Read Achang MATHE 26 Bible Online

MATHE 26 - Achang bible

MATHE 26

¹Yesu haih dang dvnganh dye taiq lho lhyi nyah changlo jens lyis taiq zis gas,

²Aiq nyeih thang lhyi hau Lhuiq Kat Pwe nghuot zis namoq seq nyeis las, Cangsoeu Lo gas tapzains mas taplhangh tyamp das xiklyis phanhlyen zis xauh das, ge.

³Hauh uhlyis phudyei uhjyung jens yahge maussauh lhaih bang, dius jens dah logis jens gas, Kayapa ge Phudyei Zainsmuh dah yhen ganthoq mas tsain zop huom toh.

⁴Yesu lyis tsoek yah nyhik yoeus las sat das cho xamgoh nyeis.

⁵Nghuot laus eq nyamoq taiq zis gas, Pwe gyo lyis ma nghuot goeus jungh, dius hoeu toq mvbeh, ge.

⁶Gvshih Yesu gas Bethani mas mvnggvng dap soeu Simon dah yhen mha nyeis,

⁷Nyang womjus mas tsung toh lyis, vmesbih dvyuk, luk thyoeu jywanglo mhayah svsoh phauh dah xangh coeu nyah jyank mas chi lyih las nyah uhloms mas huot kat dyei.

⁸Nghuot laus eq nyah changlo jens hauh zis lyis nyvng lyis, nyamoq nhaiq yoeuh yo las taiq zis gas, Chamus haih coeu lhyi vyu vgeh kuot?

⁹Khasoeh ge lyis hauh yvlyis phauh nyo nyo yah ungh las nyungs bang lyis yoh gvm dyei das zis, ge.

¹⁰Yesu hauh zis lyis seq las nyang nyamoq lyis taiq zis gas, Chamus hauh vmesbih lyis yau nhang goh lah? Nyang ngos lyis gis khyvlyis kuot goeus.

¹¹Hau nyungs bang gas vjangh namoq yah dvgeh nyeis, nghuot laus eq ngos gas namoq yah vjangh ma nyeis.

¹²Khasoeh ge lyis, haih coeu lhyi ngah gungs mas huot kat zis gas, nyang ngos lyis ba nyhop das xiklyis sont zis nghuot.

¹³Ngos namoq lyis jyoengh taiq bah, mungkvn gonh mas haih gausyis dang taiq hoeuh loh dah joqyos khanghmuh mas nyang lyis soh das nyhenshang hai nyang kuot khoq cho lhyi taiq kyoh das, ge.

¹⁴Changlo dvci aiq yuk mas bos, Yudas Iskarot ge soeu ka, phudyei uhjyung jens jyank mas e lha,

¹⁵Nyang lyis ngos namoq dah loq mas dyei lyis, ngos lyis cha dyei das lah, ge nyamoq lyis nyei. Nyamoq gas, nyang lyis ngwis kyvp somhci suon dyei.

¹⁶Hou mhayah nyang lyis yoh phanhlyen dyei das toeuh xo nyeis.

¹⁷Gvshih bicheih ma kat ohlhyoq zo pwe, cangxeih vnyeih lyis changlo jens Yesu jyank mas los nyei zis gas, Lhuiq Kat Pwe zo das xiklyis nvng ngamoq lyis khamha sont toh dyei nhang mes lah, ge.

¹⁸Nyang taiq zis gas, Hauh wugungs mas soeu dvyuk jyank mas loh las, Ngah shishenh ni los goeus, nah yhen mha ngos ngah changlo jens yah hau Lhuiq Kat Pwe zo das ge Svra taiq kat, oen nyang lyis taiq geh, ge.

¹⁹Changlo jens eq Yesu taiq kat vgus kuot las, hau Lhuiq Kat Pwe nyenhcon lhyi tsain ba sont toh.

²⁰Gvshih nyenhthang lhyi nyang gas dvci aiq yuk moq yah dvgeh joqyos yoeus.

²¹Nyamoq wom zo nyeis uhlyis nyang taiq zis gas, Ngos namoq lyis jyoengh taiq bah, namoq mas dvyuk ngos lyis phanhlyen das, ge.

²²Hauh uhlyis nyamoq nhaiq svsoh tsain kuk las dvyuk thang lhyi dvyuk nyang lyis, Yhensain eh, ngos nghuot lah, ge.

²³Nyang phuk taiq zis gas, Bvn mas ngos yah dvgeh loq lap soeu ka ngos lyis kyauh tyamp das soeu nghuot.

²⁴Lhaih toh zis yah dvyhangteh, Cangsoeu Lo gas kuot tyink loh chah, nghuot laus eq Cangsoeu Lo lyis phanhlyen soeu ka mvtanhzoe nghuot! Nyang ma khoeu los ya nyah xiklyis zes gis das, ge.

²⁵Hauh uhlyis kyauh tyamp soeu Yudas eq nyang lyis, Svra eh, ngos nghuot lah, ge lyis, nyang gas, Nvng taiq goeus, ge phuk taiq.

²⁶Nyamoq wom zo nyeis uhlyis Yesu gas ohlhyoq yoeus las shvmanh thang lhyi khyiq las, changlo jens lyis dyei uhlyis yah taiq zis gas, Namoq tsain yoeus zo geh, haih zis gas ngah gungs nghuot, ge.

²⁷Nyang kom lhyi yoeus las jyehjuh lyis chungh thang lhyi dyei uhlyis yah taiq zis gas, Namoq dvnganhmoq haih zis shuk geh:

²⁸Haih zis gas nyoshoq moq dah yaunos lyis khyuot tyamp das xiklyis huot tyamp dah ngah suih yah kuot toh thanghchvp nghuot.

²⁹Ngos namoq lyis taiq bah, Ngah Uwus dah munghdan mas namoq yah dvgeh zvbiq saiq lyis xauh shuk buisnyeis jweh shoq, zvbiq shih mas zis lyis ngos ma shuk lo, ge nyamoq lyis gvm dyei.

³⁰Nyamoq chunghthwe dvkoeuq chungh lho lha, Tsanlun boms pheh thuq loh.

³¹Yesu nyamoq lyis taiq zis gas, khvnyens namoq dvnganh gas ngos lyis tyamp khoq das: khasoeh ge lyis, Hauh yvng yoeuh soeu lhyi ngos bat sat las, Yvng phung mha dah yvng gas dyos loh das, ge lhaih toh, ge.

³²Nghuot laus eq ngos gas dwis toq los nhang thang lhyi, Galile mau mas ngos namoq dah xikpheh loh langh das, ge.

³³Petru nyang lyis phuk taiq zis gas, Dvnganhmoq nah gvng mas nvng lyis tyamp khoq laus eq ngos gas khanhamp eq ma tyamp das, ge.

³⁴Yesu nyang lyis taiq zis gas, Ngos nvng lyis jyoengh taiq bah; khvnyens nyang gyoq ma tuon shih lyis nvng ngos lyis somh lhain he tyamp das, ge.

³⁵Petru nyang lyis phuk taiq zis gas, Ngos nvng yah dvgeh shei chah laus eq nvng lyis gas ma he tyamp das, ge. Changlo jens dvnganh eq vgus housoeh taiq.

³⁶Hauh thang lhyi Yesu gas nyamoq yah dvgeh, Gesemani ge dah joqyos mas jweh las changlo jens lyis taiq zis gas, Ngos thyimha shvmanh loh dung uhlyis namoq heimha tsung langh geh, ge.

³⁷Hauh uhlyis nyang gas Petru yahge Zebedi dah lotang lyis eq shwih las, kuk zis yah ehnyet nyo nyeis.

³⁸Housoeh las nyang nyamoq lyis taiq zis gas, Ngah nhaiqlom shei bah ge shoq nhaiqkuk nhaiqngis nyeis. Ngos yah dvgeh namoq heimha phuksohlhaiq mus nyeis langh geh, ge.

³⁹Housoeh nyang hou mhayah dvthungh loh shih las, nyah nyoqnho gop las shvmanh dung uhlyis yah taiq zis gas, Ngah Uwus eh, gis bweh nghuot lyis gas, haih kom ngah jyank masyah lai loh nhang aq: nghuot laus eq ngos o khyvlyis ma nghuot, nvng o khyvlyis dvnghuot bas jungh, ge.

⁴⁰Nyang nyah changlo jens jyank mas tauh los lyis, nyamoq yhet joq yvlyis los nyvng las Petru lyis, Khasoeh gah, namoq ngos yah dvshishenh eq ma yoh zungh nyeis goh lhyeh?

⁴¹Shiwu yvmas namoq ma wvng loh bas jungh zungh nyeis uhjyangh shvmanh dung geh. Dyos gas mes laus eq gungsshoh gas yomnhuk joq, ge.

⁴²Nyang aiq vlhain doms loh las shvmanh dung zis gas, Oh ngah Uwus eh, haih kom lhyi ngos ma shuk shuk ngah jyank masyah ma yoh lai loh nghuot lyis gas, nah ehnyet nghuot bas jungh, ge.

⁴³Dvlhain doms tauh los lyis eq, nyamoq nyoqkuk lyei las doms yhet muih joq yvlyis los nyvng.

⁴⁴Housoeh nyang nyamoq lyis toh khoq las somh vlhain doms loh las vkhang dah dang khonh doms dung nyeis.

⁴⁵Hauh thang lhyi nyang nyah changlo jens jyank mas los las taiq zis gas, Gvshih lvlaihsoe yhet joq lhyeh? Yoeuh aq, Cangsoeu Lo lyis yaunos wons bang loq mas kyauh tyamp das shishenh gas jweh los goeus.

⁴⁶Toq geh, yang tsain loh goh: yoeuh aq, ngos lyis kyauh tyamp das soeu los goeus, ge.

⁴⁷Nyang taiq nyeis shih lyis, yoeuh aq, dvci aiq yuk mas bos dah Yudas gas los las, phudyei uhjyung jens yahge dius jens dah logis jens mas dah dius dvjens dvlvng moengsa yahge dunghkuq chi lha nyah thang mha chank los.

⁴⁸Gvshih nyang lyis phanhlyen soeu ka, Ngos bvlot tanh soeu ka hauh soeu nyang nghuot goeus; nyang lyis nyhik yoeus geh, ge nyamoq lyis wuhsoh dyei toh.

⁴⁹Nyang gas Yesu jyank mas chot e lha, Svra eh, dvyangh lah, ge bvlot tanh.

⁵⁰Yesu nyang lyis phuk taiq zis gas, Buisnoms phoq eh, nvng kuot chah zis lvnyap dvkuot aq, ge. Housoeh las nyamoq Yesu lyis kvp tsain dap nyhik.

⁵¹Yesu yah dvgeh nyeis bang mas dvyuk gas, nyah moengsa she lha Phudyei Zainsmuh dah jyeidwis dvyuk lyis zan khyoq kat lho lhyi, nyah no dyet tyamp.

⁵²Yesu nyang lyis taiq zis gas, Nah moengsa lhyi dyvng mas cank toh aq: khasoeh ge lyis moengsa she bang dvnganh gas moengsa yah shei das, ge.

⁵³Ngos ngah Uwus lyis shvmanh dung lyis, nyang gvshih nyang loeuswons bang nyoshoq, dvci aiq dvp thoq lyis zes shoq ngah jyank mas yoh nhang kat das zis lyis nvng ma nghamh yoeuh lhyeh?

⁵⁴Housoeh kuot lyis, Haih cho yoh bweh das, ge lhaihtoh dang gas khasoeh yoh nyuk los das lah, ge.

⁵⁵Hauh shishenh lyis nyang, Yesu moqjens lyis taiq zis gas, Namoq ngos lyis khyanktau nyhik teh nyhik das zis moengsa, dunghkuq yah tsain los lhyeh? Ngos nyeih khanghmuh yhenmuh mas jyauh uhjyangh tsung toh lyis eq namoq ngos lyis ma nyhik.

⁵⁶Nghuot laus eq heisoeh bweh los zis dvnganh, lvpe jens dah maussauh nyuk los das xiklyis nghuot, ge. Hauh uhlyis changlo jens dvnganh yah nyang lyis tyamp khoq las cangh loh.

⁵⁷Yesu lyis nyhik bang gas, maussauh lhaih bang yahge logis jens huom toh dah Phudyei Zainsmuh Kayapa jyank mas Yesu lyis tsain shwih loh.

⁵⁸Petru gas nyah thang mha we we masyah chank loh las, Phudyei Zainsmuh gan thoq khau mha wvng las muh thang thyet yvlyis yoeuh das xiklyis zungh bang yah dvgeh tsung toh.

⁵⁹Gvshih Phudyei uhjyung jens yah dvgeh nhaiqbos dvhuom gonh Yesu lyis yoh sat das dah kanghjyoeng tsain xo.

⁶⁰Nghuot laus eq hank eq ma yoh. Ma ying kanghjyoeng nyoshoq los laus eq kanghjyoeng cha eq ma nyvng. Thang thank lyis ma ying kanghjyoeng aiq yuk los las taiq zis gas,

⁶¹Haih soeu ka, Ngos Mangso dah yhenmuh lyis thyoq tyamp las, somh nyeih gyo lyis hauh zis lyis yoh doms kuot, ge taiq goeus, ge.

⁶²Hauh uhlyis Phudyei Zainsmuh toq las nyang lyis, Nvng lyis tyixo kanghjyoeng kat nyeis zis cha nghuot, nvng ma phuk taiq lhyeh, ge.

⁶³Nghuot laus eq Yesu gas samlo dvnyeis. Tsai Phudyei Zainsmuh taiq zis gas, Mangso dah Lo ge, Khristu gas nvng nghuot lah? Ma nghuot lah, zis ngamoq lyis taiq kyoh bas jungh, oen dwis nyeis dah Mangso nyings yoeus las ngos nvng lyis maukhi, ge.

⁶⁴Yesu nyang lyis taiq zis gas, Nvng taiq goeus, ngos namoq lyis taiq bah, hauh Cangsoeu Lo gas Yomsoq dah loqyos shot pheh tsung lha maukhung jyommauh yah jweh lyih yvlyis namoq nyvng das, ge.

⁶⁵Hauh uhlyis Phudyei Zainsmuh gas nyah dyi lang chuiq las, Haih soeu ka Mangso lhyi loeusmus soqzo dang taiq. Yoeuh aq, namoq nyang hauh loeusmus soqzo dang lyis xauhgyo goeus. Chah kanghjyoeng chah shih lah?

⁶⁶Namoq soe khasoeh tuon das, ge. Nyamoq phuk taiq zis gas, Nyang gas shei chah dah yobos bos soeu nghuot, ge.

⁶⁷Nyamoq gas nyah nyoqnho mha svkanh dyeh gyuon las chwiq. Gohyhamh bang eq nyang lyis loqwu yah tsain tyuk las,

⁶⁸Khristu eh, nvng lyis hank tyuk zis lyis pe zis yah ngamoq lyis taiq kyoh aq, tsain ge.

⁶⁹Petru gas ganthoq mas tsung toh: nyelo dvyuk nyah jyank mas los las, nyang lyis taiq zis gas, Nvng eq Galile dius Yesu yah nyeis ku, ge.

⁷⁰Nghuot laus eq nyang gas, Nvng cha taiq mes zis ngos ma seqgyo, ge nyamoq dvnganh dah xikkhonh mas he.

⁷¹Tsai, nyang gas wumuk pheh thuq loh lyis gohtoeu vmesbih dvyuk eq nyang lyis nyvng las, houmha nyeis bang lyis taiq zis gas, Haih soeu eq Nazaret mas Yesu yah dvgeh nyeis soeu nghuot, ge.

⁷²Nyang gas, Hauh soeu lhyi ngos ma seq, ge maukhi nyeissoq las doms he.

⁷³Khanyhank ma nyangh lyis houmha yap joq bang los las Petru lyis taiq zis gas, Nvng eq nyamoq mas zis dvyuk jyoengh nghuot: nvng kat dah nyingh ma dyeh zis gas nvng lyis tuonh shet nyeis, ge.

⁷⁴Housoeh las nyang gas nhoengh nhoengh khan khan maukhi lha taiq zis gas, Ngos hauh soeu lhyi ma seq, ge. Houjang gyoq tuon los.

⁷⁵Housoeh las Petru gas, Gyoq ma tuon shih lyis nvng ngos lyis somh lhain he tyamp das, ge Yesu nyang lyis taiq dang lyis soh los las nyang nghe pheh e lha svsoh ngaus.