Read Achang MAKHO 12 Bible Online

MAKHO 12 - Achang bible

MAKHO 12

¹Nyang nyamoq lyis dangtoeuq yah taiq xi loh zis gas, Dius dvyuk zvbiq dvkhyam ba tsungh toh lho lha, yvmlhaink yah khyam kyamp las, zvbiq nyhet zwvng eq doeu toh. Tyoeuq zvm eq thung lho lha, khyam muh zwi bang lyis tsoeuh dyei khoq las we mau pheh loh.

²Shishenh jweh lyis, khyam tsoeuh zwi bang jyank masyah zvbiq shih gvmboms xauh yoeus das xiklyis jyeidwis dvyuk lyis nhang kat.

³Nyamoq gas nyang lyis nyhik yoeus, bat las gungskom nhang kat.

⁴Nyang gohtoeu jyeidwis dvyuk lyis nyamoq jyank mas doms nhang kat. Nyamoq gas hauh soeu dah uhloms lyis bat las, xoq lhoeu phuh kat.

⁵Tsai, nyang gohtoeu dvyuk doms nhang lhyi, nyamoq hauh soeu lhyi sat. Gohtoeu nyoshoq yuk lyis nhang kat lyis eq, nyamoq gas dvyhamh lyis bat pop, dvyhamh lyis sat.

⁶Nyang jyetdap lo dvyuk nyeis shih: ngah lo lyis gas nyamoq phauh das ge nghamh las, thang thank lyis nyang lyis eq nyamoq jyank mas nhang kat.

⁷Nghuot laus eq khyam kuot nyang changh taiq goh zis gas, Haih soeu ka yhenzis zom das soeu nghuot, los geh, nyang lyis sat goh. Housoeh lyis nyah yhenzis gas yah zis nghuot das, ge.

⁸Housoeh nyamoq gas nyang lyis nyhik lho lha sat las, zvbiq khyam nghe pheh doeuh tyamp.

⁹Housoeh yvmvyah zvbiq khyam sain ka, khasoeh kuot das lah? Nyang gas khyam tsoeuh zwi bang lyis los mhont las hauh zvbiq khyam gohyuk lyis dyei das.

¹⁰Lhaihtoh dang mas, Yhen tsuk bang peq tyamp dah luklom gas Yhenthunk lukzains bweh los.

¹¹Haih zis gas Yhensain nyang kuot las, yah xikkhonh mas mauhphoh zis nghuot, ge zis lyis namoq ma nghap yoeuh goh lhyeh, ge.

¹²Housoeh las nyamoq gas nyang lyis nyhik das zis tsain yomkat laus eq moqjens lyis gyuk: khasoeh ge lyis haih dangtoeuq gas, nyang nyamoq lyis toeuq las taiq yvlyis nyamoq seqgyo las, nyamoq gas nyang lyis toh khoq las thuq loh.

¹³Nyah dang mas yobos xo lha nyang lyis nyhik das xiklyis, nyamoq gas Pharishe moq yahge Herodia ge bang dvyhamh lyis nyah jyank mas nhang kat.

¹⁴Housoeh nyamoq jweh lyis taiq zis gas, Svra eh, nvng gas jyoeng zis nghuot las, hank lyis eq gungsyaus ma yaus, dius dah nyoqnho lhyi ma yoeuh, Mangso dah cho lhyi jyoeng khyvlyis jyauh nyeis zis gas ngamoq seq. Hwankti Kesar lyis khoengh kat das zis lyi bos lah, ma bos lah?

¹⁵Ngamoq kat das au, ma kat das au, ge. Nghuot laus eq nyang gas yamoq dah ehnyet gis guons kuot zis seq las nyamoq lyis taiq zis gas, Namoq ngos lyis chamus shi yoeuh goh lah? Hauh ngwis dvkyvp ngah jyank mas chi los geh, ngos yoeuh bah, ge.

¹⁶Housoeh las nyamoq ngwis dvkyvp yoeus los lyis, nyang nyamoq lyis taiq zis gas, Haih zis hank gungslho yahge maussauh dap lah, ge. Nyamoq gas, Kesar zis nghuot, ge.

¹⁷Housoeh las Yesu nyamoq lyis phuk taiq zis gas, Kesar zis nghuot lyis gas Kesar lyis dyei geh; Mangso zis nghuot lyis gas Mangso lhyi dyei geh, ge. Nyamoq gas nyang lyis svsoh tsain mauh.

¹⁸Hauh thang lhyi, Dwis toq cho ma bos ge taiq dah Saduke moq nyah jyank mas los nyei zis gas,

¹⁹Svra eh, Yhensain nyhiq bos dah vmang, lo ma bos khoq shei lhyi, vmang dah chauhmuh lyis vnoeuh shoeuh las vmang dah vshih tsoq bas jungh ge Moshe ngamoq lyis lhaih toh dyei.

²⁰Housoeh teh dah vmang vnoeuh moq nyhet yuk nyeis. Xik lyis dah vyuk gas phoengh hwank las nyau ma bos shei khoq.

²¹Aiq vyuk chauhmuh shoeuh las lo ma bos shei khoq. Somh vyuk eq housoeh vgus nghuot.

²²Hau nyhet yuk gonh nyang lyis shoeuh laus eq lo ma bos. Thang thank lyis hauh vmesbih eq shei loh.

²³Gvshih hau dwis toq los uhlyis, nyang gas hank dah yhensain nyhiq nghuot das lah? Khasoeh ge lyis nyang gas nyhet yuk moq yah phoengh wvng goeus, ge.

²⁴Yesu nyamoq lyis phuk taiq zis gas, Namoq lhaihtoh dang lyis ma seq, Mangso dah yomsoq cho lhyi eq ma seq yvmvyah shuot nyeis ma nghuot lhyeh?

²⁵Shei bang dwis toq lyis, nyamoq nyi hwank zis ma bos: lonyi dyeizo zis eq ma bos nyamoq gas maukhung mha loeuswons bang teh dvnghuot lo.

²⁶Hauh thoq lyis shei bang dwis toq los das cho yah sen lha, hauh mhanhgyomh mas Mangso ka, Ngos gas Abraham dah Mangso, Isak dah Mangso, Yakop dah Mangso nghuot, ge Moshe lhyi taiq toh dang lyis Moshe dah maussauh mas namoq ma nghap yoeuh goh lhyeh?

²⁷Nyang gas shei bang dah Mangso ma nghuot, dwis bang dah Mangso dvnghuot. Housoeh yvmvyah namoq svsoh shuot goeus, ge.

²⁸Maussauh lhaih bang mas dvyuk los las nyamoq taiq phyen-goh yvlyis xauhgyo zis yahge nyang vlhomuh phuk taiq yvlyis yoh seq las nyang lyis nyei zis gas, Tyingtoh dang dvnganh mas khah zis zes yhaugyen lah, ge.

²⁹Yesu nyang lyis phuk taiq zis gas, Israel jens eh, gyo yoeus geh, Lyi dvnganh yvmas cangxeih vkoeuq gas, Yhensain yah Mangso ka Yhensain dvyuk kyingh nghuot.

³⁰Yhensain nah Mangso lhyi nah nhaiqlom dvnganh yah, nah dyos dvnganh yah, nvng dolhain zis dvnganh yah, nah yom dvnganh yah yoh jyetdap das. Haih zis gas cangxeih tyingtoh dang nghuot.

³¹Aiq vkoeuq gas, Nvng nah yhenkyoh lyis nah gungs yah dvyhangteh yoh jyetdap das. Haih thoq lyis kuh dah tyingtoh dang gohtoeu ma bos lo, ge.

³²Maussauh lhaih soeu nyang lyis taiq zis gas, nghuot goeus svra eh, nvng taiq dah dang jus joq: Mangso dvyuk kyingh dvnghuot, nyah thoq lyis gohtoeu hank ma bos lo.

³³Hauh thoq lyis nhaiqlom dvnganh yah, seq gyo zis dvnganh yah, yom dvnganh yah nyang lyis jyetdap das zis yahge vsainnyang yhenkyoh lyis vsainnyang gungs yah dvyhangteh jyetdap das zis gas, nyi ngheq phudyei zis yahge lomhxangh dvnganh thoq lyis zes joq, ge.

³⁴Hauh soeu ka yik zis yah phuk taiq nyeis yvlyis Yesu nyvng lyis, Nvng gas Mangso munghdan yah ma we, ge nyang lyis taiq. Hauh thang lhyi ka, nyang lyis hank eq cha ma womh nyei lo.

³⁵Yesu yhenmuh mas jyauh uhjyangh phuk taiq zis gas, Khristu gas Dawi dah lo nghuot, ge maussauh lhaih bang khasoeh yoh taiq lah?

³⁶Khasoeh ge lyis Dawi nyah gungs nyang Gyingshang Dyos masyah taiq zis gas, Hauh Yhensain ngah Yhensain lhyi taiq zis gas, Ngos nah jeswus lyis nah khyei o mha toh shoq, Nvng ngah loqyos shot pheh tsung toh aq, ge.

³⁷Housoeh las Dawi nyang, nyang lyis Yhensain ge. Housoeh lyis nyah lo khasoeh yoh nghuot das lah, ge. Moqphung ka nyang lyis gausyis zis yah tsain gyo dyei.

³⁸Nyang nyamoq lyis jyauh uhlyis yah taiq zis gas, Maussauh lhaih bang lyis zaih geh: nyamoq gas dyixing wuot las suh mes, kaih mas phauh nyang zis yah jeshuh das zis eq,

³⁹Lyi jungs mas gis thank tsunggus lyis eq, pwe mha gis thank joqyos lyis eq tsain o mes.

⁴⁰Chauhmuh jens dah yhen lhyi kuot zo kuot shuk las, gis guons kuot zis yah shvmanh xing xing dung: hauh bang gas zes than dah dang thang thyet zis xauh das.

⁴¹Yesu gas ziskwi yah twi twi tsung lha, moqjens houmha ngwis kat yvlyis yoeuh nyeis: dis bang nyoshoq gas ngwis nyo nyo tsain kat.

⁴²Hauh uhlyis nyungs dah chauhmuh dvyuk lyih las dyvpson dvkyvp phauh dah thunkcent aiq kyvp kat.

⁴³Hauh gvng mas nyang nyah changlo jens lyis yoeuh las taiq zis gas, Ngos namoq lyis jyoengh taiq bah, hai nyungs dah chauhmuh gas, ziskwi mha kat bang dvnganh thoq lyis zes nyo shoq kat goeus.

⁴⁴Khasoeh ge lyis nyamoq dvnganhmoq gas nyamoq magons magoh yoh masyah vlu kat. Nghuot laus eq nyang gas vshoh vjyen masyah nyah kang khoeu das zis yoh zis dvnganh kat goeus, ge.