Read Achang LUKA 1 Bible Online

LUKA 1 - Achang bible

LUKA 1

¹Cangxeih lyis yah nyoq yah nyvng dah kanghjyoeng yahge gausyis Dang lyis wons wuq bang taiq kyoh zis yah dvyhangteh,

²Ngamoq vkhau mha bweh lai loh goeus cho vjaja lyis lhaih xi bang nyoshoq bos yvmvyah,

³Ngos eq haih cho dvnganh lyis vpom mhayah vlhomuh nyei gyo thang lhyi nvng xuq goeus cho dvnganh gas jyoengh jus yvlyis nvng yoh seq shoq ngos nah xiklyis vzoh yah lhaih dyei das oen nghamh thyet toh, nhaiqbos Theophilu eh.

⁴

⁵Yuda hwankti Herod zaih lyis, Abiya vkoq mas dah Zekharia ge dah phudyei soeu dvyuk nyeis. Nyah yhensain nyhiq Elizabet gas Aron dah nyeinyet nghuot.

⁶Nyah zomh gas yobos huon chank ma bos khyvlyis Yhensain dah lyi yahge tyingtoh cho dvnganh lyis chank las Mangso xikkhonh mas dan nyeis.

⁷Nghuot laus eq Elizabet gas dius thonh nghuot yvmvyah, nyah zomh loshang ma bos, Nyah zomh gas mang eq mang loh goeus.

⁸Dvlhain ka nyang Mangso dah xikkhonh mas nyah phudyei phung mha muh kuot vvng lhyi,

⁹phudyei bang dah thungh yah dvyhangteh nyamoq doeugoh lyis nyang mas vvng lha, nyang gas Yhensain dah yhenmuh mas wvng las xangh ngheq nhamp nyeis.

¹⁰Hauh uhlyis dius jens dvnganhmoq gas nghe pheh shvmanh dung nyeis.

¹¹Xangh ngheq nhamp dah phon loqyos shot pheh Yhensain dah loeuswons soeu yap las nyang lyis nyvng xoeuq.

¹²Zekharia nyang lyis nyvng las gyuk nvn nyeis.

¹³Nghuot laus eq hauh loeuswons soeu yah nyang lyis taiq zis gas, Vgyuk Zekharia eh, khasoeh ge lyis nvng dung zis lyis gyo dyei goeus; nah yhensain nyhiq Elizabet gas nah nyhenshang yukgis lo dvyuk khoeu los das, nvng nyah nyings lyis Yohan ge lui das.

¹⁴Housoeh las nvng gausyis nhaiqtap zis yoh das; nyang khoeu los yvmvyah dius nyoshoq eq gaus das.

¹⁵Khasoeh ge lyis nyang gas Yhensain xikkhonh mas kuhxing das. Nyang gas zvbiq yahge yhei shuk das zis ma nghuot; nyah ungwes dah ung mhayah yangh Gyingshang Dyos yah dyingh das.

¹⁶Nyang gas Israel jens nyoshoq lyis nyamoq dah Yhensain Mangso jyank pheh doms lhain los nhang das.

¹⁷Uwus moq dah ehnyet lyis lo jens jyank pheh, dang ma gyo bang lyis dan bang dah joeui cho pheh lhain los nhang das zis yahge, Yhensain xiklyis sont toh dah dius nyau lyis cicont kuot dyei das nyhenshang nyang gas Eliya dah dyos yahge yomsoq dyingh las nyah xik pheh loh das, ge.

¹⁸Zekharia loeuswons soeu lhyi taiq zis gas, Ngos gas mang loh goeus, ngah yhensain nyhiq eq nyenhkyi kuh goeus yvmvyah, haih zis lyis jyoengh nghuot oen ngos kha mhayah yoh seq das lah, ge.

¹⁹Loeuswons soeu nyang lyis taiq zis gas, Ngos gas Mangso xikkhonh mas yap soeu Gabriel nghuot. Nvng lyis taiq kyoh aq, ge haih gausyis loeus taiq kyoh das xiklyis, ngos lyis nhang kat.

²⁰Yoeuh aq, nyah shishenh jweh lyis nyuk los das dah ngah dang lyis nvng ma jingh yvmvyah, haih cho bweh los dah buisnyeis jweh shoq nvng dang ma yoh jis, nhuot jet nyeis das, ge.

²¹Zekharia gas yhenmuh khau mha loh nyangh nyeis yvmvyah, nyang lyis langh nyeis dah dius jens gas mauh nyeis.

²²Nyang thuq los dah uhlyis nyamoq lyis dang ma yoh jis lo yvmvyah, nyang gas yhenmuh mas nyoqnyvng nyvng zis lyis nyamoq soh dyei. Nyang gas nyamoq lyis loq toeuq toeuq las nhuot jet zis yah nyeis.

²³Nyang gas, nyang phudyei muh kuot dah buisnyeis dyingh lyis, nyah yhen pheh loh.

²⁴Hauh thang lhyi nyah yhensain nyhiq Elizabet gas loshang gungs lyis chi los las, nyang kyingh yhen khau mha lhamhmuh oeng khyvp gauh lungh joq.

²⁵Housoeh nyang taiq zis gas, Svbih dah xikkhonh mas ngos lyis jwangh nyhap zis yoeus tyamp dyei das xiklyis Yhensain ka ngos lyis nyoqzons doeus las jyehjuh dyei goeus, ge.

²⁶Elizabet loshang gungs lyis chi zis lhamhmuh khyuk vkhyvp lyis, Mangso ka loeuswons soeu Gabriel lyis Galile mau Nazaret ge dah wugungs mas,

²⁷Hwankti Dawi dah vnyau vshih, Yosep ge soeu xiklyis kwank toh dah lonyi gyingh jyank mas nhang kat. Hauh lonyi dah nyings gas Mari nghuot.

²⁸Loeuswons soeu nyah jyank mas jweh taiq zis gas, Dvyangh lah? Yhensain ka nvng lyis nyoqzons doeus las, nvng yah dvgeh nyeis. (Vmesbih jens mas nvng gas ngelhoq), ge.[1]

²⁹Mari gas nyang lyis nyvng las housoeh taiq zis lyis gyo mauh las, Heisoeh lhom jis zis gas khasoeh ge zis nghuot das au, ge nyah ehnyet mas nghamh nyeis.

³⁰Loeuswons soeu nyang lyis taiq zis gas, Mari eh, vgyuk: nvng gas Mangso nyoqzons doeus soeu nghuot.

³¹Nvng gas loshang gungs lyis chi lha, yukgis lo dvyuk khoeu das. Nvng nyah nyings lyis Yesu oen nyhink dyei chah.

³²Nyang gas kuhxing lha nyang lyis gas Nyhang thank Soeu dah Lo ge lui das: Yhensain Mangso ka nyah uwus Dawi dah hwankti tsung tank eq nyang lyis dyei das.

³³Nyang gas Yakop dah yhen thoq mas vcaiq vto guon das. Nyah munghdan khayhoq eq thank das zis ma nghuot, ge.

³⁴Mari loeuswons soeu lhyi taiq zis gas, Hauh zis khasoeh yoh bweh das lah? Ngos lonyi gyingh dvnghuot, ge.

³⁵Loeuswons soeu nyang lyis phuk taiq zis gas, Gyingshang Dyos nah thoq mas jweh das las, nyhang thank thoq mas soeu dah yomsoq yah nvng lyis gos das. Housoeh las nvng khoeu das lo gas gyingshang. Nyang lyis Mangso dah Lo ge lui das.

³⁶Yoeuh aq, dius thonh ge dvlui, nvng yah dvhuh dah Elizabet eq manglo lyis yukgis loshang dvyuk gungs lyis chi zis lhamhmuh khyuk khyvp nghuot los goeus.

³⁷Khasoeh ge lyis Mangso ma yoh kuot zis cha ma bos, ge.

³⁸Hauh uhlyis Mari taiq zis gas, Yoeuh aq, Yhensain dah jyeidwis ngos nghuot nyeis; nah dang yah dvyhangteh ngah jyank mas nghuot bas jungh, ge. Hauh uhlyis hauh loeuswons soeu nyah jyank masyah loh.

³⁹Hauh buisnyeis gyo lyis Mari gas Yuda mau boms wugungs dvkoeuq mas lvnyap toq loh las,

⁴⁰Zekharia yhen mha nyang wvng loh lyis, Elizabet yah loh xauhgoh.

⁴¹Mari lhom jis zis lyis Elizabet xauhgyo lyis nyah ung mha loshang jywe los. Elizabet gas Gyingshang Dyos dyingh las,

⁴²thwe zainsmuh yah kaiq zis gas, Vmesbih jens mas nvng gas ngelhoq, nah ung mha dah shih eq ngelhoq.

⁴³Ngah Yhensain dah ungwes ngah jyank mas jweh los zis gas, kha iq gaus chank bos au!

⁴⁴Yoeuh aq, nvng lhom jis dang ngah no mas xauhgyo yah dvyih, ngah ung mha loshang ka gaus zis yah jywe los.

⁴⁵Yhensain jyank masyah nyang lyis taiq zis gas bweh los das, ge lomsjingh dah vmesbih gas ngelhoq.

⁴⁶Mari taiq zis gas, Ngah dyos Yhensain lhyi chungh.

⁴⁷Ngah dyos eq khyuot yoeus Yhensain mha gauslaus:

⁴⁸Khasoeh ge lyis ma mon ma yih dah nyah jyeidwis lyis nyang nhaiqdoeus dyei: khasoeh ge lyis, Yoeuh aq, gvshih masyah dius caiq dvnganh gas ngos lyis ngelhoq soeu ge das.

⁴⁹Khasoeh ge lyis yomsoq zains bos soeu ka ngos lyis kuh thank dah muh kuot dyei, nyah nyings eq gyingshang.

⁵⁰Nyang lyis phauh nyang gyukwoms bang thoq mas nyah nhaiqnyen shohgyo zis gas, dvcaiq thang lhyi dvcaiq joq joq.

⁵¹Nyah loqyom yah yombos zis lyis chixoeuq; Nyamoq dah ehnyet mas nghamh yvlyis khwank nyeis soeu lhyi lhoq sanh tyamp.

⁵²Yombos bang lyis nyamoq hwankti tank masyah khyoq las, Nyhen mha gyoh bang lyis nyang toeutoq das.

⁵³Nyang gas yuot bang lyis zonoms gis yah jo nhang lha, Dis bang lyis gungskom nhang kat.

⁵⁴Nyah nhaiqnyen ehnyet lyis soh zis yah nyah jyeidwis Israel lyis pangh dyei.

⁵⁵Houka Abraham yahge nyah lo jens nghuot dah yah phauh thyeih moq lyis dyei toh dah vcaiq vto dangthoengh yah dvyhangteh nghuot, ge.

⁵⁶Mari gas Elizabet yah dvgeh lhamhmuh somh khyvp ko nyeis lho lha nyah yhen pheh tauh loh.

⁵⁷Gvshih Elizabet gas buisnyeis dyingh las, yukgis lo dvyuk khoeu.

⁵⁸Yhensain ka nyah kuhxing dah nhaiqnyen shohgyo zis nyang lyis khasoeh Chixoeuq yvlyis buisnoms sainhchangh yahge dvhuh bang xauhgyo lyis nyang yah dvgeh tsain gaus nyeis.

⁵⁹Xet vnyeih lyis, loshang lhyi vthyoh tyomh dyei das zis nyamoq los las, nyah uwus dah nyings teh nyang lyis Zekharia ge nyhink das zis sont.

⁶⁰Nyah ungwes phuk taiq zis gas, Ma nghuot, nyang lyis Yohan oen nyhink dyei chah, ge.

⁶¹Nyang lyis nyamoq taiq zis gas, Nah vhuh mas housoeh ge zis hank eq ma bos, ge.

⁶²Nyamoq gas nyah uwus lyis loq toeuq las nyings khasoeh nyhink mes yvlyis nyei.

⁶³Nyang gas lhaih das luklhyoq sang yoeus las, Nyah nyings gas Yohan nghuot, ge lhaih xoeuq. Housoeh nyamoq dvnganhmoq mauh.

⁶⁴Houjang nyah nhuot eq bangh, lhyo eq buis las dang taiq zis yah Mangso lhyi chungh.

⁶⁵Nyah vyvm vwi mas nyeis bang gas gyuk las, hauh dang lyis Yuda boms mau dvnganh yvmas hoeuh loh.

⁶⁶Xauhgyo bang dvnganh dah nhaiqlom mas tsain comh toh las, Haih loshang ka khasoeh teh soeu nghuot das au, tsain ge. Khasoeh ge lyis, Yhensain dah yomsoq gas nyang yah dvgeh nghuot.

⁶⁷Hauh uhlyis nyah uwus Zekharia gas Gyingshang Dyos dyingh las pe zis gas,

⁶⁸Hauh Yhensain Israel dah Mangso ka ngelhoq: Nyah dius lyis komh las khyuot yoeus cho kuot dyei.

⁶⁹Nyah jyeidwis Dawi dah yhen mhayah, yah xiklyis yomsoq bos dah khyuot yoeus soeu thuq los nhang das, ge.

⁷⁰Mungkvn xi masyah nyang nyah gyingshang lvpe jens dah nhuot masyah taiq toh zis yah dvyhangteh,

⁷¹Yah jeswus yahge yang lyis hoeng bang dvnganh dah loq masyah lhuiq kat das xiklyis nghuot.

⁷²Nyang taiq zis gas, Yah phauh thyeih moq lyis nhaiqnyen ehnyet Chixoeuq las nyah gyingshang dangthoengh lyis soh das, ge.

⁷³Ngamoq yahge ngamoq dah jes jens masyah khyuot yoeus las gyuk ehnyet ma bos bos nyang lyis yoh phuqsoe das xiklyis Mangso ka yah phauh thyeih Abraham lyis maukhi dang yah dangthoengh toh.

⁷⁴

⁷⁵Housoeh yang gas yah dvcaiq gonh nyah xikkhonh mas gyingshang zis yah dan khyvlyis yoh nyeis das nyhenshang nghuot.

⁷⁶Loshang eh, nvng lyis gas, Nyhang thank Soeu dah lvpe ge lui los das: khasoeh ge lyis nvng gas Yhensain dah cho sont das xiklyis nyah xik pheh loh das zis nghuot las,

⁷⁷Nyah dius jens lyis yaunos khyuot dyei zis xauh yvmvyah khyuot yoeus dah jyehjuh lyis seq nhang das.

⁷⁸Yah Mangso dah nhaiqnyen jyehjuh yah, nyah khyuot yoeus cho ka yah thoq mas buis teh pank dyei las,

⁷⁹chuot zis yahge shei dah siyet mas tsung toh bang dvnganh lyis nyenstap cho mha xauh suh bas jungh, nyhang thank thoq masyah pank dyei nyeis, ge.

⁸⁰Loshang ka bes los zis yahge nyah dah dyos yombos los las Israel vnyau lyis thuq xoeuq buisnyeis jweh shoq nyang gas mhanhdyvp mas nyeis.