Read Achang MAKHO 10 Bible Online

MAKHO 10 - Achang bible

MAKHO 10

¹Hou mhayah nyang toq las, Yodan lvng thyitvp Yuda wuxom mha jweh loh lyis moqjens nyah jyank mas doms zain los yvmvyah, nyang gyangh kuot vgus nyamoq lyis jyauh.

²Housoeh Pharishe moq nyah jyank mas los las, nyang lyis shiwu zoh lyis nyei zis gas, Yhensain phoq gas yhensain nyhiq lyis she tyamp das zis lyi vbos lah, ge.

³Nyang nyamoq lyis phuk taiq zis gas, Moshe namoq lyis khasoeh ge tying toh lah, ge.

⁴Nyamoq taiq zis gas, Kangh dah maussauh lhaih toh las, nyang lyis nhang kat das zis Moshe kuot nhang toh, ge.

⁵Yesu nyamoq lyis taiq zis gas, Namoq nhaiqlom tsain than yvmvyah, Moshe haih lyi lhaih toh.

⁶Nghuot laus eq, mauthuq nyeiszvn masyah Mangso ka vbusbih yahge vmesbih lyis gvnkhanh toh goeus.

⁷Housoeh yvmvyah vbusbih gas nyah ungwes uwus lyis toh khoq zis yah, nyah yhensain nyhiq yah tsoq las,

⁸nyah zomh gas gungsshoh dvkoeuq kyingh nghuot das. Housoeh nyah zomh gas aiq yuk ma nghuot, gungsshoh dvkoeuq dvnghuot lo.

⁹Housoeh Mangso tsomp toh yvlyis dius yah ma kangh bas jungh, ge.

¹⁰Yvpkhau mha tsain nyeis uhlyis changlo jens gas haih cho nyang lyis doms tsain nyei.

¹¹Housoeh las nyang nyamoq lyis taiq zis gas, Hank laus eq nyah yhensain nyhiq lyis she tyamp las, gohtoeu dvyuk phoengh doms hwank lyis gas, nyang nyi shuot zis nghuot.

¹²Housoeh vmesbih eq nyah yhensain phoq lyis she tyamp las, gohtoeu dvyuk yah phoengh doms wvng lyis gas, nyang lvng shuot zis nghuot, ge.

¹³Loshang jens lyis tanh dyei bas jungh, ge nyamoq gas nyah jyank mas tsain shwih lyih. Nghuot laus eq changlo jens gas nyamoq lyis nyho.

¹⁴Yesu hauh zis lyis nyvng lyis nhaiqyo las nyamoq lyis taiq zis gas, Loshang jens lyis ngah jyank mas los nhang geh, nyamoq lyis vtomp toh goh: khasoeh ge lyis Mangso munghdan gas housoeh teh bang dah xiklyis nghuot.

¹⁵Ngos namoq lyis jyoengh taiq bah, hank laus eq Mangso munghdan lyis loshang teh ma lhom yoeus soeu ka, nyang houmha ma xauh wvng loh das, ge.

¹⁶Yesu loshang jens lyis po lha nyamoq thoq mas loq kih las shvmanh dyei.

¹⁷Tsai nyang cho mha doms loh nyeis lyis dius dvyuk wuih los las, phvluk zomhgyuis zis yah nyang lyis nyei zis gas, Gis dah Svra eh, ngos vcaiq vto kang yoh das xiklyis cha kuot chah lah, ge.

¹⁸Yesu nyang lyis taiq zis gas, Nvng ngos lyis chamus Gis soeu oen lui lah? Mangso mha lai las gis soeu dvyuk eq ma bos.

¹⁹Lyi mas, nyi shuot lvng vshuot, dius vsat, vkhauh, ma ying kanghjyoeng vkat, v-an zo, nah ungwes uwus lyis phauh nyang aq, ge zis nvng seq toh goeus, ge.

²⁰Hauh soeu phuk taiq zis gas, Svra eh, hauh goeu dvnganh zis lyis ngos loyvm yoq lyis yah chank goeus, ge.

²¹Yesu nyang lyis yoeuh uhlyis yah jyet las nyang lyis taiq zis gas, Nvng dvja chah shih, nvng loh las nvng yoh ya yoh zis lyis ungh las nyungs bang lyis gvm dyei aq: housoeh lyis maukhung mha zisyos yoh das, housoeh nvng ngah thang mha chank los aq, ge.

²²Hauh dang khonh xauhgyo lyis nyang nyoqnho shen. Nyang nhaiqkuk zis yah loh lo: Khasoeh ge lyis nyang gas zisyos nyoshoq yoh soeu nghuot.

²³Housoeh Yesu zuilhaink yah yoeuh lho lha nyah changlo jens lyis taiq zis gas, Yoh khuiq bang gas Mangso munghdan mas wvng das zis kha iq yau, ge.

²⁴Changlo jens gas nyah dang lyis tsain gyo mauh nyeis. Nghuot laus eq Yesu nyamoq lyis doms taiq zis gas, Loshang jens eh, Mangso munghdan mas wvng das zis kha iq yau!

²⁵Dis soeu ka Mangso munghdan mas wvng lwis thoq lyis gola-u gas nghvpnho mha lai das zis zes lwis, ge.

²⁶Nyamoq gas svsoh mauh las dvyuk yah dvyuk taiq goh zis gas, Housoeh lyis gas khyuot yoeus zis hank xauh das lah, ge.

²⁷Yesu nyamoq lyis yoeuh las taiq zis gas, Haih zis gas dius yah gas ma gis bweh, nghuot laus eq Mangso ka ma gis bweh zis ma nghuot: khasoeh ge lyis Mangso yomsoq gas dvnganh zis yoh bweh, ge.

²⁸Hauh uhlyis Petru nyang lyis phuk taiq zis gas, Yoeuh aq, ngamoq gas vyhang dvnganh toh tyamp las nah thang mha chank los goeus, ge.

²⁹Yesu phuk taiq zis gas, Ngos namoq lyis jyoengh taiq bah, hank laus eq ngos yahge hauh gausyis dang nyhenshang yhen, vmang vnoeuh, nhamhmuh jens, ungwes, uwus, yhensain nyhiq, lo jens, maunyeis yvsoh toh tyamp soeu ka,

³⁰shoeuhshih zis yah dvgeh, haq caiq mas yhen, vmang vnoeuh, nhamhmuh, ungwes, lo jens yahge maunyeis yvsoh dvxo huon yoh yoeus das, jweh los das caiq mas eq vcaiq vto kang yoh das.

³¹Nghuot laus eq cangxeih bang nyoshoq gas thang thank nghuot das. Thang thank bang cangxeih nghuot das, ge.

³²Gvshih nyamoq gas Yerusalem pheh doq loh cho mha nghuot. Yesu gas nyamoq dah xik mas loh nyeis las nyamoq mauh. Nyah thang mha chank loh bang eq gyuk nyeis. Nyang gas changlo dvci aiq yuk lyis khi yoeus las nyang mas bweh das cho nyamoq lyis taiq kyoh zoh loh zis gas,

³³Yoeuh aq, yang Yerusalem pheh doq loh nyeis. Hau Cangsoeu Lo gas phudyei uhjyung jens yahge maussauh lhaih bang loq mas kyauh tyamp zis xauh das. Nyamoq gas nyang lyis shei das cho dang thang thyet las, nyang lyis gohnyau bang dah loq mas kyauh tyamp das.

³⁴Nyamoq gas nyang lyis jwangh, svkanh dyeh gyuon, lyuk las sat das. Somh vnyeih lyis nyang dwis toq das, ge.

³⁵Zebedi lotang Yaku yahge Yohan nyah jyank mas e sang zis gas, Svra eh, ngah zomh sang ya sang zis nvng ngah zomh lyis kuot dyei das yvlyis ngah zomh o, ge.

³⁶Nyang nyah zomh lyis taiq zis gas, Ngos nah zomh lyis cha kuot dyei das yvlyis o lah, ge.

³⁷Nyah zomh phuk taiq zis gas, Nah phunk nyoqnho yah hwankti tank mas tsung uhlyis ngah zomh lyis nah loqyos pheh dvyuk, loqwi pheh dvyuk tsung nhang aq, ge.

³⁸Nghuot laus eq Yesu nyah zomh lyis taiq zis gas, Nah zomh cha sang nyeis zis nah zomh nyang ma seq. Ngos shuk kom lhyi nah zomh yoh shuk das lhyeh? Ngos kham dah jeisnyhop cho lhyi eq nah zomh yoh kham das lah, ge.

³⁹Nyah zomh gas, Ngah zomh yoh kuot das, ge. Yesu nyah zomh lyis taiq zis gas, Ngos shuk kom lhyi nah zomh xauh shuk das; ngos kham dah jeisnyhop lyis eq xauh kham das.

⁴⁰Nghuot laus eq ngah loqwi loqyos mas yoh tsung das vmingh ngos ma yoh dyei. Houka sont toh dyei bang xiklyis dvnghuot, ge.

⁴¹Hauh zis dvci yuk moq xauhgyo lyis, nyamoq gas Yaku yahge Yohan lyis nhaiq tsain yo.

⁴²Housoeh Yesu nyamoq lyis khi yoeus las taiq zis gas, Gohnyau lyis guon das bang gas, nyamoq dah thoq mas zau las, nyamoq mas kuh bang gas nyamoq thoq mas vmingh tsain bos yvlyis namoq seq.

⁴³Nghuot laus eq namoq mas gas housoeh ma gis nghuot; namoq mas uhjyung duot mes soeu hank laus eq namoq dah jyeidwis duot chah.

⁴⁴Namoq mas uhjyung duot mes soeu hank laus eq, dvnganhmoq dah jyeidwis duot bas jungh.

⁴⁵Khasoeh ge lyis, hau Cangsoeu Lo gas phuqsoe kham das xiklyis jweh los zis ma nghuot. Phuqsoe das zis yahge nyoshoq lyis khyuot yoeus das xiklyis, nyah kang dyei das zis dvjweh los, ge.

⁴⁶Nyamoq Yerikho wus mas jweh las nyang gas nyah changlo jens yahge dius moqjens yah dvgeh Yerikho masyah thuq loh lyis Timiu dah lo nyoqjet Batimiu gas choyvm mas tsung lha dung zo nyeis.

⁴⁷Nazaret phoq Yesu nghuot zis lyis xauhgyo lyis nyang kaiq las, Dawi dah Lo Yesu eh, ngos lyis nhaiqnyen aq, ge.

⁴⁸Nyang samlo nyeis das xiklyis nyoshoq moq nyang lyis tung toh, nghuot laus eq nyang gas zes kaiq las, Dawi dah Lo eh, ngos lyis nhaiqnyen aq, ge.

⁴⁹Yesu gas yap las, Nyang lyis khi los aq, ge. Housoeh las nyamoq gas hau nyoqjet soeu lhyi lui zoh lyis yah, Yomhuont aq, toq aq, nyang nvng lyis khi nyeis, ge.

⁵⁰Nyang gas nyah dyi khyuot lhwih tyamp lha Yesu jyank mas tsangh toq loh.

⁵¹Yesu nyang lyis taiq zis gas, Ngos nvng lyis cha kuot dyei das zis o lah, ge. Nyoqjet soeu nyang lyis taiq zis gas, Svra eh, ngah nyoq doms nyvng nhang aq, ge.

⁵²Yesu nyang lyis taiq, Suh loh aq, nah lomsjingh zis gas nvng lyis gis los nhang goeus, ge. Houjang yah nyah nyoq nyvng los las, gyung cho mhayah Yesu thang mha chank loh.