Read Achang MAKHO 9 Bible Online

MAKHO 9 - Achang bible

MAKHO 9

¹Nyang nyamoq lyis taiq zis gas, Ngos namoq lyis jyoengh taiq bah, houmha yap joq bang dvyhamh, Mangso munghdan gas yomsoq yah jweh lyih zis lyis nyvng shoq shei zis ma bos das, ge.

²Khyuk nyeih thang lhyi Yesu gas Petru, Yaku, Yohan moq lyis shwih las nyamoq nyang kyingh boms nyhang thoq mas doq loh; hauh uhlyis nyamoq dah xikkhonh mas nyang vwot thaiq los.

³Nyah dyi eq thyoeu lha kyi kyi bvng: nyeisjvng thoq mas hou iq yoh cauh thyoeu zis hank eq ma bos.

⁴Yesu yah jis goh nyeis dah Moshe yahge Eliya eq nyamoq lyis nyvng xoeuq.

⁵Petru Yesu lyis taiq zis gas, Svra eh, heimha yang nyeis das zis gis, yang zvng somh koeuq kuot goh; nah nyhenshang dvkoeuq, Moshe nyhenshang dvkoeuq, Eliya nyhenshang dvkoeuq nghuot bas jungh, ge.

⁶Khasoeh ge lyis nyamoq gyuk nyeis yvmvyah, nyang cha taiq das zis ma seq lo.

⁷Hauh uhlyis jyommauh yah nyamoq lyis nghop gos las, hauh jyommauh khau mhayah thwe dvkoeuq taiq thuq los zis gas, Haih soeu ka ngos jyetdap, ngah Lo nghuot, nyah dang gyo geh, ge.

⁸Vyvm vwi mas nyamoq nyetlos nyettant yoeuh kat lyis Yesu yahge nyamoq nyang masyah lai las gohtoeu hank lyis eq ma nyvng lo.

⁹Gvshih nyamoq boms masyah doms gyoh los lyis, Cangsoeu Lo gas shei masyah ma dwis toq los dvchank, nyamoq nyvng zis hank lyis eq ma taiq kyoh das xiklyis nyang nyamoq lyis khyangh com toh.

¹⁰Nyamoq hauh dang lyis gyo chi lha, shei masyah dwis toq los das ge zis gas, cha lhyi ge au, ge nyang changh nyang nyei goh nyeis.

¹¹nyamoq, nyang lyis nyei zis gas, Maussauh lhaih bang gas, chamus Eliya shih cangxeih los chah, ge taiq au lhyeh, ge.

¹²Nyang nyamoq lyis phuk taiq zis gas, Eliya jyoengh nyang cangxeih jweh los las dvnganh zis lyis soq kuot toh goeus. Cangsoeu Lo eq shanghsenh zis nyoshoq xauh las ma phauh ma danh kuot zis xauh das cho lhaih toh ma nghuot lhyeh, ge.

¹³Nghuot laus eq ngos namoq lyis taiq bah, Eliya gas los goeus. Nyah cho lhyi lhaih toh zis yah dvyhangteh, nyang lyis nyamoq o khyvlyis kuot goeus, ge.

¹⁴Changlo jens jyank mas jweh loh lyis, nyamoq dah vyvm mas moqjens zainsmuh tsain nyeis las, maussauh lhaih bang nyamoq yah taiq phyen-goh nyeis zis lyis nyvng.

¹⁵Houjang dius dvnganhmoq nyang lyis nyvng kat lho lhyi, svsoh mauh zis yah nyang lyis lyih tsain wuih zes langh.

¹⁶Nyang nyamoq lyis nyei zis gas, Namoq nyamoq yah cha taiq phyen-goh nyeis lah, ge.

¹⁷Moqjens mas dvyuk nyang lyis phuk taiq zis gas, Svra eh, nhuotjet yius kuq dah ngah lo lyis, ngos nah jyank mas shwih lyih.

¹⁸Nyang lyis kuq los goeus ya, khamha eq nyang lyis nyeisjvng mas she lhain lha, nyop vdoe doe zwis khih chap las gyi lang loh. Housoeh las yius khat thuq dyei bas jungh oen ngos nah changlo jens lyis taiq laus eq, nyamoq ma yoh khat thuq dyei, ge.

¹⁹Yesu nyang lyis phuk taiq zis gas, Lomsjingh cho ma bos dah caiq mas bang eh, ngos namoq yah dvgeh khanyhank jweh shoq xauh nyeis das lah? Ngos namoq lyis khanyhank jweh shoq jhen chah das lah? Nyang lyis ngah jyank mas shwih los aq, ge.

²⁰Housoeh las nyamoq gas nyang lyis nyah jyank mas shwih los. Yius gas Yesu lyis nyvng yah dvyih loshang lhyi chuot nhang lha, nyang nyeisjvng mas lains loeu las nhuot mas nyop vdoe doe mus nyeis.

²¹Housoeh las nyang gas nyah uwus lyis taiq zis gas, Nyang heisoeh mus zis khanyhank nyangh goeus lah, ge. Nyang gas, Loshang lhyi yah nghuot goeus.

²²Nyang lyis mhont tyamp das zis ge nyi mas eq, jeis mas eq vlhain lhain doeuh kat goeus; nghuot laus eq nvng yoh kuot nghuot lyis gas nhaiqnyen las ngah phvtang lhyi bos jenh pangh aq, ge.

²³Yesu nyang lyis taiq zis gas, Nvng yoh bweh lyis oen chamus sang! Lomsjingh soeu xiklyis dvnganh yah yoh bweh, ge.

²⁴Houjang yah loshang dah uwus gas kaiq las, Yhensain eh, ngos lomsjingh, ngos ma lomsjingh zis lyis bos pangh aq, ge.

²⁵Dius jens tsain wuih zain los yvlyis Yesu nyvng lyis, hauh yius lyis nyho zis gas, Nhuotjet, nojet yius nvng eh, ngos nvng lyis vmingh dyei bah, nyah jyank masyah thuq loh aq, khayhoq eq vdoms wvng loh lo, ge.

²⁶Yius eq kaiq las nyang lyis doms chuot nhang lha thuq loh. Nyang eq shei goeus teh nghuot las, dius nyoshoq moq gas, Nyang shei goeus, ge.

²⁷Nghuot laus eq Yesu nyah loq masyah she toq kat lho lhyi, nyang toq los.

²⁸Nyang yhen khau mha wvng loh lyis, nyah changlo jens nyang kyingh nyang lyis nyei zis gas, Ngamoq hauh yius lyis chamus ma yoh khat thuq au lhyeh, ge.

²⁹Nyang nyamoq lyis taiq zis gas, Haih ja gas shvmanh dung zis yah kyingh dvyoh thuq loh nhang, ge.

³⁰Nyamoq hou mhayah thuq las Galile chank yah tsain loh lyis, nyang hank lyis eq ma mes seq nhang.

³¹Khasoeh ge lyis Cangsoeu Lo lyis svbih loq mas phanhlyen dyei las nyamoq gas nyang lyis sat das, hauh thang lhyi somh vnyeih lyis nyang dwis toq das, ge nyah changlo jens lyis jyauh nyeis.

³²Nyamoq hauh cho ma seqgyo laus eq nyang lyis nyei das zis tsain gyuk.

³³Housoeh nyamoq gas Kaperna-um mas jweh loh. Yhen khau mha lungh joq uhlyis nyang nyamoq lyis nyei zis gas, Namoq cho mha cha lhyi taiq nyingh nyo goh lah, ge.

³⁴Nghuot laus eq nyamoq gas samlo nyeis: khasoeh ge lyis cho mha dvyuk yah dvyuk kuh thank zis hank nghuot, ge taiq nyingh nyo goh.

³⁵Housoeh nyang tsung uhlyis yah, nyah changlo dvci aiq yuk lyis khi yoeus las taiq zis gas, Namoq mas dvyuk yuk uhshe soeu duot mes lyis gas, dvnganhmoq dah thang chank soeu yahge dvnganhmoq dah jyeidwis duot chah, ge.

³⁶Nyang gas loshang dvyuk lyis nyamoq dah vgungs mas yap nhang toh: nyang lyis po lho lha, nyang nyamoq lyis taiq zis gas,

³⁷Hank laus eq heisoeh teh dah loshang dvyuk lyis ngah nyings masyah lhom yoeus soeu ka, ngos lyis lhom yoeus zis nghuot. Ngos lyis lhom yoeus soeu hank laus eq ngos lyis lhom yoeus zis ma nghuot, ngos lyis nhang kat soeu lhyi lhom yoeus zis dvnghuot, ge.

³⁸Yohan nyang lyis taiq zis gas, Svra eh, ngamoq nah nyings yah yius khat thuq soeu dvyuk lyis nyvng: nyang gas ngamoq mas zis ma nghuot yvmvyah nyang lyis tomp toh, ge.

³⁹Nghuot laus eq Yesu gas, Nyang lyis vtomp toh goh: khasoeh ge lyis, ngos lyis ma gis zis taiq las ngah nyings mas yomsoq muh yoh kuot soeu hank eq ma bos.

⁴⁰Khasoeh ge lyis yang lyis tyi ma xo soeu ka yah shot pheh zis nghuot.

⁴¹Ngos namoq lyis jyoengh taiq bah, namoq gas Khristu yah sen yvmvyah namoq lyis jeis dvkom gvmshuk soeu hank laus eq, nyah khyik manh phauh dyuk das zis ma nghuot.

⁴²Ngos lyis lomsjingh dah haih ngis bang dvyuk yuk lyis yaunos kuot nhang soeu hank laus eq nyah lainzain mas mhoq shan tyaulhangh las thomh mas lhwih kat das zis gas nyah xiklyis zes gis.

⁴³Housoeh nah loq yah nvng lyis shuot nhang lhyi, hauh yvlyis thyet tyamp aq: Loq aiq shot dap las ma jom munyi thomh mas wvng das thoq lyis, loq dvshot kyingh yah kang dwis yvmas wvng das zis gas nah xiklyis zes gis.

⁴⁴Hauh munyi mas nyamoq dah luk ma shei, nyi eq ma yoh sat.[4]

⁴⁵Nah khyei yah nvng lyis shuot nhang lhyi, hauh yvlyis thyet tyamp aq: khyei aiq khyei yah dap las munyi thomh mas wvng das thoq lyis khyei dung yah kang dwis yvmas wvng das zis gas nah xiklyis zes gis.

⁴⁶Hauh munyi mas nyamoq dah luk ma shei, nyi eq ma yoh sat.

⁴⁷Nah nyoqjeih yah nvng lyis shuot nhang lhyi, hauh yvlyis thuiq tyamp aq: nyoq aiq jeih yah munyi thomh mas khyoq kat zis xauh das thoq lyis nyoq dvjeih yah Mangso munghdan mas wvng das zis gas nah xiklyis zes gis.

⁴⁸Hauh munyi mas nyamoq dah luk ma shei, nyi eq ma yoh sat.

⁴⁹Khasoeh ge lyis lomhxangh dvnganh lyis coh cheih teh yuk khanghmuh lyis nyi yah phuot shang zis xauh das.

⁵⁰Coh gas gis, nghuot laus eq nyah dah ngvm zis bi tyamp goeus ya, khasoeh doms yoh ngvm nhang das lah? Namoq mas coh ngvm nhang lha, namoq nyang changh nyang nyenstap nyeis geh, ge.