Read Achang MATHE 3 Bible Online

MATHE 3 - Achang bible

MATHE 3

¹Hauh buisnyeis lyis jeisnyhop dyei soeu Yohan thuq los las, Yuda mau mhanhdyvp mas taiq hoeuh nyeis zis gas.

²Maukhung munghdan jweh ni los las, nhaiqlom thaiq geh, ge.

³Lvpe Esaia gas haih soeu cho heisoeh ge: Mhanhdyvp mas dvyuk kaiq nyeis dah thwe ka, Yhensain dah cho lhyi sont toh geh, Nyah chokhyoh lyis soq dan geh, ge.

⁴Yohan ka, gola-u mauh dyi wuot, thyikdom mas shohyeis dyichih chih toh. Nyah wom gas janghgyik yahge mhanhdyvp mas dah dyoyhei nghuot.

⁵Hauh uhlyis Yerusalem, Yuda mau gonh mas bang, Yodan lvng vwi vyvm mas bang dvnganh, nyah jyank mas e lha,

⁶nyamoq dah yaunos lyis rhen lha, Yodan lvng Yohan jyank mas nyamoq jeisnyhop tsain kham.

⁷Pharishe yahge Saduke jens nyoshoq jeisnyhop kham das xiklyis lyih yvlyis nyvng las, nyang nyamoq lyis taiq zis gas, Ywimuhtsanh vnyau eh, jweh los das dah nhaiqlom dyis masyah cangh das zis namoq lyis hank yah taiq kyingh goh lah?

⁸Housoeh yvmvyah nhaiqlom thaiq zis yah mon yih dah vshih shih geh.

⁹Namoq ehnyet mas Abraham gas namoq dah phauh thyeih nghuot oen vtaiq zo goh. Ngos namoq lyis taiq bah, Mangso ka haih lukzains masyah Abraham xiklyis lo jens yoh thuq los nhang.

¹⁰Gvshih yangh wuzung gas saiqzains khyei mha toh goeus. Housoeh yvmvyah gis dah vshih ma shih dah vzains khanghmuh lyis thoeuq las nyi mas kat das.

¹¹Ngos namoq lyis nhaiqlom thaiq das xiklyis jeis yah jeisnyhop dvdyei shih, nghuot laus eq ngah thang mha los soeu ka ngah thoq lyis yombos soeu nghuot las, ngos gas hauh soeu dah thyvkoq dvng dyei das zis yangh ma mon. Nyang gas namoq lyis gyingshang Dyos yah eq, nyi yah eq jeisnyhop dyei das.

¹²Nyang nyah thanjang mas guk lhank das xiklyis hauq chi toh. Nyang gukmos lyis jyi mha kat toh las, guksom lhyi ka ma jom nyi mas ngheq das, ge.

¹³Hauh uhlyis Yesu gas Yohan loq mas jeisnyhop kham das xiklyis Galile mau masyah Yohan nyeis dah Yodan lvng mas jweh los.

¹⁴Nghuot laus eq Yohan nyang lyis tomp las taiq, Ngos yuk nah jyank mas jeisnyhop dvkham chah zis, nvng ngah jyank mas lyih lhyeh, ge.

¹⁵Yesu nyang lyis phuk taiq zis gas, Gvshih gas heisoeh kuot aq, khasoeh ge lyis heisoeh kuot zis gas dan cho dvnganh nyuk los das xiklyis nghuot, ge. Housoeh ge lho lhyi nyang dvkham dyei.

¹⁶Yesu jeisnyhop kham lha jeis khau mhayah toq los yah dvyih, nyah jyank mas maukhung phank los las, Mangso dah Dyos gas khotjyauh teh gyoh los las nyah thoq mas los no joq yvlyis ngos nyvng.

¹⁷Maukhung mhayah thwe eq dvkoeuq los zis gas, Haih soeu ka ngos jyetdap dah ngah Lo nghuot, ngos nyang lyis nhaiqdoeus, ge.