Read Achang MAKHO 8 Bible Online

MAKHO 8 - Achang bible

MAKHO 8

¹Hauh buisnyeis gyo lyis moqjens zain huom nyeis las zonoms cha eq ma yoh las, Yesu gas nyah changlo jens lyis khi lha taiq zis gas,

²Ngos haih moqjens lyis nhaiqnyen: khasoeh ge lyis, nyamoq ngos yah nyeis zis gvshih somh nyeih nyangh goeus, nyamoq zo das zis cha eq ma yoh.

³Ngos nyamoq lyis yhen pheh wom yuot zis yah pont kat lyis, cholvt mas yuot lhyauh shangh das, khasoeh ge lyis nyamoq dvyhamh gas mau we masyah zis nghuot, ge.

⁴Nyah changlo jens nyang lyis phuk taiq zis gas, Mhanhdyvp mas heinyhoq moq xiklyis ohlhyoq khalhye yah yoh thoq luk das lah, ge.

⁵Nyang nyamoq lyis, Ohlhyoq khanyhoq yoh goh lah, ge lyis, Nyhet koeuq yoh, ge.

⁶Housoeh las dius jens lyis nyeisjvng mas tsung das xiklyis taiq las, hau ohlhyoq nyhet koeuq yoeus chi lha jyehjuh chungh thang lhyi khyiq las, gvm das xiklyis nyah changlo jens lyis dyei. Nyamoq eq moqjens lyis gvm dyei.

⁷Nyamoq oengdoq mhauhlo dvtsiq tsain yoh yvlyis eq nyang shvmanh lho lha, nyamoq xikkhonh mas toh dyei das xiklyis vmingh dyei.

⁸Housoeh nyamoq zo jo thang lhyi, nyet dah vpop vsop kui tsainh lyis nyhet dang muis nghuot.

⁹Nyamoq zo bang nyei khyoengh ko nghuot. Hauh thang lhyi nyang nyamoq lyis pont kat.

¹⁰Houjang nyang nyah changlo jens yah dvgeh lhyik khau mha wvng las, Dalmanutha wuxom mha jweh loh.

¹¹Hauh uhlyis Pharishe moq thuq los las nyang yah taiq phyen-goh las nyang lyis shiwu zoh lyis maukhung mha dah vlho dvkoeuq sang.

¹²Housoeh nyang soqmuh nyhank las taiq zis gas, Dius haq caiq mas dah bang chamus vlho tsain xo au lhyeh? Ngos namoq lyis jyoengh taiq bah, haq caiq lyis vlho cha eq ma dyei das, ge.

¹³Nyang nyamoq lyis toh khoq las lhyik khau mha doms wvng zis yah thyitvp pheh goeu loh.

¹⁴Changlo jens ohlhyoq wons los das zis tohnyhik khoq las, chont khau mha ohlhyoq dvkoeuq kyingh dvbos joq.

¹⁵Nyang nyamoq lyis jyauhhuh kat zis gas, Pharishe jens yahge Herod dah bicheih lyis zaih geh, ge.

¹⁶Housoeh nyamoq nyang changh taiq goh zis gas, Yang ohlhyoq ma tsain wons yvmvyah nghuot, ge.

¹⁷Yesu hauh yvlyis seq las nyamoq lyis taiq zis gas, Namoq ohlhyoq ma wons cho lhyi chamus taiq goh nyeis lah? Namoq ma seqgyo shih goh lhyeh? Namoq dah ehnyet dvtsain than joq shih goh lhyeh?

¹⁸Nyoqjeih dap las ma nyvng goh lhyeh, no dap las ma xauhgyo lhyeh? Namoq ma comh goh lhyeh?

¹⁹Ngos dius oeng khyoengh xiklyis ohlhyoq oeng koeuq lyis khyiq las tsoh thang lhyi, namoq vpop vsop khanyhoq dang yoh kui goh lah, ge. Nyamoq taiq zis gas, Dvci aiq dang, ge.

²⁰Dius nyei khyoengh lyis ohlhyoq nyhet koeuq yah tsoh thang lhyi, namoq khanyhoq dang dyingh shoq yoh kui goh lah, ge. Nyamoq taiq zis gas, Nyhet dang, ge.

²¹Nyang nyamoq lyis taiq zis gas, Namoq ma seqgyo shih goh lah, ge.

²²Nyamoq Betsaida mas jweh loh lyis, nyamoq gas nyoqjet dah yukgis dvyuk nyah jyank mas shwih lyih las, tanh dyei das xiklyis nyang lyis dung.

²³Nyang gas nyoqjet soeu lhyi loq masyah wus nghe pheh she thuq loh las, nyah nyoq mas svkanh taiqh lho lha, nyah thoq mas loq kih uhlyis yah, Nvng dvja ja lyis vnyvng lah, ge nyang lyis nyei.

²⁴Nyang nghank yoeuh las taiq zis gas, Ngos dius jens lyis saiqzains suh loh yhangteh nyvng, ge.

²⁵Hauh thang lhyi nyoq mas nyah loq kih toh las, hauh soeu lhyi nghank yoeuh nhang lhyi, nyah nyoqjeih doms gis los las dius yuk khanghmuh lyis dede nyvng.

²⁶Yesu gas, nyang lyis nyah yhen mha nhang kat uhlyis yah taiq kat zis gas, Wukhau mha vwvng loh, ge.

²⁷Hauh thang lhyi Yesu yahge nyah changlo jens gas Kesare Philipi wus mas wvng loh lyis, cho mha nyah changlo jens lyis nyei zis gas, Dius jens ngos lyis hank nghuot ge goh lah, ge.

²⁸Nyamoq nyang lyis taiq zis gas, Jeisnyhop dyei soeu Yohan; dvyhamh gas Eliya; gohtoeu dvyhamh gas, Lvpe dvyuk yuk nghuot, ge.

²⁹Nyang nyamoq lyis, Namoq gas ngos lyis hank nghuot oen goh lah, ge. Petru phuk taiq zis gas, Nvng gas Khristu nghuot, ge.

³⁰Nyah cho hank lyis eq ma taiq das xiklyis nyang nyamoq lyis khyangh wontang com toh.

³¹Hauh thang lhyi Cangsoeu Lo gas shanghsenh zis nyoshoq xauh las, logis jens, phudyei uhjyung jens yahge maussauh lhaih bang yah peq tyamp las, sat zis xauh das, somh nyeih thang lhyi dwis toq los das cho nyang nyamoq lyis jyauh xi loh.

³²Nyang hauh dang lyis debangh taiq. Housoeh Petru gas nyang lyis khi yoeus las nyho.

³³Nyang nyah changlo jens lyis lhain yoeuh las, Petru lyis nyho zis gas, Satan eh, ngah nungsthank pheh jik loh aq: nvng gas Mangso shot pheh yah ma nghamh, dius shot pheh yah dvnghamh, ge.

³⁴Nyang nyah changlo jens yahge moqjens lyis khi yoeus las taiq zis gas, Dvyuk yuk ngah thang chank soeu duot mes lyis gas, nyah gungs lyis nungsyos toh, nyah tapzains wuq las ngah thang mha chank bas jungh, ge.

³⁵Khasoeh ge lyis vsainnyang kang lhyi khyuot yoeus mes soeu ka, kang dyuk das. Nghuot laus eq ngah nyhenshang yahge gausyis dang gvng mas kang dyuk soeu ka kang yoh das.

³⁶Cangsoeu dius gas mungkvn gonh lyis sain toh laus eq nyah kang dyuk tyamp lyis gas chah vkyuh bos lah?

³⁷Cangsoeu dius gas nyah kang lhyi cha yah yoh thaiq yoeus das lah?

³⁸Hai nyi shuot lvng shuot las yaunos dap dah caiq mas, ngos yahge ngah dang lyis xoq lyis gas, Cangsoeu Lo gas nyah Uwus dah phunk khau mha hauh gyingshang loeuswons bang yah jweh lyih lyis, nyang eq hauh soeu lhyi xoq das, ge.