Read Achang MAKHO 15 Bible Online

MAKHO 15 - Achang bible

MAKHO 15

¹Nvpsangh yah phudyei uhjyung jens gas logis jens, maussauh lhaih bang yahge nhaiqbos huom gonh xam nyoq goeus las Yesu lyis twih lho lha Pilat jyank mas loh shwih kyauh tyamp.

²Pilat nyang lyis taiq zis gas, Nvng Yuda hwankti nghuot lhyeh, ge. Nyang phuk taiq zis gas, Nvng taiq nyeis, ge.

³Phudyei uhjyung jens yah nyang lyis nyoshoq ja kauq.

⁴Housoeh Pilat nyang lyis doms nyei zis gas, Nvng cha eq ma phuk taiq lhyeh? Yoeuh aq, nvng lyis nyamoq hounyhoq tyixo nyeis, ge.

⁵Nghuot laus eq Yesu cha eq ma doms phuk taiq yvmvyah Pilat mauh.

⁶Gvshih hauh pwe mas nyamoq lhuiq kat nhang mes dah thung lungh bang dvyuk yuk lyis nyang gyangh lhuiq kat dyei.

⁷Gomloeus toq yvmas dius sat las yobos zangh dah Baraba ge soeu gomloeus toq bang yah dvgeh thung lungh joq.

⁸Moqjens gas Pilat jyank mas e lha, nyang nyamoq lyis vjangh yah kuot dyei teh kuot dyei das xiklyis tsain sang zoh loh.

⁹Pilat phuk taiq zis gas, Namoq nyhenshang Yuda hwankti lhyi lhuiq kat dyei nhang mes lhyeh, ge.

¹⁰Khasoeh ge lyis phudyei uhjyung jens gas noh gvng mas nyang lyis kyauh tyamp yvlyis nyang seq.

¹¹Nghuot laus eq phudyei uhjyung jens gas, nyamoq xiklyis Baraba dvlhuiq kat dyei bas jungh, ge moqjens lyis jaus jyonh nyeis.

¹²Pilat nyamoq lyis doms phuk taiq zis gas, Housoeh lyis namoq Yuda hwankti ge lui soeu lhyi ngos khasoeh kuot das lah, ge.

¹³Nyamoq gas, Nyang lyis tapzains mas taplhangh toh aq, ge doms tsain kaiq.

¹⁴Pilat nyamoq lyis taiq zis gas, Chamus lah? Nyang ma gis zis cha kuot cu lah, ge. Nyamoq doms zes kaiq zis gas, Nyang lyis tapzains mas taplhangh toh aq, ge.

¹⁵Pilat eq moqphung lhyi ehnyet lhoq tap dyei mes las, nyamoq xiklyis Baraba lyis lhuiq kat dyei las, Yesu lyis gas lyuk lho lha tapzains mas taplhangh tyamp das xiklyis kyauh tyamp.

¹⁶Jeslo jens gas Yesu lyis mungh zau yhen mha shwih loh las nyamoq jes dvdvp gonh lyis khi tsainh toh.

¹⁷Nyamoq gas, nyang lyis nesnoq dah dyimis gvm huot, zoeu yah zaiq dah buismuk eq nyah uhloms mas tsungh dyei lho lha,

¹⁸Yuda hwankti kang xing bas jungh, ge nyang lyis tsain kaiq.

¹⁹Nyamoq gas nyah uhloms lyis jvmbu yau yah lyuk, svkanh eq dyeh gyuon, phvluk thuk las nyang lyis tsain paiq.

²⁰Nyamoq gas nyang lyis dye jwangh goeus ya, hau nesnoq dyixing lyis khyuot yoeus lho lha nyah dyi doms gvmhuot. Housoeh nyang lyis tapzains mas taplhangh das zis shwih thuq loh.

²¹Alesanda yahge Rufu dah uwus, Kureni Simon gas Pa mhayah wvng los nyeis yvlyis nyamoq gas nyang lyis Yesu dah tapzains tsoengh wuq nhang.

²²Nyamoq gas nyang lyis Golgotha ge yvmas shwih loh: hauh dang jyuk gas Uhkhangh ge dah joqyos nghuot.

²³Nyamoq gas mura yah lhoeuq dah zvbiq nyang lyis gvmshuk. Nghuot laus eq nyang hauh yvlyis ma lhom yoeus.

²⁴Nyamoq gas nyang lyis dye taplhangh thang lhyi, nyah dyi lyis hank yoeus vvng ge tsain doeugoh..

²⁵Nyang lyis nyamoq lhangh tyamp zis gas, gau shishenh lyis nghuot.

²⁶Hauh thoq mas YUDA HWANKTI ge nyang lyis kauq dah dang khonh lhaih tap toh.

²⁷Nyamoq gas khyanktau aiq yuk lyis eq, nyah loqyos shot pheh dvyuk, loqwi shot pheh dvyuk nyang yah dvgeh tsain taplhangh toh.

²⁸Houka, Nyang lyis lyi lhyweq bang yah bos suon tap tyamp goeus, ge dah lhaihtoh dang nyuk los.[6]

²⁹Suh e loh bang eq ma phauh ma nyang lainkamh nocwih kuot las, Ah! yhenmuh lyis thyoq tyamp las somh nyeih gyo lyis doms kuot soeu eh,

³⁰Nvnyang gungs lyis khyuot yoeus las tapzains masyah gyoh los aq, tsain ge.

³¹Phudyei uhjyung jens eq houyah dvyhangteh nyang lyis jwangh las, maussauh lhaih bang yah nyamoq nyang taiq goh zis gas, Nyang gohyuk lyis gas khyuot yoeus, nyang gungs nyang gas ma yoh khyuot yoeus nyvng!

³²Ngamoq nyvng las yoh lomsjingh bas jungh, hauh Israel dah hwankti, Khristu tapzains masyah gvshih gyoh los aq, ge dvyuk dvyuk tsain taiq jwangh. Nyang yah dvgeh tapzains mas lhangh toh vzomh eq nyang lyis ma phauh ma danh tsain taiq.

³³Nyeih gungs jweh lyis dvmau gonh chuot joq zis somh shishenh jweh shoq nghuot.

³⁴Somh shishenh lyis Yesu thwe zainsmuh yah kaiq zis gas, ELOI, ELOI LEMA SABAKTHANI ge. Hauh vjyuk gas, Ngah Mangso eh, ngah Mangso eh, nvng ngos lyis chamus doeuh tyamp toh lah, ge zis nghuot.

³⁵Hauh vyvm mas yap joq bang dvyhamh gas hauh zis xauhgyo las taiq zis gas, Yoeuh aq, nyang Eliya lyis lui nyeis, ge.

³⁶Hauh uhlyis dius dvyuk wuih los las khotlhyop dvjop mas jeis jyen jen lho lha jvmbu lyang mas tap las nyang shuk das xiklyis dyei las taiq zis gas, Eliya nyang lyis vlyih yoeus khyoq das lah, yamoq yoeuh goh, ge.

³⁷Yesu gas thwe zainsmuh yah kaiq lho lha kang gyoh.

³⁸Hauh uhlyis yhenmuh mas dah gos misseh gas vthyoh mas zis vkhyei mha jweh shoq aiq khyamh juiq tyamp.

³⁹Nyang housoeh kaiq lho lha kang gyoh yvlyis nyah xik mas yap joq dah jes dvxo guon zau nyvng lyis, Haih soeu ka Mangso dah Lo gyingh nghuot, ge taiq.

⁴⁰We we masyah yoeuh nyeis dah vmesbih jens eq nyeis. Hauh bang gas Magdala Mari, Yaku ngis yahge Yosep dah ungwes Mari yahge Salome nghuot las, nyamoq gas nyang Galile mas nyeis yoq lyis nyang lyis phuqsoe dah bang nghuot.

⁴¹Yerusalem mas nyang yah dvgeh doq loh dah vmesbih jens gohtoeu eq nyoshoq nghuot.

⁴²Hauh nyeih gas Yuda No Buisnyeis dah xiklyis nyeihyo, sont buisnyeis nghuot yvmvyah nyenhthang jweh lyis,

⁴³Nyoqnho ngelang bos dah nhaiqbos, Mangso munghdan lyis langh nyeis soeu Arimathia mas dah Yosep lyih las, nhaiqlom yangh yangh Pilat jyank mas Yesu mvng lyis loh sang yoeus.

⁴⁴Pilat gas Yesu gvshih shei tyamp goeus yvlyis mauh las jes dvxo guon zau lyis khi lha, Nyang shei zis nyangh goeus lhyeh, ge nyei.

⁴⁵Jes dvxo guon zau jyank masyah shei goeus cho seq lho lhyi, nyang gas Yosep lyis hauh mvng dyei.

⁴⁶Nyang gas jeimuh misdain wis las, nyang lyis yoeus khyoq lho lha hauh zis yah lyet las lukmuh lom mas kyungh toh dah lop mas kat toh. Hau lopkhonh mas nyang lukzains toeu cheiq toh.

⁴⁷Magdala Mari yahge Yosep dah ungwes Mari gas, nyah mvng toh dah joqyos lyis nyvng.