Read Achang MATHE 28 Bible Online

MATHE 28 - Achang bible

MATHE 28

¹Yuda No Buisnyeis lai las dvdaus dah cangxeih vnyeih, nyoq nyvng zoh lyis, Magdala Mari yahge gohtoeu Mari gas lop lyis komh das zis tsain e.

²Hauh uhlyis, yoeuh aq, maunyeis gvgis dwis los: Khasoeh ge lyis, Yhensain dah loeuswons soeu maukhung mhayah gyoh lyih las, lop khomh luklom lyis toeu tyamp las hauh thoq mas tsung toh.

³Nyah vwot gas mau nyoq nyik teh nghuot; nyah dyi eq gyu teh thyoeu.

⁴Nyang lyis gyuk dvn yvmvyah, zungh bang tyik tyik nvn las shei bang teh chuot tyamp.

⁵Hauh loeuswons soeu yah hauh vmesbih aiq yuk lyis taiq zis gas, Nah aiq yuk vgyuk goh, tapzains mas taplhangh tyamp goeus soeu Yesu lyis nah aiq yuk xo yvlyis ngos seq.

⁶Nyang heimha ma nyeis lo: Khasoeh ge lyis nyang taiq zis yah dvyhangteh, nyang gas dwis toq loh goeus: Los geh, nyang lhain dah joqyos lyis los yoeuh geh.

⁷Lvnyap loh las nyah changlo jens lyis, Nyang gas dwis toq loh goeus, oen taiq kyoh geh. Yoeuh aq, nyang gas namoq dah xik pheh Galile mau mas loh goeus. Houmha namoq nyang lyis nyvng das. Yoeuh aq, ngos namoq lyis taiq kyoh, ge.

⁸Hauh uhlyis nyah aiq yuk gas gyuk eq gyuk, gaus eq svsoh gaus zis yah lop masyah lvnyap loh las nyah changlo jens lyis hauh dang taiq kyoh das xiklyis tsain wuih loh.

⁹Yoeuh aq, Yesu nyah aiq yuk yah xauhgoh las. Gausyis nyeis bas jungh, ge. Nyah aiq yuk gas nyah khyei lhyi zwi las tsain paiq.

¹⁰Yesu nyah aiq yuk lyis taiq zis gas, Vtsain gyuk goh, ngah vmang vnoeuh moq Galile mau mas loh das xiklyis loh taiq kyoh geh, nyamoq ngos yah houmha xauhgoh das, ge.

¹¹Nyah aiq yuk loh nyeis lyis, yoeuh aq, lop zungh bang mas dvyhamh wukhau mha wvng loh las, houmha bweh ya bweh cho dvnganh yah phudyei uhjyung jens lyis taiq kyoh.

¹²Hauh uhlyis nyamoq logis jens yah tsain huom lha, xam nyoq thang lhyi, nyamoq gas jeslo jens lyis ngwis nyoshoq dyei las taiq zis gas,

¹³Nyenhyo ngamoq yhet joq uhlyis nyah changlo jens nyang lyis lyih khauh yoeus loh, oen taiq geh.

¹⁴Haih zis lyis mungh zau xauhgyo nghuot lyis namoq lyis yobos ma zangh das xiklyis ngamoq, nyang lyis jyoeuq das, ge.

¹⁵Housoeh nyamoq hauh ngwis tsain yoeus khoq las, jyauh kat zis yah dvyhangteh kuot. Housoeh las dang hauh zis gas Yuda dius mas khvnyhik jweh shoq hoeuh nyeis.

¹⁶Housoeh las changlo jens dvci dvyuk moq gas, Galile mau mas loh las, Yesu nyamoq lyis taiq toh dah boms mas tsain doq loh.

¹⁷Houmha nyang lyis nyvng las tsain paiq. Nghuot laus eq dvyhamh bang gas khamkhvv.

¹⁸Yesu nyamoq jyank mas los las taiq zis gas, Maukhung thoq mas eq, nyeisjvng thoq mas eq, vmingh dvnganh yah ngos lyis dyei goeus.

¹⁹Housoeh yvmvyah namoq loh las, dius nyau khanghmuh lyis ngah changlo jens bweh nhang lha, Uwus, Lo, Gyingshang Dyos dah nyings masyah nyamoq lyis jeisnyhop dyei geh.

²⁰Ngos namoq lyis taiq ya taiq yvlyis yoh chank das xiklyis nyamoq lyis jyauh geh. Hauh thoq lyis, yoeuh aq, mungkvn thank shoq, ngos vjangh namoq yah dvgeh nyeis, ge. Amen.