: Khasoeh ge lyis, namoq ma zangh soh dah shishenh lyis Cangsoeu Lo jweh los das.

⁴⁵Hauh thoq lyis Yhensain ka nyah yhenbang lyis shishenh jweh lyis zonoms dyei das xiklyis toeuq toh, lomluk las joeui bos dah jyeidwis gas hank nghuot lah?

⁴⁶Nyah yhensain jweh los uhlyis lomluk luk kuot nyeis yvlyis los nyvng jus dah jyeidwis gas ngelhoq.

⁴⁷Ngos namoq lyis jyoengh taiq bah, yhensain ka nyah zisyos dvnganh thoq mas guon soeu nyang lyis kuot nhang das.

⁴⁸Nghuot laus eq ma lyungs jyeidwis gas nyah ehnyet mas, Ngah yhensain los das zis nyangh shih ge nghamh zo nyeis.

⁴⁹Housoeh nyah jyeidwis changh jens lyis bat las, yhei yet bang yah dvgeh zo shuk las nyeis dah uhlyis,

⁵⁰hauh jyeidwis dah yhensain ka, nyang ma nghamh dah buisnyeis, ma soh dah shishenh lyis doms los das.

⁵¹Nyang lyis jap chink las gis guons kuot bang yah dvgeh toh das. Hauh yvmas ngausdyeis ngausnhvp yah zwis khih chap loh das.