Read Achang MAKHO 4 Bible Online

MAKHO 4 - Achang bible

MAKHO 4

¹Tsai, hau thomh yvm mas nyang doms jyauh xi loh lyis, moqjens nyah jyank mas zain huom los las nyang gas thomh mas lhyik dvkoeuq vkhau mha loh wvng tsung toh: moqjens gas thomh yvm tung yos mas nyeis.

²Hauh uhlyis dangtoeuq yah nyoshoq ja jyauh uhlyis nyang nyamoq lyis taiq zis gas:

³Gyo yoeus geh. Jyo khyoq soeu ka jyo khyoq das ge thuq loh.

⁴Sanh kat lyis dvkhamh gas chokhyoh mas gyoh las, hauh yvlyis nghoq jens yah lyih kui zo tyamp.

⁵Gohtoeu dvkhamh gas tsoh ma thoeu dah lukjvp yos mas gyoh; tsoh ma thoeu yvmvyah dvdvm kyingh lyis yuk thuq los.

⁶Nghuot laus eq vnyet ma yoh chent yvmvyah buis tso los lyis lhap nhe lha nyhauh tyamp.

⁷Gohtoeu ka zoeu gyomh mas gyoh loh, zoeu zains yuk kuh los las hauh yvlyis huop tyamp yvmvyah vshih ma yoh shih.

⁸Gohtoeu ka nyeisjvng gis yvmas gyoh las, yuk kuh bvng lainh zis yah vshih shih los las, somhci, khyukci, dvxo huon je los, ge.

⁹Nyang nyamoq lyis taiq zis gas, Gyo yoeus das no dap soeu ka xauhgyo bas jungh, ge.

¹⁰Hauh thang lhyi nyang kyingh nyeis lyis, nyang yah dvgeh nghuot dah changlo dvci aiq yuk moq gas, hauh dangtoeuq cho nyang lyis nyei.

¹¹Nyang nyamoq lyis taiq zis gas, Mangso munghdan dah nghop toh cho ka namoq lyis seq nhang goeus. Nghuot laus eq nghe pheh bang lyis gas dvnganh zis dangtoeuq yah dvchixoeuq.

¹²nyamoq yoeuh laus eq ma nyvng, xauhgyo laus eq ma seqgyo. Housoeh ma nghuot lyis gas nyamoq Mangso jyank tauh los las yobos khyuot dyei zis xauh das.

¹³Nyang nyamoq lyis taiq zis gas, Haih dangtoeuq ma seqgyo goh lhyeh? Housoeh lyis gas dangtoeuq dvnganh yvlyis khasoeh seqgyo yoeus goh das lah?

¹⁴Jyo khyoq soeu ka hauh dang lyis khyoq goeus.

¹⁵Cho mas gyoh zis gas, hauh dang lyis sanh yah dvyih nyamoq xauhgyo zis lyis Satan lvnyap los las, nyamoq nhaiqlom mas sanh toh dah dang lyis yoeus tyamp zis nghuot.

¹⁶Houyah dvyhangteh, hauh lukjvp yos mas sanh khyoq toh zis gas, hauh dang lyis xauhgyo yah dvyih gausyis zis yah lvnyap lhom yoeus bang nghuot.

¹⁷Nghuot laus eq nyamoq mas vnyet ma chent joq yvmvyah, dvyoq dvyoh kham. Hauh thang lhyi hauh dang gvng mas, shanghsenh zis yahge shoeuhshih zis xauh los yah dvyih nyamoq lvnyap nungsdoms loh zis lyis ge.

¹⁸Zoeu gyomh mas sanh kat toh goeu gas, hauh dang lyis xauhgyo laus eq,

¹⁹Hauh maunyeis dah chiqjyen, zisyos mhuih jyomh cho yahge, nyoqnoq obos cho wvng los zis yah hauh dang lyis huop las vshih ma yoh shih bang nghuot.

²⁰Tsai, nyeisjvng gis yvmas sanh toh bang gas, hauh dang lyis xauhgyo zis yah lhom yoeus las vshih shih las somhci, khyukci, dvxo huon jebais los bang nghuot, ge.

²¹Nyang nyamoq lyis taiq zis gas, Nyibung lyis tuonh las dang theh mas, jungjeis mas tuonh das ge gyangh yoeus los lhyeh? Nyibung gus mas kih das ge dvgyangh yoeus los ma nghuot lhyeh?

²²Khasoeh ge lyis, nghop shung toh yvlyis dede Chixoeuq das. Nghop toh zis cha laus eq phank xoeuq das.

²³Gyo yoeus das no dap soeu ka xauhgyo bas jungh, ge.

²⁴Nyang nyamoq lyis taiq zis gas, Namoq cha xauhgyo yvlyis zaih geh: Namoq laiq dyei pan mhayah namoq lyis doms laiq dyei das: hauh thoq lyis lung dyei shih das.

²⁵Khasoeh ge lyis, yoh bang lyis lung dyei das; ma yoh bang jyank masyah gas nyamoq yoh joq zis yangh yoeus tyamp dyei das.

²⁶Tsai, nyang taiq zis gas, Mangso munghdan gas, nyeisjvng mas jyo sanh soeu teh nghuot.

²⁷Sanh toh las, nyang nyeih nyenh yhet, toq, kuot las nyau khasoeh yuk kuh los zis eq ma seq.

²⁸Nyeisjvng gas nyang pheh yah vshih shih los nhang lha, cangxeih lyis vnyuk, thang lhyi vnham, hauh thang lhyi vshih dap los nhang.

²⁹Vshih nyhink goeus ya jyo yhomh nyos jweh las, houjang hau banlyenh yah yet yoeus, ge.

³⁰Nyang doms taiq zis gas, Mangso munghdan cho lhyi cha yah yoh toeuq das lah? Dangtoeuq cha yah byi das lah?

³¹Hauh zis gas anghwvng shih chvp teh nghuot joq. Nyeisjvng mas sanh khyoq lyis nyeisjvng thoq dah vshih dvnganh mas zes ngis laus eq,

³²Sanh kat thang lhyi yuk los las, anghnyaus phoqywi dvnganh thoq lyis kuh thank las, vko kuh thya los yvmvyah, mau dang nghoq jens hauh buisshen mha sot yoh sot, ge.

³³Housoeh dangtoeuq nyoshoq yah hauh dang cho nyamoq seqgyo nyhoq nyang nyamoq lyis taiq kyoh.

³⁴Dangtoeuq ma bos bos, nyang nyamoq lyis cha eq ma taiq kyoh. Nghuot laus eq nyamoq nyang kyingh nyeis lyis, nyah changlo jens lyis dang dvnganh dah vjyuk phant kyoh.

³⁵Hauh buisnyeis nyenhthang jweh lyis, nyang nyamoq lyis taiq zis gas, Yang thyitvp pheh tsain goeu e goh, ge.

³⁶Nyamoq gas moqjens lyis toh khoq las Yesu tsung toh goeus dah lhyik khau mha wvng las nyang lyis shwih loh. Nyang yah dvgeh gohtoeu lhyik eq tsain bos shih.

³⁷Hauh uhlyis lyeismuh jyang toq los las, lhyik lyis jeisphauq bat yvmvyah hauh lhyik mas jeis dyingh los nyeis.

³⁸Nghuot laus eq nyang gas lhyik thang mha uhkhoeuq khoeuq las yhet joq: hauh uhlyis nyamoq gas, nyang lyis nhauh las taiq zis gas, Svra eh, ngamoq dyuk tyamp das zis lyis nvng ma bos chiq lhyeh, ge.

³⁹Nyang toq las lyeis lyis nyho lha, thomh lyis eq, Tsoeklo sam loh aq, ge. Housoeh las lyeis gas tam loh las sam goeus.

⁴⁰Nyang nyamoq lyis taiq zis gas, Namoq chamus tsain gyuk goh? Lomsjingh zis ma bos goh lah, ge.

⁴¹Nyamoq svsoh mauh las, dvyuk yah dvyuk taiq goh zis gas, Haih soeu ka hank nghuot lah? Hau lyeis yahge thomh yangh nyah domsyos gyo, ge.