Read Achang LUKA 12 Bible Online

LUKA 12 - Achang bible

LUKA 12

¹Hauh uhlyis dius ma thoq suon lo dah moqjens zain los las, nyamoq nyang changh zangh nang goh loh nyeis lyis, nyang nyah changlo jens lyis shih taiq zis gas, Pharishe jens dah bicheih lyis zaih geh, ge. Houka gis guons kuot ge dah wotwu nghuot.

²Khasoeh ge lyis ma yoh chixoeuq shoq nghop shung toh zis cha eq ma bos; ma yoh seq shoq shung toh zis cha eq ma bos.

³Housoeh yvmvyah namoq chuot yvmas taiq ya taiq zis lyis bvng yvmas xauhgyo los das. Yvplhunk mas nhuot sot sot zis yhen khung thoq mas taiq hoeuh loh das.

⁴Ngah loeuzomh jens eh, ngos namoq lyis taiq bah, gungs lyis kyingh yoh sat las hauh thang lhyi cha eq ma yoh kuot lo bang lyis vgyuk goh.

⁵Nghuot laus eq hank lyis gyuk chah zis ngos namoq lyis taiq; gungs lyis sat thang lhyi, munyi thomh mas yoh khyoq kat dah yomsoq yoh soeu lhyi dvgyuk geh. Nghuot goeus, ngos namoq lyis taiq bah, nyang lyis gyuk geh.

⁶Nghuot laus eq jos oeng doeu lyis dyvpson aiq kyvp yah ungh ma nghuot lhyeh? Hau jos dvdoeu lyis eq Mangso ma tohnyhik.

⁷Namoq dah uhloms mas cam khvt dvnganh lyis yangh suon toh. Housoeh yvmvyah vchiq goh, namoq gas jos nyoshoq thoq lyis zes phauhdap.

⁸Nghuot laus eq ngos namoq lyis taiq bah, Hank laus eq dius xikkhonh mas ngos lyis rhen soeu lhyi, cangsoeu Lo eq Mangso dah loeuswons bang xikkhonh mas nyang lyis rhen das.

⁹Nghuot laus eq cangsoeu dius xikkhonh mas ngos lyis he tyamp soeu lhyi, Mangso dah loeuswons bang xikkhonh mas nyang lyis eq he tyamp das.

¹⁰Cangsoeu Lo lyis dang yah jis shuot yobos lyis yoh khyuot dyei: nghuot laus eq Gyingshang Dyos lyis loeusmus soqzo dah yobos lyis gas ma yoh khyuot dyei das.

¹¹Nyamoq gas namoq lyis lyi jungs mas nhaiqbos bang, vmingh yoh dah guon bang xikkhonh mas shwih loh lyis, khasoeh cha phuk taiq das zis vchiq goh.

¹²Hauh shishenh lyis khasoeh taiq chah zis gas, Gyingshang Dyos yah namoq lyis jyauh das.

¹³Dius huom mha dvyuk nyang lyis taiq zis gas, Svra eh, ngah vmang lyis ngos yah yhenzis gvm goh das cho lhyi bos taiq aq, ge.

¹⁴Nyang hauh soeu lhyi taiq zis gas, Lvcang eh, nah zomh jo mas soetuon das zis yahge gvm dyei das soeu kuot das nyhenshang ngos lyis hank toeuq toh lah, ge.

¹⁵Nyang nyamoq lyis taiq zis gas, Nyoqnoq cho lhyi tsain zaih lha zaih geh: khasoeh ge lyis, zisyos magons magoh yoh yvmas dius dah kang bos zis ma nghuot, ge.

¹⁶Nyang nyamoq lyis dangtoeuq dvkoeuq taiq zis gas, Dis soeu dvyuk dah maunyeis mas guknyau shihnyau nyoshoq yoh los.

¹⁷Nyang nghamh zis gas, Ngah guknyau shihnyau kat toh das joqyos ma bos, ngos khasoeh kuot das au?

¹⁸Ngos heisoeh kuot das: Ngah jyi cauh lyis thyoq tyamp las, zes kuh zis tsuk lho lha, hauh yvmas ngah wom yahge yhenzis dvnganh kat toh das.

¹⁹Housoeh las ngah gungs dyos lyis, Gungs dyos eh, zvnlom nyoshoq xiklyis vyhang nyoshoq kat toh goeus, zo shuk, pyo lha nyenstap nyeis aq, oen taiq das, ge.

²⁰Nghuot laus eq Mangso nyang lyis taiq zis gas, Koh soeu eh, khvnyens nyang, nyang nah gungs dyos lyis yoeus tyamp das: housoeh las nvng ba kat toh vyhang ka hank xiklyis nghuot das lah, ge.

²¹Vsainnyang xiklyis zisyos yung toh las Mangso mha ma dis soeu ka housoeh teh soeu nghuot.

²²Tsai, nyang nyah changlo jens lyis taiq zis gas, Housoeh yvmvyah ngos namoq lyis taiq bah, kang xiklyis cha zo das; gungs xiklyis cha wuot das oen vchiq goh, ge.

²³Kang ka zonoms thoq lyis, gungs gas dyimis thoq lyis zes phauhdap.

²⁴Kvnhoq jens gas jyo ma khyoq, jyo eq ma yhomh zis lyis nghamh yoeuh geh; nyamoq mas jyi eq ma bos, zisyos eq ma joq; nghuot laus eq Mangso ka nyamoq lyis gvmtsoh nyeis. Namoq gas nghoq thoq lyis kha iq zes phauhdap!

²⁵Namoq chiq las vsainnyang kang lhyi loq dvbon hank yoh chent kat?

²⁶Housoeh teh ngis thank cho lhyi yangh namoq ma yoh kuot lyis, gohtoeu nyet shih goeu lyis chamus chiq nyeis goh lah?

²⁷Anghchau ban khasoeh yuk kuh los yvlyis nghamh yoeuh geh. Nyamoq gas muh eq ma zwi, jei eq ma ni, nghuot laus eq ngos namoq lyis taiq bah, phunk nyoqnho ngelang bos dah Solomon dyimis yangh haih ban dvjyo lhyi ma nyis.

²⁸Lomsjingh ehnyet nain bang eh, yos mas yuk las phvnaq nyeihyo nyikhyomp mas kat tyamp das dah mhanh lyis yangh Mangso heisoeh gvmhuot lyis gas, namoq lyis hauh thoq lyis zes gvmhuot das ma nghuot lhyeh?

²⁹Cha zo cha shuk das oen zis yah sen yvmas kyingh shishenh vthank nhang goh.

³⁰Khasoeh ge lyis, hauh zis lyis gas mungkvn mas dah dius jens tsain xo lha, hounyhoq namoq chah nyeis yvlyis namoq dah Uwus seq.

³¹Namoq gas Mangso munghdan lyis xo geh; housoeh lyis hau chah nyeis cho dvnganh namoq lyis lung dyei das.

³²Yvng phung ngis eh, Vchiq goh: khasoeh ge lyis, namoq Uwus gas hauh munghdan namoq lyis dyei das zis svsoh mes.

³³Namoq yoh zis lyis ungh las, gvm dyei geh. Khauh soeu ma jweh, naus eq ma yoh zo joqyos, maukhung mha namoq zisyos xiklyis ma seq tyang dah ngwis thung kuot toh geh.

³⁴Khasoeh ge lyis, namoq zisyos joq yvmas namoq nhaiqlom eq joq das.

³⁵Namoq dah yhensain nyihwank pwe mhayah tauh los lyis zes das xiklyis sont langh nyeis dah jyeidwis jens teh dyichih chih, nyibung tuonh las cicont langh nyeis geh.

³⁶Nyang jweh las khomh koq lyis hau jyeidwis jens nyang lyis khomh phank dyei.

³⁷Jyeidwis jens langh nyeis zis lyis yhensain los nyvng lyis, hauh jyeidwis jens gas ngelhoq. Ngos namoq lyis jyoengh taiq bah, hauh yhensain nyang dyichih chih lho lha, nyamoq lyis zojus mas tsung nhang lha, nyang nyang nyamoq lyis phuqsoe das.

³⁸Nyensyo gungsgvm lyis, nghuot ya maubuh los yoq lyis housoeh zungh nyeis langh zis lyis yhensain los nyvng lyis, hauh jyeidwis jens gas ngelhoq.

³⁹Haih zis lyis seq geh: khauh soeu khanhamp los das zis lyis yhensain seq nghuot lyis gas, nyah yhen lhyi ma los yoh thyoq wvng shoq nyang zungh nyeis das.

⁴⁰Housoeh yvmvyah namoq eq cicont kuot geh. Khasoeh ge lyis namoq ma zangh soh dah shishenh lyis, Cangsoeu Lo jweh los das, ge.

⁴¹Hauh thang lhyi Petru nyang lyis taiq zis gas, Yhensain eh, haih dangtoeuq gas ngamoq lyis kyingh taiq lah, dvnganhmoq lyis taiq lah, ge.

⁴²Yhensain taiq zis gas, Yhensain ka nyah yhenbang lyis, shishenh jweh lyis zonoms gvm dyei das xiklyis toeuq toh, lomluk las joeui bos dah jyeidwis gas hank nghuot lah, ge.

⁴³Nyah yhensain jweh los uhlyis lomluk luk kuot nyeis yvlyis los nyvng jus dah jyeidwis gas ngelhoq.

⁴⁴Ngos namoq lyis jyoengh taiq bah, yhensain ka nyah zisyos dvnganh thoq mas guon soeu nyang lyis kuot nhang das.

⁴⁵Nghuot laus eq hauh jyeidwis gas nyah ehnyet mas, Ngah yhensain los das zis nyangh shih ge, nghamh las, phoq jyeidwis nyhiq jyeidwis jens lyis bat, zo shuk, yet nyeis lyis gas,

⁴⁶hauh jyeidwis dah yhensain ka nyang ma nghamh dah buisnyeis, ma soh dah shishenh lyis nyah yhensain jweh los lyis, nyang lyis zan chink[5] las lom ma luk bang yah dvgeh toh das.

⁴⁷Nyah yhensain dah ehnyet lyis seq toh las, nyah ehnyet ma chank, cicont ma sont toh dah jyeidwis hank laus eq pop pop bat zis xauh das.

⁴⁸Nghuot laus eq ma seq las lyuk mon dah muh shuot soeu ka, nainlo dvxauh lyuk das: khasoeh ge lyis, nyoshoq dyei zis xauh soeu hank laus eq nyah jyank masyah nyoshoq sang zis xauh das. Nyoshoq dyei toh goeus soeu jyank masyah zes las sang das.

⁴⁹Nyeisjvng thoq mas nyi khyoq kat das xiklyis ngos los; hauh nyi gvshih nyang dap nyeis lyis kha iq gis das lah?

⁵⁰Nghuot laus eq ngos kham chah shih dah jeisnyhop dvkoeuq bos shih. Hauh zis ma kham dvchank, ngos kha iq ehnyet nyo nyeis lah?

⁵¹Nyeisjvng thoq mas nyenstap cho chi lyih das xiklyis nghuot oen nghamh goh lhyeh? Ma nghuot, kangh das xiklyis dvnghuot.

⁵²Khasoeh ge lyis, gvshih masyah gas oeng yuk nyeis dah yhen mha somh yuk gas aiq yuk yah, aiq yuk gas somh yuk yah tyixo goh das.

⁵³Uwus yahge loloeu, loloeu yahge uwus; ungwes yahge lonyi, lonyi yahge ungwes, nyimuh yahge doeusmuh, doeusmuh yahge nyimuh gang goh das.

⁵⁴Nyang dius phung lhyi eq taiq zis gas, Buiswvng shot pheh jyommauh nyvng lyis, nvng houjang yah mau wus das, ge vgus wus los.

⁵⁵Mautyi lyeis muot los lyis gas, buis gywes das ge vgus gyangh bweh los.

⁵⁶Gis guons kuot bang eh, maukhung yahge nyeisjvng nyoqnho wuhsoh lyis seq taiq lyis gas: haq caiq dah vlho lhyi chamus ma seq suon goh lah?

⁵⁷Namoq nyang gungs lyis chamus jyoeng khyvlyis soe ma tuon goh lah?

⁵⁸Nvng gas nvng lyis zau kauq soeu yah cho mha dvgeh nghuot shih lyis hauh soeu yah lvnyap taiq tamp goh aq. Housoeh ma nghuot lyis gas, zau kauq soeu yah nvng lyis soetuon soeu jyank mas kyauh das. Soetuon soeu nvng lyis pyada lyis kyauh las, nyang gas nvng lyis thung khyoq das.

⁵⁹Ngos nvng lyis taiq bah, thang thank thunkcent kyvp ma dye cap dvchank nvng hou mhayah yoh thuq los das zis ma nghuot.