Read Achang MATHE 9 Bible Online

MATHE 9 - Achang bible

MATHE 9

¹Nyang lhyik khau mha wvng las goeu loh lyis nyah wugungs[1] mas jweh loh.

²Hauh uhlyis, yoeuh aq, gungsjen shei lha yhetyos mas dvnyeis soeu dvyuk lyis nyah jyank mas tsain dvng lyih. Yesu nyamoq dah lomsjingh ehnyet lyis nyvng lyis, gungsjen shei soeu lhyi taiq zis gas, Lo eh yom huont aq, nah yaunos khyuot dyei goeus, ge.

³Housoeh las, maussauh lhaih bang mas dvyhamh gas, Haih soeu ka loeusmus soqzo dang taiq, ge nyamoq dah ehnyet mas tsain taiq zo nyeis.

⁴Yesu gas nyamoq khasoeh nghamh zis lyis seq las taiq zis gas, Namoq ehnyet mas chamus ma gis zis nghamh goh?

⁵Nah yaunos khyuot dyei goeus oen zis yah, Toq las suh loh aq, oen zis khah zis zes taiq lwis lah?

⁶Nghuot laus eq Cangsoeu Lo gas nyeisjvng thoq mas yaunos khyuot dyei das vmingh yoh zis gas namoq seq bas jungh, gungsjen shei soeu lhyi, Toq aq, nah yhetyos yoeus las nah yhen pheh loh lo aq, ge.

⁷Hauh uhlyis nyang toq las nyah yhen pheh loh.

⁸Moqjens hauh zis nyvng lyis, nyamoq mauh las, dius lyis heisoeh teh vmingh dyei dah Mangso lhyi chungh.

⁹Yesu hou mhayah lai loh lyis, Mathe ge soeu khoengh khywi joqyos mas tsung toh zis nyvng las nyang lyis, Ngah thang mha chank los aq, ge. Housoeh nyang toq las nyah thang mha chank loh.

¹⁰Hauh thang lhyi Yesu gas hauh soeu dah yhen, womjus mas tsung toh lyis, khoengh khywi bang yahge yaunos wons bang nyoshoq, Yesu yahge nyah changlo jens yah dvgeh tsung toh.

¹¹Hauh zis lyis Pharishe moq nyvng lyis, nyamoq gas nyah changlo jens lyis taiq zis gas, Namoq dah svra gas khoengh khywi bang yahge yaunos wons bang yah dvgeh chamus zo shuk au lhyeh, ge.

¹²Yesu hauh zis xauhgyo las nyamoq lyis taiq zis gas, Yanghzan bang gas mvcheih lastsiang ma chah, nos bang dvchah.

¹³Housoeh las namoq loh las, Ngos gas nhaiqnyen shohgyo zis lyis o, lomhxangh lainh zis lyis ma o, ge dah vjyuk lyis xuq geh: khasoeh ge lyis, ngos lyih zis gas, dan bang lyis khi das xiklyis ma nghuot, yaunos wons bang xiklyis dvnghuot, ge.

¹⁴Hauh thang lhyi Yohan dah changlo jens nyah jyank mas lyih las, Ngamoq yahge Pharishe moq womkyi lhyi, nah changlo jens gas chamus wom ma kyi goh lah, ge.

¹⁵Nyang nyamoq lyis taiq zis gas, Nyi hwank yvp yah sen dah loshang jens yah dvgeh nyeis shih uhlyis, nyamoq gas nhaiqkuk nhaiqngis zis xauh das lah? Nghuot laus eq loloeu saiq lyis nyamoq jyank masyah yoeus tyamp das buisnyeis jweh los das: hauh uhlyis nyamoq womkyi das.

¹⁶Dyi tyang mha misseh saiq yah hank ma pho: khasoeh ge lyis, pho toh dah vdwang yah dyi lyis lang yaq las, hou mhayah juiq zis zes lvm los das.

¹⁷Zvbiq jeis saiq eq shohyeis thung tyang mha hank ma kat. Kat nghuot lyis gas, buk las zvbiq jeis eq shuon, shohyeis thung eq monh das. Zvbiq jeis saiq gas shohyeis thung saiq mas kat las, hau aiq ja yah gis joq, ge.

¹⁸Yesu nyamoq lyis haih zis taiq nyeis dah uhlyis, lyi jungs uhjyung dvyuk nyah jyank mas los las nyang lyis dupaiq zoh lyis yah taiq zis gas, Ngah lonyi lo gvshih shei goeus; nghuot laus eq nvng los las nyah thoq mas loq kih dyei lyis gas dwis los das, ge.

¹⁹Housoeh Yesu toq las nyah thang mha chank e. Nyah changlo jens eq chank e.

²⁰Hauh uhlyis, dvci aiq zvn suih shuon dah vmesbih dvyuk gas nyah thang mha lyih las nyah dyithang mha tanh.

²¹Khasoeh ge lyis nyah nhaiqlom mas, Ngos nyah dyi thang mha khvlangh xauh tanh lyis ngos gis los das, ge taiq zo.

²²Yesu lhain yoeuh las nyang lyis nyvng lho lhyi nyang taiq zis gas, Lonyi eh, yom huont aq, nah lomsjingh zis gas nvng lyis gis los nhang goeus, ge. Hauh shishenh masyah hauh vmesbih gas gis los goeus.

²³Yesu gas, hau guon soeu dah yhen mha jweh loh lyis, khvlhank muot bang yahge dius nyoshoq hoeu nyeis zis lyis nyvng lyis,

²⁴Nyang taiq zis gas, Joqyos xwiq geh, khasoeh ge lyis lonyi lo gas shei zis ma nghuot, yhet joq zis dvnghuot, ge, Nyamoq gas nyang lyis yis.

²⁵Nghuot laus eq dius jens lyis thuq loh nhang thang lhyi, nyang wvng loh las hauh lonyi lo dah loq mas zwi lho lhyi, nyang gas toq los.

²⁶Housoeh las nyah cho ka wuxom gonh mas hoeuh loh.

²⁷Yesu gas hou mhayah lai loh lyis, nyoqjet aiq yuk gas nyah thang mha chank los las kaiq sang zis gas, Dawi dah Lo eh, ngah aiq yuk lyis nhaiqnyen aq, ge.

²⁸Nyang yvpkhau mha wvng loh lyis, nyoqjet vzomh eq nyah jyank mas los. Yesu nyah aiq yuk lyis taiq zis gas, Ngos yoh gis los nhang oen zis lyis jingh lhyeh, ge lyis, nyah aiq yuk gas, Yhensain eh, jingh, ge.

²⁹Housoeh nyang nyah aiq yuk dah nyoq mas tanh uhlyis yah taiq zis gas, Nah aiq yuk lomsjingh zis yah dvyhangteh bweh bas jungh, ge.

³⁰Hauh uhlyis nyah aiq yuk nyoq bangh los. Yesu gas nyah aiq yuk lyis hank lyis eq ma seq nhang das xiklyis khyangh com kat.

³¹Nghuot laus eq nyah aiq yuk gas, nyah cho lhyi hauh wuxom gonh mas tsain taiq hoeuh loh.

³²Nyamoq thuq loh yah dvyih, yius kuq dah nhuotjet dvyuk lyis nyah jyank mas shwih los.

³³Yius khat tyamp thang lhyi nhuotjet dang jis los. Hauh uhlyis dius jens gas mauh las, Israel dius jens mas heisoeh teh zis khanhamp eq ma nyvng ku, ge.

³⁴Nghuot laus eq Pharishe jens taiq zis gas, Nyang gas yius zau dah vmingh yah yius lyis khat tyamp zis nghuot, ge.

³⁵Yesu gas wus yahge wukhau khanghmuh mas suh jyuon yenh las, nyamoq dah lyi jungs mha eq jyauh uhlyis yah, Mangso munghdan gausyis dang lyis taiq hoeuh las, dius mas nos vja ja yahge noslom vja ja lyis gis los nhang.

³⁶Nyang moqjens lyis nyvng lyis, nyamoq gas yoeuh soeu ma bos dah yvng jens teh vshoh vjyen dungsshih lvnggang tsain dyos yenh yvmvyah, nyang nyamoq lyis nhaiq yoeuh nyen.

³⁷Hauh thang lhyi nyang nyah changlo jens lyis taiq zis gas, Jyo yhomh das zis nyoshoq bos laus eq, muh zwi bang nain, ge.

³⁸Housoeh yvmvyah jyo Yhensain ka nyah jyo yhomh das zis uhkung jens lyis nhang kat dyei bas jungh dung nyeis geh, ge.