Read Achang MAKHO 1 Bible Online

MAKHO 1 - Achang bible

MAKHO 1

¹Mangso dah Lo Yesu Khristu dah gausyis Dang cangxeih vpom;

²Lvpe Esaia lhaih toh zis gas, Yoeuh aq, nah cho sont langh das xiklyis, Ngos ngah loeuskyoh soeu lhyi nah xik pheh nhang kat.

³Mhanhdyvp mas dvyuk kaiq nyeis dah thwe ka, Yhensain dah cho lhyi sont toh geh, Nyah chokhyoh lyis soq dan geh, ge.

⁴Mhanhdyvp mas jeisnyhop dyei soeu Yohan thuq los las yaunos khyuot dyei das xiklyis nhaiqlom thaiq las jeisnyhop kham geh ge taiq hoeuh nyeis.

⁵Housoeh las Yuda mau gonh bang yahge Yerusalem mas bang dvnganh nyah jyank mas e lha, nyamoq dah yaunos lyis rhen lha, Yodan lvng mas nyah loq yah jeisnyhop dyei zis tsain xauh.

⁶Yohan ka gola-u mauh dyi wuot, thyikdom mas shohyeis dyichih chih toh. Nyah wom gas janghgyik yahge mhanhdyvp mas dah dyoyhei nghuot.

⁷Housoeh nyang taiq hoeuh zis gas, Ngah thoq lyis zes yombos soeu dvyuk ngah thang mha los das: ngos gas nyah thyvkoq twih lyis gop las phui das zis yangh ma mon.

⁸Ngos gas namoq lyis jeis yah jeisnyhop dyei, nghuot laus eq nyang gas namoq lyis Gyingshang Dyos yah jeisnyhop dyei das, ge.

⁹Hauh buisnyeis gyo lyis Yesu gas Galile mau, Nazaret masyah jweh los las, Yodan lvng, Yohan loq mas jeisnyhop kham.

¹⁰Yesu jeis masyah toq los yah dvyih, maukhung phank los las, hauh Dyos nyah thoq mas khotjyauh teh gyoh los yvlyis nyang nyvng.

¹¹Housoeh maukhung mhayah thwe dvkoeuq los zis gas, Nvng gas ngos jyetdap dah ngah Lo nghuot, ngos nvng lyis nhaiqdoeus, ge.

¹²Houjang Dyos gas nyang lyis mhanhdyvp pheh jyuonh kat.

¹³Nyang gas mhanhdyvp mas nyeici nyeih Satan yah shiwu las yewus jens yah nyeis uhlyis loeuswons bang nyang lyis los phuqsoe.

¹⁴Yohan thung khyoq zis xauh thang lhyi, Yesu gas Galile mau pheh loh las, Mangso dah Gausyis Dang lyis taiq kyoh zis gas,

¹⁵Shishenh nyuk los goeus las Mangso dah munghdan ni los goeus. Namoq dah yaunos masyah tauh los las Gausyis Dang lyis lomsjingh geh, ge.

¹⁶Yesu Galile thomh yvm chank yah suh loh lyis, oeng nhoh zo dah vmang vnoeuh aiq yuk Petru ge dah Simon yahge nyah vnoeuh Andre gas, thomh mas nyho yah oeng gaiq nyeis zis lyis nyvng.

¹⁷Yesu nyah zomh lyis taiq, Ngah thang mha chank los geh, ngos nah zomh lyis dius nhoh nhang das, ge.

¹⁸Nyamoq gas houjang yah nyamoq nyho tsain toh khoq las nyah thang mha chank loh.

¹⁹Xik pheh dvthungh loh lho lhyi, gohtoeu vmang vnoeuh dvzomh Zebedi dah lotang Yaku yahge Yohan lyis nyvng. Nyamoq gas lhyik khau mha nyho pho nyeis.

²⁰Housoeh Yesu gas nyah zomh lyis nyvng yah dvyih nyah zomh lyis khi. Nyah zomh gas nyah zomh dah uwus Zebedi yahge uhkung jens lyis lhyik mas toh khoq las Yesu thang mha chank loh.

²¹Yesu yahge nyah changlo jens gas Kaperna-um wus mas jweh loh. Yuda No Buisnyeis jweh lyis Yesu gas lyi jungs mas wvng las jyauh.

²²Nyang gas maussauh lhaih bang teh ma nghuot, vmingh bos soeu teh jyauh yvmvyah nyamoq gas nyang jyauh cho lhyi mauh.

²³Hauh uhlyis nyamoq dah lyi jungs khau mha yius wvng dah dius dvyuk nyetlos nyettant kaiq ngaus zis gas,

²⁴Nazaret phoq Yesu eh, nvng ngamoq yah cha sen lah? Nvng ngamoq lyis mhont das xiklyis los lhyeh? Ngos nvng hank nghuot zis seq; Nvng gas Mangso dah Gyingshang Soeu nghuot, ge.

²⁵Yesu nyang lyis nyho lha taiq zis gas, No aq, nyah jyank masyah thuq loh aq, ge.

²⁶Housoeh las yius gas, hauh soeu lhyi huonh nhang lho lha, yomkat kaiq las nyah jyank masyah thuq loh.

²⁷Nyamoq dvnganhmoq mauh las nyei goh zis gas, Haih zis cha nghuot au? Jyauh cho vsaiq nghuot lhyeh? Nyang vmingh dyei yvlyis yius eq tsain gyo dyei, ge.

²⁸Houjang yah Galile vyvm vwi mas bang dvnganhmoq gas dvkhauyah nyah cho tsain taiq hoeuh loh.

²⁹Nyamoq lyi jungs masyah thuq lyih thangjang nyamoq gas Yaku, Yohan yah dvgeh Simon yahge Andre yhen mha wvng loh.

³⁰Houmha Simon dah yuknyih gungs ngeh las nos lhain toh. Houjang nyamoq gas nyah cho Yesu lyis tsain taiq kyoh.

³¹Yesu los las, nyang lyis loq masyah she toq lho lhyi, hau gungs ngeh las nos zis gis goeus las, nyang nyamoq lyis daih.

³²Nyenhthang buis wvng zoh lyis, nos bang, yius kuq bang dvnganh lyis nyah jyank mas tsain shwih lyih.

³³Dvwus gonh bang hauh khomhdwang mas lyih tsain huom toh.

³⁴Nyang gas nos bang, noslom vja ja bos bang dvnganh lyis gis los nhang. Yius jens lyis eq khat tyamp. Nyamoq gas nyang lyis seq yvmvyah nyang nyamoq lyis dang ma taiq nhang.

³⁵Nvpsangh nyoq ma nyvng shih lyis, nyang toq las mhanhdyvp pheh loh las shvmanh dung.

³⁶Hauh uhlyis Simon yahge nyang yah dvgeh nyeis bang gas, nyang lyis chank xo.

³⁷Nyang lyis nyamoq nyvng lyis taiq zis gas, Dvnganhmoq yah nvng lyis xo nyeis, ge.

³⁸Nyang nyamoq lyis taiq zis gas, Vyvm vwi mas dah wugungs mas tsain loh goh: khasoeh ge lyis ngos jweh los zis gas, hauh yvmas eq yoh taiq kyoh das xiklyis nghuot, ge.

³⁹Housoeh nyang gas Galile dvmau gonh loh las lyi jungs mas tsain taiq hoeuh las yius lyis eq khat thuq dyei.

⁴⁰Mvnggvng dap soeu dvyuk nyang lyis los dupaiq las dung zis gas, Nvng bauh nghuot lyis gas ngos lyis yoh thyauhlhyang los nhang, ge.

⁴¹Nyang nhaiq yoeuh nyen yvmvyah nyah loq yhonh kat las nyang lyis tanh uhlyis yah taiq zis gas, Ngos mes, nvng thyauhlhyang los bas jungh, ge.

⁴²Houjang mvnggvng nos gis goeus las, nyang gas thyauhlhyang goeus.

⁴³Yesu gas nyang lyis zaih nhang lha lvnyap nhang kat.

⁴⁴Haih cho hank lyis eq vtaiq kyoh, nghuot laus eq nvnyang gungs phudyei soeu jyank mas loh chixoeuq aq, Moshe dah lyi yah dvyhangteh loh phudyei aq: khasoeh ge lyis, nyamoq xiklyis kanghjyoeng nghuot bas jungh, ge.

⁴⁵Nghuot laus eq nyang thuq loh las, hauh cho nyoshoq moq lyis taiq hoeuh loh. Housoeh yvmvyah nyang gas wugungs mas debangh ma yoh loh. Nyang gas mhanhdyvp mas nyeis lyis, khyiq khanghmuh mas bang nyah jyank mas los.