Read Achang MATHE 7 Bible Online

MATHE 7 - Achang bible

MATHE 7

¹Namoq soetuon zis ma xauh bas jungh, soe vtuon goh.

²Khasoeh ge lyis namoq soetuon vgus namoq soetuon zis xauh das; namoq laiq dyei pan mhayah namoq lyis laiq dyei das.

³Nah nyoqjeih mas bos dah thangh-tungh lyis ma nghamh yoeuh, nah vmang vnoeuh nyoqjeih mas bos dah phvlhau lhyi chamus yoeuh nyeis lah?

⁴Nah nyoqjeih mas thangh-tungh bos joq las, nah vmang vnoeuh lyis, Nah nyoqjeih mas phvlhau yoeus tyamp dyei bah, oen khasoeh yoh taiq lah?

⁵Gis guons kuot soeu eh, nvnyang nyoqjeih mas dah thangh-tungh lyis shih yoeus tyamp aq; hauh thang lhyi nah vmang vnoeuh nyoqjeih mas dah phvlhau lhyi yoeus tyamp dyei das zis dede nyvng das.

⁶Gyingshang dah zis lvkhuih jens lyis vdyei goh. Namoq uhshot lyis wuq xikkhonh mas vdoeuh kat goh: housoeh kuot lyis nyamoq hauh yvlyis nang nheh doq lhyweq las namoq lyis dyvm ngat los das.

⁷Dung geh, housoeh lyis namoq yoh das; xo geh, housoeh lyis namoq nyvng das; khomh koq geh, housoeh lyis namoq lyis phank dyei das.

⁸Khasoeh ge lyis dung soeu hank eq yoh; xo soeu eq nyvng; khomh koq soeu lhyi eq phank dyei das.

⁹Namoq hank laus eq, nyah lo ohlhyoq sang lhyi lukgoq dyei das lhyeh?

¹⁰Oengdoq sang lhyi lhangnyis dyei das lhyeh?

¹¹Namoq ma gis bang yangh, namoq lo jens lyis gis dah jyungshuk seq dyei lyis gas, maukhung mha namoq dah Uwus gas, nyang lyis dung bang lyis hauh thoq lyis gis dah jyungshuk seq dyei das ma nghuot lhyeh?

¹²Gohyuk yah namoq lyis khasoeh kuot dyei nhang mes lyis namoq eq nyamoq lyis housoeh nyang, kuot dyei geh. Khasoeh ge lyis haih zis gas lyi yahge lvpe jens taiq zis nghuot.

¹³Zvvs dah khomh cho yah wvng geh: khasoeh ge lyis, dyoqbis yvpheh bangh loh dah khomh gas hanh, cho eq suh pyo lha houmha wvng loh bang nyoshoq nghuot.

¹⁴Kang dwis yvpheh bangh loh dah khomh gas zvvs las cho eq choyauhyot nghuot yvmvyah, hauh zis lyis xo nyvng bang nain.

¹⁵Wus dah cauhpau jens teh nghuot las, yvng yeis khuk zis yah namoq jyank mas los das lvpe hwah lyis zaih geh.

¹⁶Namoq, nyamoq dah zoeu gyomh masyah zvbiq shih, nhoh zoeu zains masyah maiphang shih yoh thyoq yoeus lhyeh?

¹⁷Housoeh las saiq gis zains khanghmuh gas gis dah vshih shih joq. Nghuot laus eq ma gis dah saiqzains mas ma gis dah vshih shih joq.

¹⁸Saiq gis zains mas ma gis dah vshih ma yoh shih. Ma gis dah saiqzains mas eq gis dah vshih ma yoh shih.

¹⁹Gis dah vshih ma shih dah saiqzains khanghmuh lyis gas thoeuq las nyi mas doeuh kat das.

²⁰Housoeh las nyamoq dah vshih lyis yoeuh las hauh saiqzains lyis yoh tsain seq das.

²¹Ngos lyis, Yhensain eh, Yhensain eh ge bang dvnganh maukhung munghdan mas xauh wvng das zis ma nghuot. Maukhung mha nyeis, ngah Uwus dah ehnyet chank soeu dvxauh wvng das.

²²Hauh buisnyeis lyis dius nyoshoq gas ngos lyis, Yhensain eh, Yhensain eh, nah nyings masyah ngamoq lvpe pe goeus, nah nyings masyah yius khat tyamp goeus; nah nyings masyah mauhphoh muh lyis zwi goeus ma nghuot lhyeh, ge taiq los das.

²³Hauh uhlyis ngos gas, Ngos namoq lyis khayhoq eq ma seq ku: lyi ma chi muh kuot bang eh, namoq ngah jyank masyah thuq loh geh, oen taiq das.

²⁴Housoeh yvmvyah hai ngah dang dvnganh lyis xauhgyo las chank kuot soeu hank laus eq nyah yhen lhyi lukmuh lom thoq mas ci toh dah joeui bos soeu yah doeusgoh.

²⁵Mau wus, jeis je, lyeis muot los las, hauh yhen lhyi bat laus eq hauh yhen khyei ka lukmuh lom thoq mas ci toh yvmvyah ma lains loh.

²⁶Hai ngah dang lyis xauhgyo las ma chank soeu hank laus eq nyah yhen lhyi sihsho yos mas ci toh dah koh soeu yah doeusgoh.

²⁷Mau wus, jeis je, lyeis muot los las, hauh yhen lhyi bat yvmvyah lains loh. Hauh dyoqbis zis gas kha iq kuh lah!

²⁸Gvshih Yesu haih dang dye taiq lyis, dius jens gas nyang jyauh cho lhyi svsoh mauh.

²⁹Khasoeh ge lyis nyang gas, maussauh lhaih bang teh ma nghuot, vmingh bos soeu teh nyamoq lyis jyauh.