Read Achang LUKA 11 Bible Online

LUKA 11 - Achang bible

LUKA 11

¹Dvlhain ka nyang joqyos dvdeh mas shvmanh dung nyeis. Nyang dye dung thang lhyi nyah changlo dvyuk nyang lyis taiq zis gas, Yhensain eh, Yohan eq nyah changlo jens lyis shvmanh dung jyauh yhangteh, ngamoq lyis eq jyauh aq, ge.

²Nyang nyamoq lyis taiq zis gas, Namoq shvmanh dung lyis heisoeh dung geh: Ngamoq dah Uwus eh, Nah nyings gyingshang nyeis bas jungh. Nah munghdan jweh los bas jungh.

³Ngamoq chah dah wom jeis ngamoq lyis nyeih yau nyeih dyei aq.

⁴Ngamoq gas ngamoq lyis cu bang dah yobos lyis khyuot dyei goeus yvmvyah ngamoq dah yobos lyis khyuot dyei aq. Ngamoq lyis shiwu yvmas vshwih loh.

⁵Yesu nyamoq lyis taiq zis gas, Namoq mas dvyuk, dyenschangh yoh las, gungsgvm lyis nyah jyank mas e lha, Dyenschangh phoq eh ohlhyoq somh lhyoq jenh dyei langh aq;

⁶ngah dyenschangh dvyuk nyah gyung cho mhayah ngah jyank mas jweh los, nyang lyis tsoh das zis cha eq ma joq, ge lho lhyi,

⁷yhen khau mha soeu ka, Ngos lyis vthauqkhyi goh; khomh eq nyheih goeus, ngah lo jens eq ngos yah dvgeh yhetyos mas yhet joq goeus, ngos nvng lyis ma yoh toq dyei lo, ge phuk toeuh goh lah?

⁸Ngos namoq lyis taiq bah, dyenschangh nghuot, ge las ma toq dyei nghuot laus eq nyang tungh khyoeuq sang nyeis yvmvyah, hauh soeu lhyi nyang chah ya chah zis, toq las dyei das.

⁹Housoeh yvmvyah ngos namoq lyis taiq bah, Dung geh, hauh zis namoq lyis dyei das: xo geh, housoeh lyis namoq nyvng das; khomh koq geh, housoeh lyis namoq lyis phank dyei das.

¹⁰Dung soeu hank eq yoh; xo soeu eq nyvng; khomh koq soeu lhyi eq phank dyei das.

¹¹Dangtoeuq gvshih namoq mas uwus dvyuk yuk lyis lo gas ohlhyoq sang lhyi lukgoq dyei das lhyeh? Oengdoq sang lhyi lhangnyis dyei das lhyeh?

¹²Gyoq uq sang lhyi gungsgauh dyei das lhyeh?

¹³Namoq ma gis dah bang yangh vsainnyang lo jens lyis gis dah jyungshuk seq dyei lyis gas, hauh thoq lyis zes las maukhung mha dah Uwus gas, nyang lyis dung bang lyis hauh Gyingshang Dyos dyei das ma nghuot lhyeh?

¹⁴Nyang gas nhuotjet yius lyis khat tyamp: yius thuq loh thang lhyi, nhuotjet soeu dang jis los las, dius jens gas mauh.

¹⁵Nghuot laus eq nyamoq mas dvyhamh taiq zis gas, Yius zau Bezebu dah vmingh yah nyang yius jens lyis yoh khat thuq, ge.

¹⁶Gohyhamh bang eq nyang lyis shiwu zoh lyis yah, maukhung mha dah vlho dvkoeuq tsain sang.

¹⁷Nyang gas nyamoq nghamh yvlyis seq las nyamoq lyis taiq zis gas, munghdan nyang changh zan goh lyis gas hauh munghdan gas dyoqbis das. Yhenbang nyang changh dyoqgoh lyis gas hauh yhen ka dyoqbis tyamp das.

¹⁸Ngos gas Bezebu dah yomsoq yah yius jens lyis khat tyamp, ge namoq taiq. Satan gas nyang changh nyang zan goh nghuot lyis gas, nyah munghdan khasoeh yoh goeng joq das lah?

¹⁹Ngos Bezebu yomsoq yah yius jens lyis khat thuq nghuot lyis gas, namoq dah lo jens gas hank mas yah khat thuq nyeis lah? Housoeh yvmvyah nyamoq gas namoq lyis soetuon das bang duot das.

²⁰Nghuot laus eq ngos gas Mangso dah yomsoq yah yius jens lyis khat tyamp nghuot lyis gas, Mangso munghdan namoq jyank mas jweh goeus.

²¹Yombos soeu ka jes kyahsoe yah nyah yhen zungh nyeis lyis gas, nyah zisyos gau joq.

²²Nghuot laus eq nyah thoq lyis yombos soeu los las, nyang lyis ung tyamp thang lhyi, nyang khauq dah sham lham yoeus tyamp lho lha, nyah yhenzis lyis tsain gvm yoeus.

²³Ngos yah dvgeh ma nghuot soeu ka, ngos lyis jes sont soeu nghuot. Ngos yah dvgeh ma tsainh soeu ka dungsshih lvnggang nghuot, ge.

²⁴Yius gas dius jyank masyah thuq loh las, kyuk dah mau mas lamh yenh. Nyang noyos xo laus eq ma nyvng. Hauh thang lhyi nyang doms taiq zis gas, Ngos thuq khoq dah yhen mha tauh loh das, ge.

²⁵Nyang jweh loh lyis yhen ka shenh shang lha vshung vgvn joq yvlyis nyvng.

²⁶Hauh thang lhyi nyang loh las nyah thoq lyis zes xungh xent dah yius nyhet doeu shwih las hauh vkhau mha los tsain wvng lungh joq. Housoeh las hauh soeu dah wotwu gas xikpheh thoq lyis zes yau los.

²⁷Nyang housoeh taiq nyeis uhlyis, dius phung mhayah vmesbih dvyuk gas kaiq las nyang lyis taiq zis gas, Nvng lyis khoeu kat las nauh gvmshuk soeu ka ngelhoq, ge.

²⁸Nghuot laus eq nyang taiq zis gas, Nghuot goeus, Mangso dang lyis gyo yoeus las chank bang gas nge zes lhoq, ge.

²⁹Moqjens zain nhoenk los lyis nyang nyamoq lyis taiq zoh loh zis gas, Dius haih caiq gas lhung dah vcaiq nghuot. Nyamoq gas vlho lhyi tsain xo laus eq, lvpe Yona dah vlho mha lai las gohtoeu chah vlho lhyi eq nyamoq lyis ma chixoeuq das.

³⁰Yona gas Ninewe bang dah vlho duot vgus, Cangsoeu Lo eq dius haq caiq xiklyis vlho duot das.

³¹Hauh Soetuon yvmas, mautyi hwankti nyih gas haq caiq mas bang yah dvgeh toq los las nyamoq lyis dang thang thyet das. Khasoeh ge lyis nyamoq gas Solomon dah joeui gyo yoeus das xiklyis mau thang mhayah jweh los. Yoeuh aq, heimha Solomon thoq lyis zes soeu nyeis.

³²Soetuon yvmas Ninewe wus mas bang gas, haq caiq mas bang yah dvgeh toq las nyamoq lyis dang thang thyet dyei das: khasoeh ge lyis Yona taiq kyoh dang gvng mas nyamoq nhaiqlom tsain thaiq los. Yona thoq lyis zes soeu heimha nyeis.

³³Nyibung lyis tuonh las hank ma gyangh gos shung toh; dang yah eq ma gyangh tsungh toh: wvng los bang bvng zis nyvng das xiklyis nyibung gus mas dvgyangh tuonh toh.

³⁴Nyoqjeih gas gungs dah bvng zis nghuot. Nah nyoqjeih gyings lyis gas, nah dvgungs gonh bvng joq das, nah nyoqjeih ma gis lyis gas nah gungs eq soeng soeng noq.

³⁵Housoeh yvmvyah nah jyank mas bos dah bvng zis gas ma noq tyamp bas jungh zaih nyeis aq.

³⁶Nah gungs mas soeng soeng noq zis dvchuq eq ma bos, gungs gonh yah bvng nyeis nghuot lyis gas, bvng dah nyibung yah nvng lyis pank dyei yhangteh nah gungs gonh bvng zis yah dyingh das, ge.

³⁷Nyang housoeh taiq nyeis lyis, Pharishe dvyuk gas nyang yah dvgeh zo shuk das zis nyang lyis khi lha, nyang wvng las wom zo das zis tsung toh.

³⁸Pharishe gas Yesu nyang wom ma zo shih lyis cheihshang cho ma kuot yvmvyah mauh nyeis.

³⁹Housoeh las Yhensain nyang lyis taiq zis gas, Namoq Pharishe jens gas, kom yahge bvn lyis nghe pheh kyingh dvgyangh shang nhang; namoq dah vkhau mha ka lhuot zo lhuot shuk las lhung zis kyingh dyingh joq.

⁴⁰Koh bang eh, nghe pheh kuot toh dah Mangso ka vkhau mha eq kuot ma nghuot lhyeh?

⁴¹Bvn vkhau mha bos zis nyungs bang lyis dyei geh. Housoeh lyis dvnganh gas, namoq xiklyis lhoqshang zis duot das.

⁴²Pharishe jens eh, namoq mvtanhzoe nghuot! Khasoeh ge lyis, namoq gas shomnhamh yahge angh nyaus dvja ja mas ciboms dvboms tsain kat. Nghuot laus eq, lyi jyoeng zis yahge Mangso lhyi jyetdap cho lhyi lhyweq toh khoq. Ciboms dvboms dyei cho lhyi ma toh khoq, lyi jyoeng cho yahge Mangso lhyi jyetdap cho lhyi kuot vvng.

⁴³Pharishe jens eh, namoq mvtanhzoe nghuot! Khasoeh ge lyis, lyi jungs mas gis thank tsunggus mas tsung, kaih mas phauh nyang jeshuh das yvlyis namoq o.

⁴⁴Namoq mvtanhzoe nghuot! Khasoeh ge lyis namoq gas ma nyvng lo dah lop yah doeusgoh, dius jens gas hauh thoq mas pyo pyo suh nyeis, ge.

⁴⁵Hauh uhlyis lyi svra dvyuk nyang lyis phuk taiq zis gas, Svra eh, nvng heisoeh taiq zis gas, ngamoq lyis jwangh nyeis.

⁴⁶Housoeh las nyang taiq zis gas, Lyi svra moq eh, namoq eq mvtanhzoe nghuot! Khasoeh ge lyis namoq gas dius jens lyis wons nanh dah yvwons kih dyei las vsainnyang gas hauh yvwons lyis loqnyhauh yah eq ma tsain tanh yoeuh ku.

⁴⁷Namoq gas mvtanhzoe nghuot! Khasoeh ge lyis, namoq dah phauh thyeih moq sat dah lvpe jens lop lyis tsain ci goeus.

⁴⁸Namoq gas namoq dah phauh thyeih moq dah muhzoh lyis kanghjyoeng kat bang yahge xamxonh bang jyoengh nghuot: khasoeh ge lyis, nyamoq dah lvpe jens lyis sat las, nyamoq lop lyis namoq tsain ci.

⁴⁹Housoeh yvmvyah, Mangso dah joeui yah taiq zis gas, lvpe jens yahge lvgyo jens lyis ngos nyamoq jyank mas nhang kat das, nyamoq dvyhamh lyis sat las dvyhamh lyis shoeuhshih das.

⁵⁰Mungkvn cangxeih gvnkhanh uhlyis yah huot tyamp, lvpe jens dvnganh dah suih gas haq caiq bang masyah cangjau sang das.

⁵¹Abel dah suih masyah hau yhenmuh yahge phon jo mas sat zis xauh dah Zekharia suih jweh shoq, nghuot goeus, ngos namoq lyis taiq bah, hauh zis gas haq caiq bang mas yoh huon das.

⁵²Lyi svra jens eh, namoq mvtanhzoe nghuot! Khasoeh ge lyis, seq cho suhshih yoeus toh las, vsainnyang eq ma wvng, wvng loh mes bang lyis eq namoq kyoq toh, ge.

⁵³Nyang nghe pheh thuq loh lyis lyi svra moq yahge Pharishe jens gas nyang lyis svsoh nhaiqyo zis yah nyang lyis cho vja ja yah sen lha nyei zis yah,

⁵⁴nyang dvja ja taiq shuot lyis yobos nyhik das nyhenshang langh nyeis.