Read Achang MATHE 27 Bible Online

MATHE 27 - Achang bible

MATHE 27

¹Nvpyo jweh lyis phudyei uhjyung jens yahge dius jens dah logis jens dvnganh Yesu lyis sat das cho xamgoh.

²Nyamoq gas nyang lyis twih lho lha mungh zau Pilat jyank mas loh shwih kyauh tyamp.

³Nyang lyis phanhlyen dah Yudas gas, Yesu lyis dang thang thyet goeus zis nyvng lyis, nyang auhuiq las, phudyei uhjyung jens yahge logis jens jyank mas hau ngwis somhci yoeus e lha,

⁴Yobos ma bos soeu dah suih lyis ngos phanhlyen goeus las ngos yaunos dap goeus, ge. Nyamoq gas, Hauh zis ngamoq yah cha sen? Nvnyang kuot zis dvnghuot, ge.

⁵Housoeh las nyang gas hauh ngwis lyis yhenmuh khau mha doeuh toh khoq las nyah gungs lyis nyang e lhangh sheizo.

⁶Phudyei uhjyung jens gas, hauh ngwis lyis kui lha, Haih zis gas suih phauh nghuot yvmvyah, vlu ziskwi mas kat toh das zis lyi ma bos, ge.

⁷Hauh thang lhyi nyamoq doms xamgoh las, dius boengh lyis nyhop das xiklyis yam shuon soeu dah maunyeis lyis wis toh.

⁸Housoeh yvmvyah hauh maunyeis lyis khvnyhik jweh shoq Suih yos, ge tsain lui.

⁹Lvpe Yeremia taiq khoq dang mas, Hauh Yhensain ngos lyis taiq toh zis yah dvyhangteh, Israel dius dvyhamh yah dius dvyuk dah phauh thyet toh dah phauh ngwis kyvp somhci lhyi nyamoq yoeus las,

¹⁰Yhensain ngos lyis taiq toh zis yah dvyhangteh nyamoq hauh yvlyis yoeus las yam shuonh soeu dah maunyeis wis yvmas yhung, ge zis gas hauh uhlyis nyuk los.

¹¹Yesu gas mungh zau xikkhonh mas yap joq. Mungh zau nyang lyis nyei zis gas, Nvng Yuda hwankti nghuot lhyeh, ge. Yesu taiq zis gas, Nvng taiq nyeis, ge.

¹²Phudyei uhjyung jens yahge logis jens yah nyang lyis zau kauq laus eq nyang cha eq ma phuk taiq.

¹³Pilat gas nyang lyis, Nyamoq nvng lyis khanyhoq zau kauq nyeis zis lyis nvng ma xauhgyo lhyeh, ge.

¹⁴Nghuot laus eq nyang dang dvkhonh eq ma phuk taiq. Housoeh mungh zau gas svsoh mauh.

¹⁵Gvshih haih pwe mha mungh zau gas, dius xiklyis thung lungh bang mas nyamoq lhuiq kat nhang mes soeu dvyuk yuk lyis gyangh lhuiq kat dyei.

¹⁶Hauh uhlyis Baraba ge, ma gis nyings hoeuh soeu dvyuk thung lungh nyeis.

¹⁷Housoeh yvmvyah nyamoq dvgeh zain dah uhlyis, Pilat nyamoq lyis taiq zis gas, Ngos namoq xiklyis hank lyis lhuiq kat dyei das zis o goh lah? Baraba lyis lah? Khristu ge Yesu lyis lah, ge.

¹⁸Khasoeh ge lyis nyamoq noh gvng mas, Yesu lyis kyauh tyamp yvlyis nyang seq.

¹⁹Pilat soetuon tank mas tsung toh shih lyis, nyah yhensain nyhiq yah dius nhang lha nyang lyis taiq kat zis gas, Dan soeu lhyi nvng cha eq vkuot; nyah gvng mas khvnyhik yangh ngos yhetmoq mas ma nyens mus nyeis, ge.

²⁰Nghuot laus eq phudyei uhjyung jens yahge logis jens gas, Baraba lyis kat kat las Yesu lyis gas mhont das xiklyis sang gis, ge dius jens lyis jaus jyuonh, yomdyei.

²¹Mungh zau nyamoq lyis phuk taiq zis gas, Haih dvzomh mas namoq xiklyis ngos khayuk lyis kat kat dyei das zis o mes goh lah, ge. Nyamoq gas, Baraba lyis o mes, ge.

²²Tsai, Pilat nyamoq lyis taiq zis gas, Housoeh lyis Khristu ge dah Yesu lyis ngos khasoeh kuot das lah, ge. Nyamoq dvnganh gas, Nyang lyis tapzains mas taplhangh aq, ge.

²³Hauh uhlyis mungh zau taiq zis gas, Chamus lah? Nyang ma gis zis cha kuot lah, ge. Nghuot laus eq nyamoq gas, Nyang lyis tapzains mas taplhangh tyamp bas jungh, ge zes tsain kaiq los.

²⁴Pilat gas nyang taiq dah dang lyis hank ma gyo dyei hoeu los zis lyis nyvng lyis, jeis yoeus las moqphung xikkhonh mas nyang loq cheih zoh lyis yah taiq zis gas, Haih dan soeu dah suih masyah ngos luiq bas jungh: namoq kuot dah muh dvnghuot, ge.

²⁵Hauh uhlyis dius dvnganhmoq gas, Nyah suih gas ngamoq thoq mas eq, ngamoq lo jens thoq mas eq joq bas jungh, ge.

²⁶Housoeh nyang nyamoq xiklyis Baraba lyis kat kat dyei. Nghuot laus eq Yesu lyis gas, lyuk lho lha tapzains mas taplhangh tyamp das xiklyis kyauh tyamp.

²⁷Hauh thang lhyi mungh zau dah jeslo jens gas, Yesu lyis mungh zau yhen mha shwih wvng loh las, nyamoq dvdvp gonh dah jeslo jens lyis nyah jyank mas khi tsainh las,

²⁸Nyamoq gas nyah dyimis lyis khyuot tyamp dyei las, dyi nesnoq gvmhuot.

²⁹Nyamoq gas zoeu yah zaiq dah buismuk nyah uhloms mas tsungh dyei. Nyah loqyos loq mas jvmbu dvyau chi toh nhang lha, nyah xikkhonh mas nyamoq phvluk zomhgyuis las jwangh zoh lyis yah, Yuda hwankti kang xing bas jungh, tsain ge.

³⁰Nyamoq gas nyang lyis svkanh dyeh gyuon las, hau jvmbu yau doms yoeus las Yesu dah uhloms mas lyuk dyei.

³¹Nyamoq gas nyang lyis dye jwangh goeus ya, nyamoq hauh dyi khyuot yoeus las, nyah dyi doms gvmhuot lho lha, nyang lyis tapzains mas taplhangh das zis shwih thuq loh.

³²Nyamoq thuq loh lyis Kureni dius Simon ge soeu lhyi nyvng las nyah tapzains lyis bos tsain tsoengh wuq nhang.

³³Nyamoq gas Golgotha ge, Uhkhangh ge dah joqyos mas jweh lyis,

³⁴nyamoq gas kyei yah lhoeuq dah zvbiq nyang lyis gvmshuk, nghuot laus eq nyang chaq yoeuh las ma shuk lo.

³⁵Nyamoq gas nyang lyis dye taplhangh toh thang lhyi, nyah dyi lyis nyamoq doeugoh las gvm yoeus.

³⁶nyamoq gas houmha tsung lha nyang lyis zungh nyeis.

³⁷Nyah uhloms toeu mha, Haih soeu ka YUDA HWANKTI YESU nghuot, ge nyang lyis zau kauq dang lhaih tap toh.

³⁸Khyanktau aiq yuk lyis eq nyang yah dvgeh, nyah loqwi loqyos dvshot dvyuk tapzains mas tsain lhangh toh.

³⁹Cho mha suh lai loh bang eq nyang lyis jwangh zoh lyis yah, uhloms nguot las,

⁴⁰Yhenmuh lyis thyoq tyamp las somh nyeih gyo lyis doms kuot das ge soeu eh, nvnyang gungs lyis khyuot yoeus aq, nvng Mangso dah Lo nghuot lyis gas, tapzains masyah gyoh los aq, tsain ge.

⁴¹Phudyei uhjyung jens, maussauh lhaih bang yahge logis jens eq houyah dvyhangteh nyang lyis jwangh las,

⁴²Gohyuk lyis nyang khyuot yoeus, nyah gungs lyis nyang ma yoh khyuot yoeus nyvng! Nyang Israel hwankti nghuot lyis gas, nyang lyis ngamoq yoh lomsjingh das xiklyis tapzains masyah gvshih gyoh los bas jungh.

⁴³Nyang gas Mangso lhyi loms nyeis; Ngos gas Mangso dah lo nghuot, ge taiq goeus yvmvyah, Mangso nyang lyis o nghuot lyis gas nyang lyis gvshih khyuot kat bas jungh, tsain ge.

⁴⁴Nyang yah dvgeh tapzains mas lhangh toh dah khyanktau aiq yuk eq houyah dvyhangteh tsain jwangh.

⁴⁵Gvshih dvci aiq shishenh masyah somh shishenh jweh shoq dvmau gonh mau chuot joq.

⁴⁶Somh shishenh ko lhyi Yesu thwe zainsmuh yah taiq zis gas, ELI, ELI LEMA SABAKTHANI ge. Hauh zis gas, Ngah Mangso eh, ngah Mangso eh, nvng ngos lyis chamus doeuh tyamp toh lah, ge zis nghuot.

⁴⁷Houmha yap joq bang dvyhamh hauh dang xauhgyo lyis, Nyang gas Eliya lyis lui nyeis, tsain ge.

⁴⁸Houjang yah nyamoq mas dvyuk wuih e lha, khotlhyop dvjop lyis shihjyen jeis mas jen las, jvmbu yau mas tap las nyang lyis gvmshuk.

⁴⁹Dvyhamh bang gas, Nghuot lo goeus jungh, Eliya nyang lyis vlyih khyuot yoeus das lah zis langh yoeuh goh, ge.

⁵⁰Tsai, Yesu gas thwe zainsmuh yah doms kaiq lho lha nyah dyos lyis kyauh tyamp.

⁵¹Yoeuh aq, yhenmuh mas dah gos misseh eq vthyoh mas zis vkhyei mha jweh shoq aiq khyamh juiq tyamp. Maunyeis eq dwis las lukmuh lom eq tsain gwi.

⁵²Lop eq tsain phank hanh los las yhet joq goeus, gyingshang bang dah gungs eq nyoshoq toq los las,

⁵³Nyang dwis toq loh dah thang lhyi lop masyah thuq las hau gyingshang wus vkhau mha wvng loh las nyoshoq moq lyis nyvng xoeuq.

⁵⁴Gvshih jes dvxo guon zau yahge nyang yah dvgeh Yesu lyis zungh bang hau maunyeis dwis zis yahge bweh ya bweh los zis nyvng lyis svsoh gyuk las, Haih soeu ka jyoengh nyang Mangso dah Lo nghuot, tsain ge.

⁵⁵Galile mau masyah Yesu lyis phuqsoe lha nyah thang mha chank yenh dah vmesbih jens nyoshoq eq houmha nghuot las, we we masyah yoeuh nyeis.

⁵⁶Hauh bang mas Magdala Mari, Yaku yahge Yosep dah ungwes Mari, Zebedi lo jens dah ungwes moq nghuot.

⁵⁷Gvshih nyenhthang jweh lyis Yesu dah changlo dvyuk nghuot, dis soeu Yosep ge dah Arimathia dius dvyuk jweh los.

⁵⁸Nyang gas Pilat jyank mas wvng las, Yesu dah mvng lyis sang lhyi, Pilat gas hauh mvng nyang lyis dyei kat das zis vmingh dyei.

⁵⁹Housoeh las Yosep gas mvng lyis yoeus las lhoq dah jeimuh mis yah lyet lho lha,

⁶⁰Lukmuh lom mas kyungh toh dah nyah lop saiq mas toh. Hau lopkhonh mas lukzains toeu cheiq khoq las loh.

⁶¹Houmha Magdala Mari yahge gohtoeu Mari eq lop nhuotkhonh mas tsain tsung toh.

⁶²Hau sont buisnyeis dah nungs nyeih phudyei uhjyung jens yahge Pharishe moq gas Pilat jyank mas e lha,

⁶³Yhensain eh, yeis khuk soeu ka, nyang dwis nyeis shih lyis, Ngos gas somh nyeih thang lhyi dwis toq los das, ge nyang taiq dang lyis ngamoq soh.

⁶⁴Housoeh yvmvyah nyenh lyis nyah changlo jens nyang lyis los khauh yoeus las, shei masyah toq loh goeus, ge dius jens lyis ma yoh taiq bas jungh somh nyeih hauh lop wontang zungh das zis vmingh dyei aq: housoeh ma nghuot lyis gas, xik lyis hwah lungs cho thoq lyis thang lhyi hwah lungs cho zes yau los das, ge.

⁶⁵Pilat nyamoq lyis taiq zis gas, Namoq zungh das bang yoh, namoq yoh kuot nyhoq wontang loh kuot geh, ge.

⁶⁶Housoeh nyamoq e lha, lop mas dah luk lyis loqsoh tap, zungh nhang lha gau gau kuot toh.