Read Achang MAKHO 2 Bible Online

MAKHO 2 - Achang bible

MAKHO 2

¹Dvkyoh lo nyangh thang lhyi, nyang gas Kaperna-um mas doms loh las nyah yhen mha nyeis zis lyis tsain xauhgyo.

²Housoeh las dius dvnganhmoq zop huom yvmvyah joqyos eq ma bos lo. Khomhdwang mas jweh shoq tsain nyeis las nyang nyamoq lyis Dang taiq kyoh.

³Housoeh gungsjen shei soeu dvyuk lyis dius nyei yuk yah nyah jyank mas dvng lyih.

⁴Dius puk thoeu yvmvyah nyah jyank mas ma yoh tanh loh las, nyamoq gas nyang nyeis dah vtoeu mha yhenkhung dwang phank las, gungsjen shei soeu lhyi yhetyos eq cheq juons khyoq kat.

⁵Yesu gas nyamoq dah lomsjingh zis lyis nyvng las, gungsjen shei soeu lhyi taiq zis gas, Lo eh, nah yaunos khyuot dyei goeus, ge.

⁶Hauh yvmas maussauh lhaih bang dvyhamh tsung toh las, nyamoq ehnyet mas tsain nghamh zis gas,

⁷Haih soeu ka chamus loeusmus soqzo dang taiq au lhyeh? Mangso kyingh ma nghuot lyis gas yaunos hank yoh khyuot dyei lah, ge.

⁸Houjang yah Yesu gas nyamoq dah nhaiqlom khau mha nghamh zis lyis nyah dyos mas seq las, nyang nyamoq lyis taiq zis gas, Namoq ehnyet mas chamus housoeh tsain nghamh goh lah?

⁹Gungsjen shei soeu lhyi, Nah yaunos khyuot dyei goeus, oen das zis yahge, Nah yhetyos toq yoeus las suh loh aq, oen zis kha khonh taiq lwis lah?

¹⁰Cangsoeu Lo gas nyeisjvng mas yaunos yoh khyuot dyei dah vmingh yoh zis gas namoq seq bas jungh, ge.

¹¹Hauh gungsjen shei soeu lhyi taiq zis gas, Ngos nvng lyis taiq bah, toq aq, nah yhetyos yoeus las nah yhen pheh loh aq, ge.

¹²Houjang nyang toq los las yhetyos yoeus chi lha, dvnganhmoq dah xikkhonh mas suh loh yvmvyah dvnganhmoq svsoh mauh las, Mangso lhyi chungh zis yah, Ngamoq heisoeh teh zis khanhamp eq ma nyvng ku, ge.

¹³Nyang gas thomh yvm pheh doms thuq loh lyis, moqjens dvnganh nyah jyank mas los yvmvyah, nyang nyamoq lyis jyauh.

¹⁴Nyang lai dyet loh lyis Alphe dah lo Lewi gas khoengh khywi dah joqyos mas tsung toh zis lyis nyvng las nyang lyis, Ngah thang mha chank los aq, ge taiq lyis nyang toq las nyah thang mha chank loh.

¹⁵Hauh thang lhyi Yesu gas, Lewi yhen, womjus mas tsung toh lyis khoengh khywi bang yahge yaunos wons bang nyoshoq eq Yesu yahge nyah changlo jens yah dvgeh tsung toh: khasoeh ge lyis nyoshoq moq nyah thang mha chank yenh.

¹⁶Nyang khoengh khywi bang yahge yaunos wons bang yah dvgeh wom zo nyeis zis lyis, maussauh lhaih bang yahge Pharishe moq nyvng lyis nyah changlo jens lyis taiq zis gas, Nyang khoengh khywi bang yahge yaunos wons bang yah dvgeh chamus zo shuk au lhyeh, ge.

¹⁷Hauh zis xauhgyo las Yesu gas, Yanghzan bang mvcheih lastsiang ma chah, nos bang dvchah; ngos gas dan bang lyis khi das xiklyis lyih zis ma nghuot, yaunos wons bang xiklyis dvnghuot, ge.

¹⁸Yohan dah changlo jens yahge Pharishe moq wom gyangh kyi. nyamoq lyih las nyang lyis taiq zis gas, Yohan dah changlo jens yahge Pharishe jens dah changlo jens gas womkyi lhyi, nah changlo jens chamus wom ma kyi goh lah, ge.

¹⁹Yesu nyamoq lyis taiq zis gas, Phoengh hwank pwe mha bang Loloeu saiq yah dvgeh nyeis uhlyis nyamoq wom yoh kyi lah? Loloeu saiq yah dvgeh nyeis shih lyis nyamoq wom ma yoh kyi.

²⁰Nghuot laus eq loloeu saiq lyis nyamoq jyank masyah shwih loh buisnyeis jweh los das; hauh uhlyis nyamoq womkyi das.

²¹Dyi tyang mha misseh saiq yah hank ma pho: housoeh pho lhyi ka, vsaiq chuq yah vcauh lyis lang yaq las, hou mhayah juiq zis zes lvm los.

²²Zvbiq jeis saiq lyis eq shohyeis thung cauh mas hank ma kat toh. Hauh zis kat nghuot lyis gas, zvbiq jeis saiq gas shohyeis thung lhyi zo phuk las zvbiq jeis shuon das, shohyeis thung eq monh das. Zvbiq jeis saiq gas shohyeis thung saiq mas kat chah, ge.

²³Hauh thang lhyi nyang gas Yuda No Buisnyeis lyis sunghso yos cho yah lai loh. Nyamoq loh nyeis lyis nyah changlo jens gas sunghso nham lhyi tsain shap.

²⁴Housoeh las Pharishe moq nyang lyis taiq zis gas, Yoeuh aq, Yuda No Buisnyeis lyis kuot das lyi ma bos zis lyis chamus kuot goh, ge.

²⁵Nyang nyamoq lyis taiq zis gas, Dawi nyang yahge nyah dyenschangh jens yuot shet las chah nyeis uhlyis cha kuot khoq zis lyis khayhoq eq ma nghap yoeuh ku goh lhyeh?

²⁶Phudyei Zainsmuh Abiatha dah zaih lyis Mangso dah yhen khau mha wvng las, phudyei bang mas lai las zo das lyi ma bos, chixoeuq toh dah ohlhyoq lyis zo las, nyang yah dvgeh bang lyis eq dyei, ge.

²⁷Nyang nyamoq lyis taiq zis gas, Yuda No Buisnyeis gas dius xiklyis kuot toh zis nghuot; dius gas Yuda No Buisnyeis xiklyis kuot toh zis ma nghuot.

²⁸Housoeh yvmvyah Cangsoeu Lo gas Yuda No Buisnyeis dah Yhensain nghuot, ge.