Read Achang LUKA 13 Bible Online

LUKA 13 - Achang bible

LUKA 13

¹Hauh uhlyis houmha nyeis bang dvyhamh gas, Pilat mungh zau gas, Galile dius dvyhamh bang dah suih lyis nyamoq lomhxangh lainh zis yah lhoeuq cho Yesu lyis tsain taiq kyoh.

²Yesu nyamoq lyis phuk taiq zis gas, Hauh Galile dius jens housoeh xauh yvmvyah, Galile dius dvnganh thoq lyis yaunos zes wons oen namoq nghamh goh lah?

³Ma nghuot, ngos namoq lyis taiq bah: namoq eq nhaiqlom ma thaiq lyis gas, namoq dvnganh houyah dvyhangteh dyoqbis das.

⁴Nghuot ya, Silom wus mas dah tyoeuqzvm gyop las nhiq sat goeus bang dvci xet yuk gas Yerusalem mas bang dvnganh thoq lyis yaunos zes wons bang nghuot oen namoq nghamh goh lah?

⁵Ma nghuot, ngos namoq lyis taiq bah, namoq eq nhaiqlom ma thaiq lyis gas namoq dvnganh houyah dvyhangteh dyoqbis das.

⁶Nyang haih dangtoeuq eq taiq shih: dius dvyuk nyah zvbiq khyam mha maiphang dvzains tsungh toh. Houmha vshih e xo lhyi cha eq ma nyvng.

⁷Housoeh las nyang nyah zvbiq khyam dyangh soeu lhyi taiq zis gas, Yoeuh aq, ngos haih maiphang zains mas shih xo zis somh zvn bos goeus; cha eq ma nyvng, thoeuq tyamp aq, chamus joqyos nghant toh lah, ge.

⁸Nghuot laus eq hauh soeu nyang lyis phuk taiq zis gas, Yhensain eh, khvzvn yuk joq shih bas jungh: ngos zuilhaink yah khop nhuk, jenh kat dyei shih das.

⁹Sangnhaiq vshih shih los mvbeh, ma shih los nghuot lyis gas, hauh thang lhyi nvng thoeuq tyamp aq, ge.

¹⁰Yuda No Buisnyeis lyis nyang gas lyi jungs dvlom mas jyauh nyeis.

¹¹Yoeuh aq, dvci xet zvn gonh yius kuq nosbaus wons dah vmesbih dvyuk nyeis. Nyang gas nungs goeuh las shoqlang ma yoh dan lo.

¹²Yesu hauh vmesbih lyis nyvng las, nyang lyis nyah jyank mas khi yoeus lho lha, Vmesbih eh, nvng nos masyah luiq goeus ge,

¹³Nyah thoq mas Yesu loq kih lho lhyi, houjang nyang dan los las, Mangso phunk lyis chungh.

¹⁴Yesu Yuda No Buisnyeis lyis noslom yoh bang lyis gis los nhang yvmvyah, lyi jungs gomh soeu ka, nhaiqyo las dius jens lyis taiq zis gas, Muh zwi das xiklyis khyuk nyeih bos, hauh buisnyeis gyo lyis lyih yhoh yoeus geh, Yuda No Buisnyeis lyis vlyih goh, ge.

¹⁵Yhensain nyang lyis phuk taiq zis gas, Gis guons kuot soeu eh, namoq yuk khanghmuh Yuda No Buisnyeis lyis, noeu nghuot ya mauhlyihzoe lyis jeis gvmshuk das zis, zungs masyah phank shwih thuq loh ma nghuot lhyeh?

¹⁶Housoeh lyis dvci xet zvn Satan yah twih toh zis xauh, Abraham lonyi nghuot dah haih vmesbih lyis hau twih toh masyah Yuda No Buisnyeis lyis ma gis phui kat lhyeh, ge.

¹⁷Nyang heisoeh taiq lho lhyi, nyang lyis tyixo bang dvnganh gas tsain xoq goeus. Dius jens gas nyang kuot dah mauhphoh cho dvnganh gvng mas tsain gauslaus.

¹⁸Hauh thang lhyi Yesu taiq zis gas, Mangso munghdan gas cha yah doeusgoh lah? Ngos cha yah byi das lah?

¹⁹Hauh zis gas, dius dvyuk yoeus las nyah khyam mha sanh kat dah anghwvng shih chvp yah doeusgoh. Hauh zis yuk las vzains kuh los lyis mau dang nghoq jens hauh vko mha sot yoh sot, ge.

²⁰Nyang taiq shih zis gas, Mangso munghdan lyis ngos cha yah byi das au lhyeh?

²¹Hauh zis gas vmesbih dvyuk sunghso mons somh pan mha yoeus kat lyis sunghso dvnganh yvlyis yoh dau los nhang dah bicheih yah doeusgoh, ge.

²²Tsai, nyang gas, dvwus thang lhyi dvwus wvng las jyauh uhlyis yah, Yerusalem pheh e loh.

²³Hauh uhlyis dius dvyuk nyang lyis taiq zis gas, Yhensain eh, khyuot yoeus zis xauh bang nainlo dvnghuot lhyeh, ge. Nyang nyamoq lyis taiq zis gas,

²⁴Zvvs dah khomh cho yah wvng das xiklyis yomkat geh: khasoeh ge lyis dius nyoshoq wvng loh das zis xo laus eq ma tsain xauh wvng loh das.

²⁵Hauh Yhensain khomh toq nyheih toh goeus ya, namoq nghe pheh yap las khomh koq uhlyis yah, Yhensain eh, ngamoq lyis khomh phank dyei aq ge lyis, Namoq khalhye yah zis nghuot yvlyis ngos ma seq, ge toeuh das.

²⁶Namoq gas, Ngamoq nah xikkhonh mas zo shuk ku; ngamoq dah talhoeu mha eq nvng jyauh ku, tsain ge das.

²⁷Nghuot laus eq nyang taiq das zis gas, Namoq khamha bang nghuot yvlyis ngos ma seq; ma jyoeng dah muh kuot bang dvnganhmoq eh, ngah jyank masyah thuq loh geh, ge.

²⁸Abraham, Isak, Yakop yahge lvpe jens nyoshoq Mangso munghdan mas nyeis zis lyis namoq nyvng las, namoq nyang gas nghe pheh khat thuq zis xauh das: hauh yvmas ngausdyeis ngausnhvp yah zwis khih chap loh das.

²⁹Hauh uhlyis dius jens gas buisthuq buiswvng, mautsung mautyi pheh yah los las Mangso munghdan mas zo shuk das.

³⁰Housoeh las, thang thank bang gas xik lyis nghuot das; xik lyis bang gas thang thank nghuot das, ge.

³¹Hauh nyeihyo nyang Pharishe dvyhamh Yesu jyank mas tsain lyih las Yesu lyis taiq zis gas, Nvng hei mhayah thuq loh aq; Herod nvng lyis sat das zis cvvq nyeis, ge.

³²Nyang nyamoq lyis taiq zis gas, Hauh dah cauhpau lhyi heisoeh oen loh taiq geh, Khvnyhik yahge phvnaq nyeihyo ngos yius khat tyamp las nos zis lyis gis los nhang das, somh vnyeih lyis ngah muh dye das.

³³Nghuot laus eq khvnyhik phvnaq nyeihyo, sangphoq nyeihyo ngos suh chah shih: Khasoeh ge lyis, Yerusalem mas lai las lvpe gohyos ma gis shei.

³⁴Yerusalem eh, Yerusalem eh, lvpe jens lyis sat las, nah jyank mas nhang kat bang lyis lukzains yah doeuh sat dah wus eh, gyoqzains gas gyoqlo jens lyis nyah dungs khau mha xwih tsainh teh, nah lo jens lyis ngos khanyhoq lhain xwih tsainh toh mes laus eq, nvng ma gyo.

³⁵Yoeuh aq, nah yhenmuh gas jyamhjyuklhyuk joq goeus. Ngos namoq lyis taiq bah, Yhensain nyings mas jweh los soeu ka ngelhoq, ge namoq nyang ma taiq dvchank, nvng ngos lyis ma nyvng das, ge.