Read Achang LUKA 15 Bible Online

LUKA 15 - Achang bible

LUKA 15

¹Hauh uhlyis khoengh khywi bang yahge yaunos wons bang dvnganh gas, nyah dang gyo das ge nyah jyank mas zain los.

²Housoeh las Pharishe moq yahge maussauh lhaih bang lop zis gas, Haih soeu ka yaunos wons bang lyis lhom yoeus las, nyamoq yah dvgeh zo shuk nyeis, ge.

³Nyang nyamoq lyis haih dangtoeuq yah taiq zis gas,

⁴Namoq dvyuk yuk yvng dvxo doeu yoh; hou mhayah dvdoeu dyuk loh lyis gauci gau doeu lyis mhanhdyvp mas nyhei toh khoq las, dyuk dah vdoeu lyis nyvng shoq ma chank xo soeu hank bos lah?

⁵Nyang hauh yvlyis xo nyvng lyis, gauslaus zis yah nyah kvtoq mas kih wuq las,

⁶Nyah yhen mha jweh los lyis, nyah dyenschangh jens yahge nyah yhenkyoh bang lyis khi tsainh las taiq zis gas, Ngah yvng dyuk dah vdoeu doms nyvng goeus yvmvyah, ngos yah dvgeh tsain gausyis goh, ge.

⁷Houyah dvyhangteh ngos namoq lyis taiq bah, Dan las nhaiqlom thaiq ma chah dah dius gauci gau yuk lyis gauslaus thoq lyis, yaunos wons soeu dvyuk nhaiqlom thaiq los lyis maukhung mha zes gauslaus.

⁸Vmesbih dvyuk gas ngwis kyvp dvci yoh yvmas dvkyvp dyuk tyamp lyis, nyibung tuonh lho lha yhen shenh las nyvng shoq vlhomuh ma xo zis bos das lah?

⁹Nyang hauh zis xo nyvng lho lhyi, nyah dyenschangh jens yahge yhenkyoh bang lyis taiq zis gas, Ngah ngwis dyuk dah vkyvp xo nyvng goeus yvmvyah ngos yah dvgeh chomp gaus goh, ge.

¹⁰Houyah dvyhangteh ngos namoq lyis taiq bah, yaunos wons soeu dvyuk nhaiqlom thaiq los lyis, Mangso dah loeuswons bang xikkhonh mas gauslaus chank bos, ge.

¹¹Nyang taiq shih zis gas, Gohlhain dius dvyuk mas yukgis lo aiq yuk bos.

¹²Vnoeuh yuk gas nyah uwus lyis, Uwus eh, ngos yoh vvng dah yhenzis gvmdyei aq, ge sang lhyi, nyang nyah yhenzis nyah zomh lyis gvm dyei.

¹³Khanyhank nyeih ma nyangh lyis vnoeuh yuk gas nyah yhenzis dvnganh yoeus las we mau pheh gyung suh loh. Hauh mau mas xihphah wuhlhan lha nyah zisyos dvnganh kvlhoeu lhangzvng tyau tyamp.

¹⁴Housoeh nyang yoh ya yoh goeu dvnganh thank tyamp dah thang lhyi, hauh mau mas panghkhauq zainsmuh gyoh los las nyang gas shanghsenh los.

¹⁵Hauh uhlyis nyang gas hauh mau mas dah dius dvyuk jyank mas khau nges nyeis. Hauh soeu ka nyang lyis nyah yos mas wuq nyhoeu nhang kat.

¹⁶Nyang gas wuq zo dah nukkuk yah nyah womdau tyink mes laus eq, nyang lyis hank ma gvmtsoh.

¹⁷Housoeh nyang nghamh soh los las taiq zis gas, Ngah uwus dah uhkung jens gas jo shoq xauh zo las nyet shih das. Ngos gas heimha yuot shet shei loh nyeis.

¹⁸Ngos toq las ngah uwus jyank mas loh las nyang lyis, Uwus eh, ngos Mangso lhyi eq, nvng lyis eq cu goeus.

¹⁹Ngos nah lo oen das zis ma mon lo, nah uhkung dvyuk yhangteh jenh toh aq, oen taiq das.

²⁰Housoeh nyang toq las nyah uwus jyank mas loh. Nyang we mas dvnghuot shih lyis, nyah uwus gas nyang lyis nyvng lyis nhaiq yoeuh nyen zis yah wuih e lha, nyah lainzain mas po lha bvlot zwi tanh.

²¹Hauh lo nyang lyis taiq zis gas, Uwus eh, ngos Mangso lhyi eq, nvng lyis eq cu goeus, ngos gas nah lo oen lui das zis ma mon lo, ge.

²²Nghuot laus eq nyah uwus, jyeidwis jens lyis taiq zis gas, Gis thank dyi xing dung lvnyap yoeus gvmhuot geh, nyah loq mas loqkyop kyop dyei las, nyah khyei mha thyvkoq koq dyei geh.

²³Nyhuk toh noeulo eq she los las sat geh, yang zo las pyo goh:

²⁴Khasoeh ge lyis hai ngah lo gas shei goeus zis doms dwis los, nyang dyuk goeus zis doms nyvng, ge. Housoeh las nyamoq pwe kuot nyeis.

²⁵Gvshih nyah lomons yuk gas yos masyah los las yhen mha jweh ni los lyis zains thungh mangh bat sam yahge goh sam xauhgyo.

²⁶Nyang gas jyeidwis dvyuk lyis khi yoeus las khasoeh nghuot zis nyei yoeuh.

²⁷Hauh soeu ka nyang lyis, Nah vnoeuh doms los goeus las, nah uwus eq nyang lyis yangh yangh zan zan xauh lhom yoeus langh yvmvyah, nyhuk toh noeulo eq sat goeus, ge.

²⁸Lomons yuk nhaiqyo los las yvpkhau mha eq ma wvng loh lo. Housoeh las nyah uwus thuq loh las nyang lyis e jyoeuq yoeus.

²⁹Nyang nyah uwus lyis phuk taiq zis gas, Yoeuh aq, heinyhoq zvn ngos nvng lyis jons dvyuk teh phuqsoe los: tyingtoh dang khayhoq eq ma lai ku, nghuot laus eq ngah dyenschangh jens yah pyo das zis shvbeq lo dvdoeu yangh nvng ngos lyis ma dyei ku.

³⁰Nghuot laus eq nghe nyhiq yah zomh las nah zisyos chi yonh tyamp, hai nah lo doms los lyis gas, nyhuk toh dah noeulo nyah xiklyis sat dyei, ge.

³¹Nyah uwus nyang lyis taiq zis gas, Vlo eh, nvng gas vjangh ngos yah dvgeh nyeis: ngos yoh ya yoh zis dvnganh nah zis nghuot.

³²Hai nah vnoeuh gas shei goeus zis doms dwis los; dyuk goeus mhayah doms xo nyvng. Housoeh yvmvyah yang pyo pyo gausyis gis, ge.