Read Achang MAKHO 5 Bible Online

MAKHO 5 - Achang bible

MAKHO 5

¹Gvshih nyamoq gas hauh thomh thyitvp, Gerasa mau mas jweh loh.

²Nyang lhyik masyah thuq yah dvyih, yius kuq dah vbusbih dvyuk lop khyam mhayah thuq los las nyang yah xauhgoh.

³Hauh soeu dah joqyos gas, lopkhyam nghuot las, nyang lyis hank eq ma yoh twih, shamjvng yah yangh ma yoh twih toh.

⁴Khasoeh ge lyis nyang lyis kyomh yahge shamjvng yah nyoshoq lhain twih toh laus eq, nyang shamjvng lyis vdoeus doeus lang phaiq thyet tyamp las, nyang lyis yoh mhiq yoeus ko yom hank eq ma bos.

⁵Nyeih nyenh vjangh yah hauh lopkhyam yahge boms mas nyeis las, kaiq zis yah nyang gungs nyang lukgoq mas vkhyamh khyamh lhyamh tyamp.

⁶Yesu lyis we masyah nyvng kat lyis, nyang wuih loh las, nyang lyis dupaiq.

⁷Nyang yomkat kaiq las taiq zis gas, Nyhang thank Mangso dah Lo Yesu eh, ngos nvng yah cha sen lah? Nvng ngos lyis ma shoeuhshih das xiklyis ngos nvng lyis Mangso nyings yah dung, ge.

⁸Khasoeh ge lyis, nyang gas yius lyis, Yius nvng eh, haih soeu jyank masyah thuq loh aq, ge yvmvyah nghuot.

⁹Yesu gas, Nah nyings cha nghuot, ge nyang lyis nyei. Nyang phuk taiq zis gas, Ngah nyings Nyoshoq nghuot: khasoeh ge lyis, ngamoq nyoshoq nghuot, ge.

¹⁰Housoeh hauh joqyos masyah nyamoq lyis ma pont tyamp bas jungh, ge nyang lyis dung.

¹¹Gvshih hauh bauslhyoq mas wuq dvjens buot zo nyeis.

¹²Housoeh las yius jens gas, Ngamoq lyis hauh wuq jens mas jenh wvng nhang aq, ge nyang lyis dung.

¹³Nyang eq gyo las yius jens gas thuq las wuq jens mas wvng goeus ya, wuq jens gas hauh gammhung mhayah tyauq gyoh loh las thomh mas tsain ciang shei. Hauh wuq jens gas aiq khyoengh ko nghuot.

¹⁴Wuq yoeuh bang gas, phang wuih loh las, hauh mau yahge wus mas, hauh cho tsain taiq kyoh lho lhyi, nyamoq cha mus loh zis lyis e tsain yoeuh.

¹⁵Nyamoq Yesu jyank mas jweh lyis, yius nyoshoq kuq soeu ka, dyimis wuot las cha ma chah soeu teh dah ehnyet yah tsung toh yvlyis nyamoq nyvng yvmvyah gyuk.

¹⁶Hauh cho nyvng bang eq, hauh yius kuq soeu yahge wuq jens mas khasoeh bweh zis lyis, nyamoq lyis tsain lhom taiq kyoh.

¹⁷Housoeh las nyamoq gas, nyamoq dah wuxom masyah thuq loh das nyhenshang nyang lyis chomp sang.

¹⁸Nyang lhyik mas wvng lyis, yius kuq soeu ka Yesu lyis, nyang yah dvgeh nyeis das xiklyis dung.

¹⁹Yesu gas ma gyo, Nah yhen mha bang yahge nah dyenschangh jens jyank mas doms loh las hauh Yhensain nah xiklyis kha iq kuot dyei zis yahge, kha iq nhaiqnyen goeus zis lyis loh taiq kyoh aq, ge nyang lyis taiq kat.

²⁰Housoeh las, nyang thuq loh las Yesu nyah xiklyis kha iq kuot dyei yvlyis Dekapoli mau mas taiq hoeuh loh goeus las dvnganhmoq mauh.

²¹Yesu gas lhyik yah thyitvp pheh doms goeu loh lyis, moqjens nyah jyank mas zain los. Nyang gas thomh yvm mas nyeis.

²²Yoeuh aq, lyi jungs uhjyung jens mas Yairu ge soeu jweh los las, nyang lyis nyvng lyis, nyah khyeiyang mas gyuis las,

²³Nyang lyis khyoeuq zis gas, Ngah lonyi lo shei bah ge loh goeus, nyang dwis nyeis bas jungh, nvng los las nyah thoq mas loq kih zis yah gis los nhang aq, ge.

²⁴Housoeh las nyang gas nyang yah dvgeh loh. Moqjens eq nyah thang mha chank yenh las, nyamoq gas nyang lyis zangh duon nyhenh.

²⁵Dvci aiq zvn suih shuon lha nos dah vmesbih dvyuk gas,

²⁶Lastsiang nyoshoq dah loq mas nyang yoh goeu dvnganh dye yhung laus eq cha eq ma gis, dvzes xungh xent los.

²⁷Nyang Yesu cho xauhgyo lyis, hauh dius puk mas loh las, nyah nungsthank dyithang mha tanh.

²⁸Khasoeh ge lyis nyang gas, Nyah dyimis lyis khvlangh ngos xauh tanh ya ngos gis los das, ge.

²⁹Hauh uhlyis nyang suih shuon zis houjang doms tyamp las, nyah noslom gis los goeus zis lyis nyang sohseq.

³⁰Yesu gas nyang masyah yomsoq thuq loh zis, houjang nyah ehnyet mas soh yvmvyah, dius puk pheh lhain los uhjyangh, Ngah dyimis lyis hank tanh, ge taiq lho lhyi,

³¹Nyah changlo jens nyang lyis taiq zis gas, Moqjens nvng lyis duon nyhenh los zis lyis nyvng las, Ngos lyis hank tanh, ge shih lhyeh, ge.

³²Nyang gas heisoeh hank kuot yvlyis nyvng das xiklyis zuilhaink lhain yoeuh nyeis.

³³Hauh vmesbih gas, nyang mas bweh dah cho lhyi seq yvmvyah, gyuk nvn zoh lyis yah los las nyah xikkhonh mas gyuis gyoh uhjyangh jyoengh nghuot cho dvnganh taiq kyoh.

³⁴Nyang gas, Ngah lonyi eh, nah lomsjingh zis gas nvng lyis gis los nhang goeus. Nyenstap zis yah loh aq, nah noslom gis los bas jungh, ge nyang lyis taiq.

³⁵Nyang taiq nyeis shih lyis, lyi jungs uhjyung dah yhen mha bang jweh los las, Nah lonyi shei goeus: hau svra lyis chamus thauqkhyi nyeis lo, ge.

³⁶Nghuot laus eq Yesu nyamoq dang lyis ma gyo, lyi jungs uhjyung lhyi taiq zis gas, Vchiq, loms kyingh dvloms aq, ge.

³⁷Yesu gas Petru, Yaku yahge Yaku dah vnoeuh Yohan mas lai las, gohyuk hank lyis eq nyah thang mha ma chank nhang.

³⁸Gvshih hau lyi jungs uhjyung dah yhen mha jweh lyis, dius wuhtoeng ge ngaus zis yahge shei uhngauh zis lyis nyang nyvng.

³⁹Nyang yhen mha wvng loh las, nyamoq lyis taiq zis gas, Namoq chamus wuhtoeng ge ngausdyeis ngausnhvp mus nyeis goh lah? Loshang ka shei zis ma nghuot, dvyhet joq, ge.

⁴⁰Nyamoq gas nyang lyis jwangh. Nghuot laus eq nyang gas, dvnganh lyis nghe pheh dye thuq loh nhang lha, loshang dah ungwes uwus yahge nyang yah dvgeh nghuot bang lyis shwih lho lha, hau loshang lhain toh yvmas wvng loh.

⁴¹Hauh uhlyis nyang gas, hau nyelo dah loq lyis zwi toh las, Nyelo eh, toq aq, ge.

⁴²Houjang hauh nyelo gas toq las suh loh. Nyah nyenhkyi ka dvci aiq zvn nghuot. Housoeh nyamoq svsoh mauh lhung thungh goeus.

⁴³Hauh muh dah cho hank eq ma seq bas jungh, nyang nyamoq lyis khyangh gvgis com toh las, nyelo lyis zonoms dyei das zis tying toh.