Read Achang MAKHO 11 Bible Online

MAKHO 11 - Achang bible

MAKHO 11

¹Gvshih nyamoq Yerusalem yahge Tsanlun boms nvm, Betphage yahge Bethani wukhau mha jweh los lyis, nyang nyah changlo aiq yuk lyis nhang lha taiq kat zis gas,

²Nah aiq yuk xik mas dah wukhau mha loh geh: houmha wvng loh yah dvyih hank eq ma ji ku shih dah mauhlyihzoe lo twih toh zis lyis nah aiq yuk nyvng das: hauh yvlyis phui she los geh.

³Dvyuk yuk nah aiq yuk lyis chamus housoeh kuot goh lah, ge nyei lyis nah aiq yuk gas, Yhensain hauh yvlyis yhung chah. Nyang hauh yvlyis lvnyap doms tauh dyei das oen geh, ge.

⁴Nyah aiq yuk loh las choyvm khomh nghe pheh twih toh dah mauhlyihzoe lyis nyvng. Nyamoq hauh yvlyis phui nyeis lyis,

⁵houmha yap joq bang dvyhamh gas, Nah aiq yuk hauh mauhlyihzoe lyis chamus phui goh lah, ge nyei.

⁶Yesu nyah aiq yuk lyis vmingh dyei kat vgus nyamoq lyis tsain taiq. Housoeh las nyamoq gas nyah aiq yuk lyis yoeus nhang.

⁷Hauh uhlyis nyah aiq yuk gas, hau mauhlyihzoe lyis Yesu jyank mas she loh las, hauh thoq mas nyamoq dah dyimis nyhoeuh las, nyang houmha ji.

⁸Nyoshoqmoq eq nyamoq dah dyi yah cho mha tsain nyhoeuh dyei. Gohtoeu dvyhamh bang gas pa mha dah saiq kyang zan las cho mha nyhoeuh dyei.

⁹Xik pheh loh bang yahge nungs pheh chank bang gas kaiq las, Mangso lhyi chungh goh! (Hosana!) Yhensain dah nyings mas jweh los soeu ka ngelhoq:

¹⁰Yhensain nyings mas jweh los das dah yah Uwus Dawi dah munghdan gas ngelhoq: Nyhang thank Mangso lhyi chungh goh, ge.

¹¹Nyang Yerusalem mas wvng loh las, yhenmuh mas eq wvng loh. Vyhang dvnganh zis lyis dye yoeuh lyis mau chuot los las dvci aiq yuk yah dvgeh Bethani pheh thuq loh.

¹²Nungs nvp nyamoq Bethani masyah thuq los lyis, nyang wom yuot.

¹³Housoeh vhuq moengh joq dah maiphang dvzains lyis nyang we masyah nyvng kat las, houmha shih dvlom lom xauh yoeus mvbeh ge nghamh las loh. Houmha jweh lyis, maiphang shih shih nyos ma nghuot yvmvyah vhuq lyis kyingh dvnyvng.

¹⁴Housoeh las Yesu hauh yvlyis, Hank khanhamp eq nah vshih ma doms zo lo bas jungh, ge. Nyah changlo jens eq hauh zis lyis xauhgyo.

¹⁵Nyamoq Yerusalem mas jweh lyis, hau yhenmuh mas eq nyang wvng loh las hau yhenmuh khau mha kaih ungh kaih wis bang lyis khat thuq tyamp; ngwis thaiq bang dah kihgus yahge khotjyauh ungh bang dah tank lyis eq toeu phanh tyamp.

¹⁶Nyang hau yhenmuh mas hank lyis khuq dvkhyvp eq ma chi lai nhang.

¹⁷Nyang nyamoq lyis jyauh las taiq zis gas, Ngah yhen ka dius nyau khanghmuh shvmanh dung yhen, ge lui das ge lhaih toh ma nghuot lhyeh? Nghuot laus eq namoq gas hauh yvlyis khyanktau khyung tsain kuot, ge.

¹⁸Maussauh lhaih bang yahge phudyei uhjyung jens hauh zis xauhgyo lyis, Yesu lyis sat das cho tsain xo. Khasoeh ge lyis dius dvnganhmoq gas nyang jyauh cho lhyi mauh yvmvyah nyamoq gas nyang lyis gyuk nyeis.

¹⁹Nyensyo jweh los las wus nghe pheh thuq loh.

²⁰Nvpsangh lyis nyamoq suh lai loh lyis hau maiphang zains gas vnyet eq cheq kyuk joq yvlyis nyamoq nyvng.

²¹Housoeh Petru nghamh soh los las nyang lyis taiq zis gas, Svra eh, yoeuh aq, nvng nhoengh dah maiphang zains gas kyuk tyamp goeus, ge.

²²Yesu nyamoq lyis phuk taiq zis gas, Mangso lhyi lomsjingh geh.

²³Ngos namoq lyis jyoengh taiq bah, hank laus eq khamkhvv ehnyet ma bos bos vsainnyang taiq zis yah dvyhangteh bweh das, ge lomsjingh nghuot lyis gas haih boms lyis, Nvng ywi las thomh mas cheh wvng aq, ge lyis nvng taiq vgus bweh das.

²⁴Housoeh las ngos namoq lyis taiq bah, namoq o zis shvmanh dung lyis namoq yoh yoeus goeus oen loms lyis, namoq xauh yoeus das.

²⁵Shvmanh dung las yap joq uhlyis, dius dvyuk yuk nvng lyis dvja ja toq lhoq cu lhyi maukhung mha namoq dah Uwus gas namoq dah yobos lyis yoh khyuot tyamp dyei bas jungh, nyah yobos lyis khyuot dyei aq.

²⁶Namoq nyah yobos ma khyuot dyei lyis, maukhung mha namoq dah Uwus gas namoq yobos lyis ma khyuot dyei, ge.[5]

²⁷Nyamoq gas Yerusalem mas doms jweh loh: nyang yhenmuh khau mha suh loh lyis, phudyei uhjyung jens, maussauh lhaih bang yahge logis jens nyah jyank mas jweh lyih las,

²⁸Nyang lyis taiq zis gas, Nvng gas chah vmingh yah kuot? Nvng lyis haih vmingh hank dyei, ge.

²⁹Yesu nyamoq lyis phuk taiq zis gas, Ngos namoq lyis dang dvkhonh nyei yoeuh bah, ngos lyis phuk taiq geh, housoeh lyis ngos chah vmingh yah heinyhoq zis kuot yvlyis ngos namoq lyis taiq kyoh das.

³⁰Yohan dah jeisnyhop cho ka maukhung mhayah nghuot lah? Dius masyah nghuot lah, ngos lyis taiq kyoh geh, ge.

³¹Nyamoq gas nyang changh nyang taiq goh las, Maukhung mhayah nghuot oen yang taiq lyis gas, Housoeh lyis namoq nyang lyis chamus ma lomsjingh goh lah, ge das.

³²Nghuot laus eq yang nyang lyis dius masyah nghuot oen das lah? Nyamoq moqjens lyis gyuk: khasoeh ge lyis Yohan gas lvpe jyoengh nghuot zis lyis dvnganhmoq jingh, ge.

³³Housoeh las nyamoq gas Yesu lyis, Ngamoq ma seq, ge phuk taiq. Yesu nyamoq lyis taiq zis gas, Ngos haih muh chah vmingh yah kuot zis namoq lyis ma taiq kyoh das, ge.