Read Achang MAKHO 14 Bible Online

MAKHO 14 - Achang bible

MAKHO 14

¹Hauh thang lhyi aiq nyeih lyis Lhuiq Kat Pwe yahge bicheih ma kat ohlhyoq zo pwe nghuot. Hauh uhlyis phudyei uhjyung jens yahge maussauh lhaih bang gas, nyang lyis tsoek yah khasoeh nyhik las sat das dah cho tsain xo nyeis.

²Nghuot laus eq nyamoq taiq zis gas, Pwe gyo lyis ma nghuot goeus jungh, dius hoeu toq mvbeh, ge.

³Nyang gas Bethani mas mvnggvng dap soeu Simon dah yhen, womjus mas tsung toh lyis, vmesbih dvyuk svsoh phauh dah mura nadu coeu kat dah luk thyoeu jywang lo lyis yoeus lyih las, hauh zis lyis khwih lho lha nyah uhloms mas huot kat dyei.

⁴Nghuot laus eq nyamoq dvyhamh nhaiqyo las nyang changh nyang taiq goh zis gas, Chamus haih coeu lhyi vyu vgeh kuot au?

⁵Khasoeh ge lyis hauh yvlyis ngwis kyvp somhxo nyet yah ungh las nyungs bang lyis gvm dyei das zis, ge nyamoq hauh vmesbih lyis nyho.

⁶Nghuot laus eq Yesu taiq zis gas, Nghuot goeus jungh, namoq nyang lyis chamus lhoeu yau goh, nyang gas ngah xiklyis gis dah muh kuot goeus.

⁷Khasoeh ge lyis, nyungs bang gas vjangh namoq yah dvgeh nyeis las, namoq nyamoq lyis gis zis kuot dyei mes uhlyis khanhamp eq yoh kuot dyei; nghuot laus eq ngos gas namoq yah vjangh ma nyeis.

⁸Nyang gas nyang duot nyhoq kuot goeus: nyang coeu huot kat dyei zis yah ngos lyis ba nyhop das xiklyis sont zis nghuot.

⁹Ngos namoq lyis jyoengh taiq bah, mungkvn gonh mas haih gausyis dang taiq hoeuh loh dah joqyos khanghmuh mas nyang lyis soh das nyhenshang hai nyang kuot khoq cho lhyi taiq kyoh das, ge.

¹⁰Changlo dvci aiq mas zis dvyuk nghuot dah Yudas Iskarot gas, Yesu lyis phudyei uhjyung jens jyank mas phanhlyen dyei das zis nyamoq jyank pheh e loh.

¹¹Hauh zis lyis nyamoq xauhgyo lho lhyi gaus las, nyang lyis ngwis dyei das dangthoengh tsain toh. Housoeh las nyang lyis yoh phanhlyen dyei das toeuh xo nyeis.

¹²Bicheih ma kat ohlhyoq zo pwe cangxeih nyeihyo Lhuiq Kat Pwe lomhxangh lainh das yvnglo phudyei uhlyis, nyah changlo jens nyang lyis nyei zis gas, Nvng Lhuiq Kat Pwe zo das xiklyis nvng ngamoq lyis khamha loh sont toh dyei langh nhang mes lah, ge.

¹³Nyang nyah changlo aiq yuk lyis nhang lha taiq kat zis gas, Wugungs mas wvng loh geh; jeis-jywang wuq soeu dvyuk nah aiq yuk yah xauhgoh das, nyah thang mha chank loh geh.

¹⁴Nyang khalhye wvng loh yvmas, hauh yhensain lhyi, Ngos yahge ngah changlo jens hau Lhuiq Kat Pwe zo das dah boenghdoq yvp khah zis nghuot lah, ge Svra nyei nhang kat, oen taiq geh.

¹⁵Hauh uhlyis nyang gas sont toh dah yhenthoq yvpmuh dvyvp tuonh shet das, yah nyhenshang houmha ba sont toh langh geh, ge.

¹⁶Hauh changlo tang thuq loh las, wugungs mas wvng loh lyis nyang nyah aiq yuk lyis taiq kat vgus nyvng las, hau Lhuiq Kat Pwe nyenhcon lhyi tsain ba sont toh.

¹⁷Nyenhthang lhyi, nyang hau dvci aiq yuk moq yah dvgeh jweh loh.

¹⁸Nyamoq tsung lha wom tsain zo nyeis lyis Yesu taiq zis gas, Ngos namoq lyis jyoengh taiq bah, namoq mas dvyuk ngos yah dvgeh wom zo soeu ka ngos lyis phanhlyen das, ge.

¹⁹Nyamoq kuk las dvyuk thang lhyi dvyuk, Ngos nghuot lah, ge tsain nyei.

²⁰Nyang nyamoq lyis phuk taiq zis gas, Dvci aiq yuk mas dvyuk, bvn khau mha ngos yah dvgeh jen zo soeu nghuot.

²¹Cangsoeu Lo gas nyah cho lhaih toh zis yah dvyhangteh xauh chah, nghuot laus eq Cangsoeu Lo lyis phanhlyen soeu ka mvtanhzoe nghuot! Nyang ma khoeu los ya nyah xiklyis zes gis das, ge.

²²Nyamoq housoeh zo nyeis lyis Yesu gas, ohlhyoq yoeus las shvmanh thang lhyi khyiq lho lha nyamoq lyis dyei uhlyis yah taiq zis gas, Namoq yoeus zo geh: haih zis gas ngah gungs nghuot, ge.

²³Nyang kom lhyi eq yoeus las dye chungh thang lhyi nyamoq lyis dyei lyis nyamoq dvnganhmoq hauh zis tsain shuk.

²⁴Nyang nyamoq lyis taiq zis gas, Haih zis gas nyoshoq moq xiklyis huot tyamp, ngah suih yah kuot toh thanghchvp nghuot.

²⁵Ngos namoq lyis jyoengh taiq bah, Mangso dah munghdan mas zvbiq saiq lyis ngos xauh shuk buisnyeis jweh shoq, zvbiq shih mas zis lyis ngos ma shuk lo das, ge.

²⁶Nyamoq chunghthwe dvkoeuq chungh lho lha, Tsanlun boms pheh thuq loh.

²⁷Yesu nyamoq lyis taiq zis gas, Khvnyens namoq dvnganhmoq ngah gvng mas ehnyet dyet das: Khasoeh ge lyis, Yvng yoeuh soeu lhyi ngos bat sat las, Yvng jens dyos loh das, ge lhaih toh.

²⁸Nghuot laus eq ngos gas dwis toq los nhang thang lhyi, Galile mau mas ngos namoq xik mas loh langh das, ge.

²⁹Petru nyang lyis taiq zis gas, Dvnganhmoq tyamp khoq laus eq ngos gas ma tyamp das, ge.

³⁰Yesu nyang lyis taiq zis gas, Ngos nvng lyis jyoengh taiq bah, khvnyens nyang gyoq aiq nyen ma tuon shih lyis nvng ngos lyis somh lhain he tyamp das, ge.

³¹Petru gas, Ngos nvng yah dvgeh shei chah lyis eq ngos nvng lyis ma he tyamp das, ge taiq. Nyamoq dvnganhmoq eq vgus housoeh taiq.

³²Nyamoq gas Gesemani ge yvmas jweh loh lyis, nyang nyah changlo jens lyis taiq zis gas, Ngos shvmanh dung uhlyis namoq heimha tsung langh geh, ge.

³³Nyang gas Petru, Yaku, Yohan moq lyis shwih las, nyang svsoh chiqjyen zis yah ehnyet nyo nyeis.

³⁴Nyang nyamoq lyis taiq zis gas, Ngos shei das shoq nhaiqkuk nhaiqngis nyeis. Namoq heimha phuksohlhaiq mus nyeis langh geh, ge.

³⁵Hou mhayah dvthungh loh shih lho lha nyeisjvng mas gop las shvmanh dung zis gas, Gis bweh lyis hauh shishenh ngah jyank masyah lai loh nhang aq.

³⁶Aba, Uwus eh, nvng dvnganh zis lyis yoh bweh nhang: haih kom lhyi ngah jyank masyah lhuiq tyamp dyei aq, nghuot laus eq ngos o khyvlyis ma nghuot, nvng o khyvlyis dvnghuot bas jungh, ge.

³⁷Nyang doms los lyis, nyamoq yhet joq yvlyis nyvng las Petru lyis taiq zis gas, Simon eh, nvng yhet muih joq lhyeh? Dvshishenh eq nvng ma yoh zungh langh lhyeh?

³⁸Phuksohlhaiq mus las shvmanh dung nyeis geh. Housoeh ma nghuot lyis namoq shiwu zis xauh das. Dyos gas mes laus eq gungsshoh gas yomnhuk joq, ge.

³⁹Tsai, nyang doms loh shih las vkhang dung dah dang khonh doms dung nyeis.

⁴⁰Doms tauh los lyis nyamoq doms yhet joq zis lyis los nyvng. Housoeh nyamoq gas svsoh yhet mes las nguis nyeis shih yvmvyah nyang lyis khasoeh phuk taiq das zis yangh ma seq.

⁴¹Housoeh nyang somh vlhain tauh los las nyamoq lyis taiq zis gas, Namoq yhet las lvlaihsoe no nyeis shih goh lhyeh? Geh goeus, shishenh jweh goeus, yoeuh aq Cangsoeu Lo gas yaunos wons bang loq mas phanhlyen dyei goeus.

⁴²Toq geh, yang loh goh, yoeuh aq, ngos lyis phanhlyen das soeu ka jweh los goeus, ge.

⁴³Nyang taiq nyeis shih lyis, changlo dvci aiq yuk mas dah Yudas yahge phudyei uhjyung jens, maussauh lhaih bang, logis jens jyank masyah bang moengsa yahge dunghkuq chi dah moqjens nyetlos nyettant los.

⁴⁴Nyang lyis phanhlyen soeu ka nyamoq lyis, Ngos bvlot tanh soeu ka hauh soeu nyang nghuot goeus. Nyang lyis nyhik las vlhomuh shwih loh geh, ge vsoh dyei toh vgus.

⁴⁵Nyang jweh yah dvyih nyah jyank mas dvlhain dvm e lha, Svra eh, ge bvlot tanh.

⁴⁶Nyamoq gas Yesu lyis dap nyhik las shwih loh.

⁴⁷Vyvm mas yap joq soeu dvyuk gas moengsa she lha Phudyei Zainsmuh jyeidwis dah no jap thyet dyei.

⁴⁸Yesu nyamoq lyis taiq zis gas, Namoq gas khyanktau nyhik das teh moengsa, dunghkuq chi lha ngos lyis nyhik das zis los goh lhyeh?

⁴⁹Jyauh uhlyis yah yhenmuh mas ngos namoq yah nyeih yau nyeih dvgeh nyeis laus eq namoq ngos lyis ma nyhik; nghuot laus eq lhaihtoh dang nyuk los chah, ge.

⁵⁰Nyamoq dvnganhmoq yah nyang lyis tyamp khoq las cangh loh.

⁵¹Shohchen mha jeimuh mis khuk chi dah loyvm dvyuk nyah thang mha chank loh. Nyang lyis nyamoq yah nyhik loh.

⁵²Nyang gas hau jeimuh mis lyis khyuot toh khoq las shohchen cangh loh.

⁵³Nyamoq gas Yesu lyis Phudyei Zainsmuh jyank mas shwih loh uhlyis, phudyei uhjyung jens, logis jens yahge maussauh lhaih bang dvnganhmoq huom toh.

⁵⁴Petru gas Phudyei Zainsmuh dah ganthoq mha jweh shoq we we masyah chank loh las zungh bang yah dvgeh joq tsung gvng nyeis.

⁵⁵Gvshih Phudyei uhjyung jens yah dvgeh nhaiqbos dvhuom gonh Yesu lyis yoh sat das dah kanghjyoeng tsain xo laus eq hank eq ma yoh.

⁵⁶Khasoeh ge lyis, nyoshoq moq nyah cho ma ying kanghjyoeng tsain kat laus eq, nyamoq dah kanghjyoeng dang ma tsain huq.

⁵⁷Hauh uhlyis dvyhamh toq las nyah cho ma ying kanghjyoeng tsain kat zis gas,

⁵⁸Haih soeu ka loq yah kuot toh dah hai yhenmuh lyis, ngos thyoq tyamp las somh nyeih gyo lyis loq yah ma kuot kuot, gohtoeu dvkoeuq doms kuot das, ge nyang taiq dang lyis ngamoq xauhgyo, ge.

⁵⁹Nghuot laus eq nyamoq dah kanghjyoeng dang gas ma huq shih.

⁶⁰Hauh uhlyis Phudyei Zainsmuh gas nyamoq xikkhonh mas toq yap las, Yesu lyis nyei, Nvng lyis tyixo kanghjyoeng kat nyeis zis cha nghuot, nvng ma phuk taiq lhyeh, ge.

⁶¹Nghuot laus eq nyang dvkhonh eq ma phuk taiq, samlo dvnyeis. Tsai, Phudyei Zainsmuh nyang lyis nyei zis gas, Nvng gas Ngelhoq soeu dah Lo ge, Khristu nghuot lah, ge.

⁶²Yesu taiq zis gas, Ngos nghuot. Hauh thoq lyis Cangsoeu Lo gas Yomsoq dah loqyos shot pheh tsung lha, maukhung jyommauh yah jweh lyih yvlyis namoq nyvng das, ge.

⁶³Phudyei Zainsmuh gas, nyah dyi lang chuiq zis yah taiq zis gas, Yang chah kanghjyoeng tsain chah shih lah?

⁶⁴Hauh loeusmus soqzo dang lyis namoq vxauhgyo shih goh lah? Namoq khasoeh dang thang thyet goh? Nyamoq dvnganhmoq gas, Nyang shei mon soeu nghuot, ge dang thang tsain thyet.

⁶⁵Dvyhamh gas nyang lyis svkanh dyeh gyuon. Nyah nyoqnho lhyi nghop dyei lho lha, nyang lyis chwiq las, Lvpe pe aq, ge nyang lyis taiq. Zungh bang eq nyang lyis tyuk las shwih loh.

⁶⁶Petru gas hauh yhen o ganthoq khau mha nyeis uhlyis, Phudyei Zainsmuh dah uhkung nyhiq dvyuk los las,

⁶⁷Petru joq gvng nyeis yvlyis nyvng lyis, nyang lyis yoeuh las taiq zis gas, Nvng eq Yesu ge dah Nazaret phoq yah nyeis ku, ge.

⁶⁸Nghuot laus eq nyang he lha taiq zis gas, Ngos ma seq, nvng cha taiq zis eq ngos ma seqgyo, ge. Nyang khyam khomh pheh thuq loh. Hauh uhlyis gyoq tuon los.

⁶⁹Hauh uhkung nyhiq nyang lyis doms nyvng lho lhyi, vyvm vwi yap joq bang lyis taiq zis gas, Haih soeu eq nyamoq mas zis dvyuk nghuot, ge.

⁷⁰Nyang gas doms he. Hauh thang lhyi dvsoq lyis vyvm vwi mas tsain yap joq bang eq Petru lyis taiq zis gas, Nvng nyamoq mas zis dvyuk jyoengh nghuot: nvng Galile dius eq nghuot, ge.

⁷¹Housoeh las nyang gas, Namoq taiq soeu lhyi ngos ma seq, ge nhoengh nhoengh khan khan maukhi.

⁷²Houjang gyoq aiq nyen tuon los. Housoeh las Petru gas, Gyoq aiq nyen ma tuon shih lyis nvng ngos lyis somh lhain he tyamp das, ge Yesu nyang lyis taiq dang lyis soh los las svsoh ngaus.