Read Achang MAKHO 3 Bible Online

MAKHO 3 - Achang bible

MAKHO 3

¹Nyang lyi jungs mas doms wvng loh lyis, houmha loq dvshot shei soeu dvyuk nyeis.

²Nyamoq gas nyang lyis yoh kauq shoq, nyang Yuda No Buisnyeis lyis hauh soeu lhyi vgis los nhang dvluk, ge tsain zungh yoeuh nyeis.

³Nyang gas hau loq shei soeu lhyi, Xikkhonh mas toq yap aq, ge.

⁴Hou lho lha nyang nyamoq lyis taiq zis gas, Yuda No Buisnyeis lyis gis cho kuot das zis, lyi bos lah, ma gis cho kuot das zis, lyi bos lah? Kang kyoeu gis lah, sat gis lah, ge nyei. Nyamoq samlo nyeis.

⁵nyamoq nhaiqlom than yvmvyah nyang nhaiqkuk las, nhaiq yo zoh lyis yah zui lhaink yoeuh las hauh soeu lhyi taiq zis gas, Nah loq yhuonh kat aq, ge. Nyang loq yhuonh kat lyis, nyah loq gis los.

⁶Hauh uhlyis Pharishe moq thuq loh las, nyang lyis khasoeh yoh mhont das cho, houjang Herodia moq yah xamgoh nyeis.

⁷Yesu gas nyah changlo jens yah dvgeh Galile Thomh pheh loh lyis, Yuda mau yahge Galile mau mas dah dius phung zainsmuh nyah thang mha chank los.

⁸Hauh uhlyis Yerusalem mas bang, Idumea yahge Yodan lvng thyitvp mas bang, Taire yahge Sidon wuxom mas bang somci moqmuh gas nyang kuot dah muh zains lyis xauhgyo las nyah jyank mas los.

⁹Moqjens yah nyang lyis ma zangh nyhenh das xiklyis, nyah nyhenshang lhyik dvkoeuq sont toh dyei das xiklyis nyang nyah changlo jens lyis taiq.

¹⁰Khasoeh ge lyis, nyang gas dius nyoshoq moq lyis gis los nhang yvmvyah, noslom yoh ya yoh bang gas, nyang lyis xauh tanh das xiklyis duon nyhenh los.

¹¹Yius jens eq nyang lyis nyvng lho lhyi nyah xikkhonh mas gyuis las kaiq zis gas, Nvng gas Mangso dah Lo nghuot, ge.

¹²Nyang lyis gohtoeu dius jens lyis ma seq nhang das xiklyis nyang nyamoq lyis than than taiq toh.

¹³Tsai, nyang hau boms mas doq loh las, nyang khi yoeus mes bang lyis khi lhyi, nyamoq eq nyah jyank mas los.

¹⁴Housoeh las nyang gas, dvci aiq yuk lyis khyen lha lvgyo jens ge nyhink las toeuq kat toh. Nyamoq gas nyang yah dvgeh nyeis das xiklyis eq, loeus taiq hoeuh das xiklyis eq,

¹⁵yius yoh khat tyamp dah vmingh yoh das xiklyis eq nghuot.

¹⁶Petru ge nyhink dyei[1] dah Simon.

¹⁷Maujau dah lo jens ge vjyuk bos, Boanage ge nyhink dyei, Zebedi dah lo jens Yaku yahge Yaku dah vnoeuh Yohan.

¹⁸Andre, Philip, Bartholomeu, Mathe, Thoma, Alphe dah lo Yaku, Thade, vnyau lyis jyet soeu Simon yahge,

¹⁹Nyang lyis phanhlyen das Yudas Iskarot moq nghuot. Hauh thang lhyi nyang yhen pheh loh.

²⁰Moqjens nyah jyank mas doms los yvmvyah nyamoq wom zo das shishenh yangh ma tsain yoh.

²¹Nyah dyenschangh jens hauh zis lyis xauhgyo lyis, nyamoq gas, Nyang lyis nyhik das ge los. Khasoeh ge lyis dius jens gas Yesu koh goeus, tsain ge.

²²Yerusalem masyah gyoh los dah maussauh lhaih bang eq, Nyang mas Bezebu bos, yius zau dah yomsoq yah nyang yius lyis khat tyamp, tsain ge.

²³Housoeh las nyang nyamoq lyis khi yoeus las dangtoeuq yah taiq zis gas, Satan ka Satan lyis khasoeh yoh khat tyamp das lah?

²⁴Munghdan dvkoeuq mas nyang changh nyang gang lvn, zan goh nghuot lyis gas, yoh goeng joq das zis ma nghuot.

²⁵Dvyhen khau mha dius eq, nyang changh nyang gang lvn, dyoqgoh lyis, hauh yhen ka yoh goeng joq das zis ma nghuot.

²⁶Houyah dvyhangteh, Satan ka vsainnyang changh zan goh lyis gas, nyang yoh goeng toenk das zis ma nghuot, thank dyuk das.

²⁷Yombos soeu lhyi shih cangxeih ma twih lyis gas, nyah yhen khau mha wvng las nyah zisyos lyis hank eq ma yoh thyoq yoeus; nyang lyis twih thang lhyi nyah yhen dvyoh thyoq das.

²⁸Ngos namoq lyis jyoengh taiq bah, cangsoeu dius dah yaunos dvnganh zis yahge, nyamoq dah loeusmus soqzo dang vja ja lyis khyuot tyamp dyei das.

²⁹Nghuot laus eq, hau Gyingshang Dyos lyis loeusmus soqzo soeu hank laus eq yobos khyuot dyei zis khanhamp eq ma xauh, vcaiq vto yaunos dap soeu nghuot joq, ge.

³⁰Housoeh ge zis gas nyamoq yah nyang lyis, Yius kuq soeu ge taiq yvmvyah nghuot.

³¹Nyah ungwes, nyah vwik jens gas nghe mha lyih yap las nyang lyis lui nhang kat.

³²Hauh uhlyis nyah vwi vyvm mas tsung toh dah dius jens nyang lyis taiq zis gas, Yoeuh aq, nah ungwes yahge nah vwik jens, nhamhmuh jens nghe mha yap las nvng lyis nyei nyeis, ge.

³³Nyang nyamoq lyis phuk taiq zis gas, Ngah ungwes yahge ngah vwik jens gas hank nghuot goh lah, ge.

³⁴Nyang nyah yvm lhaink yah tsung toh bang lyis yoeuh lho lha taiq zis gas, Yoeuh aq, ngah ungwes yahge ngah vwik jens.

³⁵Mangso dah ehnyet chank bang hank laus eq, ngah vwik, ngah nhamhmuh, ngah ungwes tsain nghuot, ge.