Read Achang MAKHO 13 Bible Online

MAKHO 13 - Achang bible

MAKHO 13

¹Nyang yhenmuh masyah thuq loh lyis nyah changlo dvyuk nyang lyis taiq zis gas, Svra eh, yoeuh aq khoek khoek dah luk yahge yhenzains yoszains tsain nghuot nyvng gah, ge.

²Yesu nyang lyis phuk taiq zis gas, Hai kuh dah yhenzains yoszains lyis nvng nyvng lhyeh? Hauh goeu gas ma thyoq thyoq, luk dvlom thoq mas dvlom kih toh zis ma bos lo das, ge.

³Yhenmuh yah twi twi, Tsanlun boms thoq mas nyang tsung toh uhlyis, Petru, Yaku, Yohan yahge Andre moq nyang lyis lhyenwhei nyei zis gas,

⁴Heinyhoq zis khanhamp nghuot das lah? Hai dvnganh nyuk los das lyis chah vlho thuq los das lah? Ngamoq lyis taiq kyoh aq, ge.

⁵Yesu nyamoq lyis phuk taiq zis gas, Namoq lyis hank eq chowhang ma shwih whang bas jungh zaih geh.

⁶Khasoeh ge lyis nyoshoq moq ngah nyings masyah thuq los las, Ngos gas Khristu nghuot ge nyoshoq lyis chowhang shwih whang das.

⁷Moeng zan zis yahge moeng dyoq dah loeus namoq xauhgyo lyis vchiq goh: hauh cho bweh chah, nghuot laus eq thang thank zis gas ma nghuot shih.

⁸Khasoeh ge lyis, dius dvnyau yah dvnyau, munghdan dvkoeuq yah dvkoeuq jes sont goh los das. Joqyos vdeh deh mas maunyeis dwis los das. Phanghkhauq gyoh das. Nghuot laus eq heika lokhoeu nos nos xi zis dvnghuot shih.

⁹Nghuot laus eq namoq gas vsainnyang gungs vsainnyang zaih geh. Nyamoq gas nhaiqbos huom mha namoq lyis kyauh tyamp das; lyi jungs mha namoq lyis batpop zis tsain xauh das; guon bang yahge hwankti jens xikkhonh mas shwih hwank las, ngah xiklyis kanghjyoeng bweh das zis xauh yap das.

¹⁰Dius nyau dvnganh lyis Gausyis dang shih xauh taiq hoeuh das.

¹¹Namoq lyis soetuon bang jyank mas shwih e lha, kyauh tyamp goeus ya, namoq dang khasoeh taiq das zis vchiq goh: hauh shishenh lyis namoq lyis taiq nhang zis yah dvyhangteh taiq geh: hauh zis gas nvng taiq nyeis zis ma nghuot, Gyingshang Dyos dvtaiq nyeis.

¹²Hauh uhlyis vmang gas vnoeuh lyis, vnoeuh gas vmang lyis, uwus gas vlo lyis shei yvpheh kyauh tyamp das: lo jens gas nyamoq dah nyhiphoq jens lyis jes kuot las sat nhang das.

¹³Ngah nyings gvng mas dius dvnganhmoq hoeng zis namoq xauh das. Thang thank jweh shoq jhen soeu ka khyuot yoeus zis xauh das.

¹⁴Nghuot laus eq lvpe Daniel taiq toh: lhoeu thyoq dah vchoqh vjyot zis gas ma yap vvng dah joqyos mas yap joq yvlyis namoq nyvng lyis, maussauh nghap soeu ka hauh yvlyis seqgyo bas jungh. Yuda mau mas nyeis bang gas boms pheh phang loh bas jungh.

¹⁵Yhenkhung mha nyeis soeu ka yhen khau mha ma gyoh los goeus jungh. Yhen khau mha dvja ja yoeus loh das ge eq ma wvng loh goeus jungh.

¹⁶Yos mas nyeis soeu eq nyah shanhzoe yoeus das zis ma tauh los goeus jungh.

¹⁷Hauh buisnyeis lyis loshang gungs nghuot bang yahge lonoeuh nauh gvmshuk bang gas mvtanhzoe nghuot!

¹⁸Namoq phang shishenh gas cungh lyis ma nghuot bas jungh, shvmanh dung nyeis geh.

¹⁹Khasoeh ge lyis, Mangso nyeisjvng vsaiq gvnkhanh masyah gvshih jweh shoq ma bweh ku, thang pheh eq ma bweh lo das shanghsenh gas hauh buisnyeis gyo lyis bweh thuq los das.

²⁰Hauh buisnyeis lyis Yhensain nyang ma shungh dyei lyis gas, hank eq ma yoh luiq. Nghuot laus eq nyang khyen toh bang xiklyis gas, hauh buisnyeis shungh dyei goeus.

²¹Hauh uhlyis dvyuk yuk namoq lyis, Yoeuh aq, Khristu heimha nyeis. Yoeuh aq, nyang thyimha nyeis, ge laus eq vjingh goh.

²²Khasoeh ge lyis ma ying dah Khristu jens yahge lvpe hwah jens thuq los las, gis bweh lyis Mangso khyen toh goeus bang lyis chowhang yoh shwih whang shoq, nyamoq vlho yahge mauh loqmuh chixoeuq das.

²³Namoq zaih geh, yoeuh aq, ngos namoq lyis dvnganh uhlhomh taiq toh.

²⁴Nghuot laus eq hau yaukyenh shanghsenh thang lhyi dah buisnyeis lyis buis eq soeng soeng noq los das. Lhamhmuh eq ma tso lo das.

²⁵Kyi eq maukhung mhayah dyet gyoh las, maukhung mha dah yomsoq nonh das.

²⁶Hauh shishenh lyis Cangsoeu Lo gas, yomsoq yahge phunk zainsmuh yah jyommauh yah gyoh los zis lyis nyamoq nyvng das.

²⁷Nyang nyah loeuswons bang lyis nhang lha, lyeis nyei shot, nyeisjvng vthang mhayah maukhung vthang mha jweh shoq nyang khyen toh bang lyis xwih tsainh das.

²⁸Gvshih hau maiphang zains masyah xuq yoeus geh: hauh dah vnyuk tuot las vhuq thuot los goeus ya, zvn wvng los goeus zis lyis namoq seq.

²⁹Houyah dvyhangteh namoq gas hau bweh los zis lyis nyvng lyis, nyang gas khomhdwang mas ni los goeus yvlyis seq geh.

³⁰Ngos namoq lyis jyoengh taiq bah, Haih zis ma nyuk los dvchank haq caiq ma lai das.

³¹Maukhung yahge nyeisjvng lai loh laus eq ngah dang gas ma lai loh das.

³²Nghuot laus eq hauh buisnyeis yahge shishenh lyis gas hank eq ma seq: Maukhung mha dah loeuswons bang ma seq, Lo eq ma seq, Uwus kyingh dvseq.

³³Namoq hauh shishenh khanhamp nghuot zis ma seq yvmvyah zaih las zungh nyeis geh.

³⁴Haih zis gas, dius dvyuk nyah yhen lhyi nyah jyeidwis jens lyis kyauh toh khoq las, nyang yuk nyang toeu lhyi muh gvm dyei lho lha, khomh zungh soeu lhyi eq zungh nyeis das xiklyis vmingh dyei khoq las gyung suh loh zis yah doeusgoh.

³⁵Khasoeh ge lyis hauh yhensain ka gungsgvm lyis, gyoq tuon nyen lyis, nyoq nyvng zoh lyis, khah shishenh lyis jweh los das yvlyis namoq ma seq yvmvyah zungh nyeis geh.

³⁶Housoeh ma nghuot lyis gas, nyang nyetlos nyettant los uhlyis namoq yhet joq zis lyis los nyvng das.

³⁷Ngos namoq lyis taiq zis gas, dvnganhmoq lyis taiq zis nghuot las, zungh nyeis geh, ge.