Read Achang MATHE 25 Bible Online

MATHE 25 - Achang bible

MATHE 25

¹Maukhung munghdan gas, nyibung tsain chi lha loloeu saiq lyis zes e dah lonyi gyingh dvci yuk yah doeusgoh.

²Nyamoq mas oeng yuk gas yik, oeng yuk gas tsain koh.

³Koh bang gas nyamoq nyang dah nyibung gas chi lha coeu ka ma tsain chi.

⁴Nghuot laus eq yik bang gas nyamoq dah nyibung yah dvgeh coeu thuk tsain chi.

⁵Gvshih loloeu saiq gas sheq nyeis shih yvmvyah, nyamoq dvnganh gas yhet tsain muih joq.

⁶Gungsgvm lyis gas, Loloeu saiq jweh los goeus! Nyang lyis zes langh das zis toq geh, ge kaiq nyeis.

⁷Hauh uhlyis lonyi gyingh dvnganhmoq toq las nyamoq nyang dah nyibung lyis tsain sont.

⁸Koh bang yah yik bang lyis taiq zis gas, Namoq dah coeu ngamoq lyis dvtsiq jenh kat dyei geh: ngamoq dah nyibung shei loh nyeis, ge.

⁹Nghuot laus eq yik bang phuk taiq zis gas, Namoq xiklyis yahge ngamoq xiklyis ma tham das, ungh bang jyank mas namoq nyang loh wis geh, ge.

¹⁰Nyamoq e wis nyeis uhlyis loloeu saiq jweh los las cicont sont toh bang gas nyihwank pwe mha nyang yah dvgeh wvng loh las khomh nyheih goeus.

¹¹Hauh thang lhyi gohtoeu lonyi jens eq jweh los las, Yhensain eh, yhensain eh, ngamoq lyis khomh phank dyei aq, ge.

¹²Nghuot laus eq nyang phuk taiq zis gas, Ngos namoq lyis jyoengh taiq bah, ngos namoq lyis ma seq, ge.

¹³Housoeh yvmvyah Cangsoeu Lo khanhamp lyih das dah buisnyeis yahge shishenh lyis ma seq yvmvyah zungh nyeis geh, ge.

¹⁴Maukhung munghdan gas dius dvyuk we mau pheh gyung suh das las, nyah jyeidwis jens lyis khi yoeus las nyah vyhang nyamoq lyis tsain kyauh toh khoq yhangteh nghuot.

¹⁵Dvyuk lyis xing kyvp oeng khyoengh, gohtoeu dvyuk lyis aiq khyoengh, thang thank dvyuk lyis dvkhyoengh mulas, nyamoq nyang yoh kuot dah yom lyis tank las dyei toh khoq las, houjang yah nyang gas gyung suh loh.

¹⁶Houjang xing kyvp oeng khyoengh xauh yoeus soeu ka, hauh zis yah soenghi loh kuot lyis gohtoeu oeng khyoengh myat los.

¹⁷Houyah dvyhangteh aiq khyoengh xauh yoeus soeu ka, hauh zis yah soenghi loh kuot lyis gohtoeu aiq khyoengh myat los.

¹⁸Nghuot laus eq dvkhyoengh xauh yoeus soeu ka, nyah yhensain dah ngwis lyis nyeisjvng mas doeu nyhop shung toh.

¹⁹Dvyoq nyangh thang lhyi hauh jyeidwis jens dah yhensain doms los las soenghi jyen los suon.

²⁰Housoeh las xing kyvp oeng khyoengh xauh yoeus soeu ka, gohtoeu oeng khyoengh doms chi lyih las taiq zis gas, Yhensain eh yoeuh aq, nvng ngos lyis xing kyvp oeng khyoengh dyei toh zis yah ngos tsai oeng khyoengh yoh myat yoeus, ge.

²¹Nyah yhensain nyang lyis taiq zis gas, Nghuot goeus, gis las lomluk dah jyeidwis eh, nvng gas vyhang dvmhauh yvmas lomluk goeus. Vyhang nyoshoq dah thoq mas ngos nvng lyis guon nhang das: nah yhensain gaus yvmas bos aq, ge.

²²Xing kyvp aiq khyoengh xauh yoeus soeu eq jweh los las, Yhensain eh, nvng ngos lyis aiq khyoengh dyei toh zis, yoeuh aq, ngos gohtoeu aiq khyoengh yoh myat los, ge.

²³Nyah yhensain nyang lyis taiq zis gas, Nghuot goeus, gis las lomluk dah jyeidwis eh, nvng vyhang dvmhauh yvmas lomluk goeus. Vyhang nyoshoq thoq mas ngos nvng lyis guon nhang das: nah yhensain gaus yvmas bos aq, ge.

²⁴Hauh thang lhyi dvkhyoengh xauh yoeus soeu los las taiq zis gas, Yhensain eh, nvng gas yau dah dius dvyuk nghuot las, nvng ma khyoq masyah yhomh yoeus das, nvng ma sanh toh masyah tsainh yoeus das zis lyis ngos seq.

²⁵Housoeh ngos gyuk las nah xing kyvp dvkhyoengh lyis nyeisjvng mas doeu nyhop shung toh. Yoeuh aq, nah vyhang joq shih, ge.

²⁶Nyah yhensain nyang lyis phuk taiq zis gas, Lan las ma lyungs dah jyeidwis eh, ngos ma khyoq masyah yhomh yoeus das zis yahge ma sanh toh masyah tsainh yoeus das zis nvng seq nyeis.

²⁷Housoeh yvmvyah ngah ngwis lyis ngwis jyi mha yoh tsomh nhang toh das las, ngah ngwis bonzoe eq ngwis lhyi eq doms yoh tauh yoeus das.

²⁸Housoeh yvmvyah nyah jyank mas dah ngwis yoeus las dvmons yoh soeu lhyi dyei geh.

²⁹Khasoeh ge lyis yoh bang lyis lung dyei das las nyang mas nyo los je los das. Nghuot laus eq ma yoh soeu jyank masyah gas, nyang yoh ya yoh zis lyis eq doms yoeus tyamp shih das.

³⁰Hau ma lyungs jyeidwis lyis gas, nghe pheh soeng soeng noq yvmas doeuh kat geh. Hauh yvmas nyang gas ngausdyeis ngausnhvp yahge zwis khih chap loh das, ge.

³¹Hauh Cangsoeu Lo gas nyah phunk bvng las gyingshang loeuswons bang dvnganh yah dvgeh gyohlyih dah uhlyis, nyang gas nyah phunk bos dah hwankti tank mas tsung das las,

³²Dius nyau khanghmuh lyis nyah xikkhonh mas tsainh toh lho lha, yvng yoeuh soeu ka yvng yahge shvbeq jens lyis kangh toh teh nyamoq lyis kyoq toh das.

³³Yvng lyis nyah loqyos shot pheh, shvbeq lyis nyah loqwi shot pheh toh das.

³⁴Hauh uhlyis Hwankti phoq gas nyah loqyos shot pheh nyeis bang lyis, Namoq Uwus jyank masyah shvmanh tsain yoh bang eh, los geh, mauthuq nyeiszvn lyis yah namoq xiklyis sont toh dah munghdan vso vlho lhyi tsain kham yoeus geh.

³⁵Khasoeh ge lyis, Ngos wom yuot lyis namoq ngos lyis zonoms dyei, ngos jeis shet lyis namoq ngos lyis shuk das zis dyei. Ngos boengh duot yenh lyis namoq ngos lyis boengh daih langh.

³⁶Ngos shohchen nghuot uhlyis namoq ngos lyis gvm huot. Ngos nos nyeis lyis namoq ngos lyis tsain dyangh. Ngos thung lungh nyeis lyis namoq ngos lyis komh goeus, oen das.

³⁷Hauh uhlyis dan bang gas, Yhensain eh, nvng yuot zis lyis ngamoq khanhamp nyvng las tsoh ku lah? Jeis shet zis lyis khanhamp nyvng las gvmshuk ku lah?

³⁸Nvng boengh duot yenh zis lyis ngamoq khanhamp nyvng las boengh daih ku lah? Nvng shohchen nghuot zis lyis ngamoq khanhamp nyvng las gvm huot ku lah?

³⁹Nvng nos xauh zis yahge thung lungh nyeis yvlyis ngamoq khanhamp nyvng las nvng lyis komh ku lah, ge nyang lyis tsain toeuh das.

⁴⁰Hauh uhlyis hwankti phoq nyamoq lyis phuk taiq das zis gas, Ngos namoq lyis jyoengh taiq bah, hai ngah vnoeuh moq mas ngis thank soeu dvyuk lyis namoq kuot zis gas, ngos lyis kuot goeus, ge.

⁴¹Loqwi shot pheh bang lyis nyang taiq das zis gas, Nhoengh khonh zangh bang eh, ngos yah gang las yius gomloeus yahge nyah loeuswons bang xiklyis sont toh dah ma jom nyi mas wvng loh geh.

⁴²Khasoeh ge lyis ngos wom yuot dah uhlyis namoq ngos lyis zonoms ma dyei. Ngos jeis shet dah uhlyis namoq ngos lyis jeis ma dyei.

⁴³Ngos boengh duot yenh dah uhlyis ngos lyis boengh ma daih; Ngos shohchen nghuot uhlyis namoq ngos lyis ma gvmhuot. Ngos nos xauh zis yahge thung lungh nyeis dah uhlyis namoq ngos lyis ma komh, ge.

⁴⁴Hauh uhlyis nyamoq eq, Yhensain eh, nvng wom yuot zis, jeis shet zis, boengh duot yenh zis, shohchen nghuot zis, nos xauh zis yahge thung lungh zis lyis ngamoq khanhamp nyvng las nvng lyis ma phuqsoe dyei lah, ge phuk taiq das.

⁴⁵Nyang nyamoq lyis phuk taiq das zis gas, Ngos namoq lyis jyoengh taiq bah, haih bang mas ngis thank soeu dvyuk lyis namoq ma kuot zis gas, ngos lyis ma kuot zis nghuot, ge.

⁴⁶Housoeh las nyamoq gas vcaiq vto shanghsenh yvmas wvng loh das. Nghuot laus eq dan bang gas, vcaiq vto kang dwis yvmas xauh wvng das, ge.