Read Achang MAKHO 7 Bible Online

MAKHO 7 - Achang bible

MAKHO 7

¹Housoeh Pharishe moq yahge Yerusalem masyah los dah maussauh lhaih bang dvyhamh nyah jyank mas zop los.

²Housoeh changlo jens dvyhamh loq ma cheih, ma lhoq ma shang zis yah ohlhyoq zo yvlyis nyamoq nyvng.

³Khasoeh ge lyis Pharishe yahge Yuda jens dvnganh gas, nyamoq logis jens thungh chank las, loq ma cheih lyis ohlhyoq ma zo.

⁴Kaih masyah los lyis eq lyi yah dvyhangteh nyamoq gungs ma cheih lyis gas ma zo. Hauh thoq lyis kom, auh, thunk khuq lyis cheih zis yahge gohtoeu eq nyamoq chank zis bos shih.

⁵Housoeh las Pharishe yahge maussauh lhaih bang nyang lyis nyei zis gas, Nah changlo jens gas chamus logis jens dah thungh lyis ma chank, loq ma cheih wom zo goh lah, ge.

⁶Nyang nyamoq lyis taiq zis gas, Gis guons kuot bang eh, namoq yah sen lha Esaia pe khoq zis lyis lhaih toh zis gas, Haih dius jens dah nhuot yah ngos lyis phauh nyang laus eq, Nyamoq dah nhaiqlom gas ngos yah we goh joq.

⁷Dius dah tyingtoh dang lyis kyingh vgungs toh las jyauh chah yhangteh jyauh nyeis yvmvyah, nyamoq ngos lyis paiq zis gas vkom dvnghuot, ge.

⁸Namoq gas Mangso dah tyingtoh dang lyis nungsyos toh las, khuq auh cheih yhangteh dius dah thungh lyis kyingh tsain chank nyeis.

⁹Housoeh yvmvyah nyang nyamoq lyis taiq zis gas, Namoq dah thungh chank das xiklyis Mangso dah tyingtoh dang lyis gas peq toh nyvng!

¹⁰Moshe taiq zis gas, Ungwes uwus lyis phauh nyang aq, ungwes uwus lyis ma gis zis taiq soeu ka shei nyang shei bas jungh, ge.

¹¹Nghuot laus eq namoq taiq zis gas, Dius dvyuk nyah ungwes uwus lyis, Ngah jyank masyah nvng xauh yoeus das vyhang ka, phudyei jyungshuk kuot goeus ya cha ma chah lo ge,

¹²Nyah ungwes uwus lyis pangh das nyhenshang namoq tomp toh.

¹³Housoeh namoq jyauh dah thungh gvng mas, Mangso dah dang lyis tsain peq toh. Housoeh teh zis namoq nyoshoq kuot, ge.

¹⁴Housoeh nyang moqjens lyis doms khi lha taiq zis gas, Namoq dvnganhmoq ngah dang gyo yoeus las seqgyo geh.

¹⁵Nghe mhayah dius dah vkhau mha wvng los dah vyhang ka, nyang lyis vwot v-oeu yoh bweh nhang zis ma nghuot. Dius dah vkhau mhayah thuq los zis gas vwot v-oeu bweh nhang.

¹⁶Gyo yoeus das no dap soeu ka xauhgyo bas jungh, ge.[3]

¹⁷Moqjens masyah yvpkhau mha wvng loh thang lhyi, nyah changlo jens gas hauh dangtoeuq lyis doms nyei.

¹⁸Housoeh las nyang nyamoq lyis taiq zis gas, Nghe mhayah dius dah vkhau mha wvng los zis cha laus eq dius lyis vwot v-oeu kuot zis ma nghuot. Namoq eq seq cho ma bos.

¹⁹Khasoeh ge lyis, zonoms gas nhaiqlom khau mha wvng loh zis ma nghuot, womdau khau mha wvng loh thang lhyi nghe pheh thuq loh ma nghuot lhyeh? Housoeh nyang gas zonoms dvnganh gas lhoqshang ge taiq hoeuh.

²⁰Dius jyank masyah thuq los zis gas dius lyis vwot v-oeu kuot.

²¹Khasoeh ge lyis dius dah ehnyet khau mhayah ma gis zis nghamh thuq los zis gas, nyi shuot lvng shuot, yauxi, dius sat,

²²khauh, nyoqnoq, ung lhung, chuq, nyoqjvng ma nyaus wotwu, noh, loeusmus soqzo, khwank zis yahge vkoh vbang zis nghuot.

²³Hai ma gis zis dvnganh gas vkhau mhayah thuq los las dius lyis vwot v-oeu bweh nhang, ge.

²⁴Nyang hou mhayah toq loh las Taire mau mas jweh loh. Nyang yhen khau mha wvng loh zis lyis hank lyis eq ma seq nhang mes laus eq nyang ma yoh tamh.

²⁵Yius kuq dah nyelo yoh dah vmesbih dvyuk gas, nyah cho xauhgyo yvmvyah, nyang houjang nyah khyeiyang mas lyih gyuis las,

²⁶Nyah lonyi jyank mas dah yius khat tyamp dyei das xiklyis dung nyeis. Hauh vmesbih gas Heleni dius Sirophoni vnyau nghuot.

²⁷Nghuot laus eq Yesu hauh vmesbih lyis taiq zis gas, Loshang jens shih cangxeih zo jo bas jungh: khasoeh ge lyis loshang jens dah zonoms lyis yoeus las lvkhuih jens lyis doeuh dyei zis gas ma doeus, ge.

²⁸Hauh vmesbih nyang lyis phuk taiq zis gas, Nghuot goeus Yhensain eh, kihgus jeis mas dah lvkhuih eq loshang jens dah zopop kui zo, ge.

²⁹Nyang hauh vmesbih lyis taiq zis gas, Nvng heisoeh taiq gvng mas, Loh aq, yius gas nah lonyi jyank masyah thuq loh goeus, ge.

³⁰Hou mhayah nyang yhen mha doms jweh loh lyis, nyah lonyi lo yius ma bos lo, yhetyos mas lhain toh zis lyis nyvng.

³¹Taire wuxom mhayah thuq loh lyis Sidon masyah lai dyet loh las Dekapoli wuxom cho lai loh lyis Galile thomh mas jweh loh.

³²Houmha nyamoq gas nojet las o twih soeu lhyi nyah jyank mas tsain shwih lyih las, nyah thoq mas loq kih dyei das xiklyis tsain dung.

³³Moqjens masyah nyang lyis shwih thuq loh las, nyah nokhyung khau mha Yesu dah loq nyhauh jauh kat dyei zis yahge svkanh dyeh las nyah lhyo lhyi eq tanh dyei.

³⁴Nyang maukhung mha nghank yoeuh zis yah, soqmuh nyhank las nyang lyis Ephatha, ge taiq. Hauh zis gas, Bangh los aq, ge zis nghuot.

³⁵Houjang nyah no bangh los, lhyo twih zis eq buis loh las, nyang khyangh khyangh yoh taiq.

³⁶Hauh cho hank lyis eq ma taiq kyoh bas jungh, ge nyang nyamoq lyis khyangh com kat laus eq, zes com kat zes taiq kyoh loh.

³⁷Nyamoq svsoh mauh zis yah, Nojet bang lyis xauhgyo los nhang, dang ma yoh jis bang lyis dang yoh jis los nhang lha, dvnganh zis lyis gis shoq yoh kuot dyei, ge tsain taiq.