Read Achang LUKA 17 Bible Online

LUKA 17 - Achang bible

LUKA 17

¹Hauh thang lhyi, nyang changlo jens lyis taiq zis gas, Lainszo gus ma bos shoq gas ma yoh bweh; nghuot laus eq lainszo gus lhoeu thuq soeu ka mvtanhzoe nghuot!

²Hai ngis bang dvyuk yuk lyis yaunos kuot nhang soeu ka, nyah lainzain mas mhoq shan tyaulhangh las thomh mas lhwih kat das zis gas nyah xiklyis zes gis.

³Namoq gas namoq nyang zaih geh: Nah vmang vnoeuh nvng lyis yobos kuot lhyi nyang lyis nyho aq. Nyang nhaiqlom thaiq lyis gas nyang lyis yobos khyuot dyei aq.

⁴Nyang nvng lyis dvnyeih lyis nyhet lhain yobos kuot las, Ngos nhaiqlom thaiq goeus, ge dvnyeih lyis nyhet lhain nah jyank mas doms lhain los las taiq lyis gas, nvng nyah yobos khyuot dyei aq.

⁵Lvgyo jens Yhensain lhyi taiq zis gas, Ngamoq dah lomsjingh ehnyet je los nhang aq, ge.

⁶Yhensain taiq zis gas, Namoq lomsjingh ehnyet anghshih chvp iq bos nghuot lyis, namoq gas nyvng zains lyis, Nvng vnyet masyah guot las thomh mas loh yuk joq aq, oen taiq lyis hauh zis gas namoq domsyos gyo das.

⁷Namoq jyank mas yos phuk soeu, nghuot ya yvng yoeuh soeu jyeidwis nyeis las, yos pheh yah jweh los yah dvyih nyang lyis, Lvnyap los tsung lha zo shuk aq, ge namoq mas hank taiq das lah?

⁸Nyang lyis, Ngah nyenhcon ba aq, nvng dyichih chih las ngos dye zo shuk shoq ngos lyis phuqsoe aq, hauh thang lhyi nvng dvyoh zo shuk das, ge taiq das ma nghuot lhyeh?

⁹Nyang lyis taiq ya taiq zis kuot dyei yvmvyah, nyang gas jyeidwis lyis, Nhaiqshoqlang, ge taiq das lah? Ma taiq mvbeh.

¹⁰Houyah dvyhangteh namoq eq taiq ya taiq zis lyis dye kuot lho lhyi, Ngamoq gas phauh ma dap dah jyeidwis dvtsain nghuot, ngamoq kuot chah goeu kyingh dvkuot oen taiq geh, ge.

¹¹Nyang Yerusalem pheh loh uhlyis Samari yahge Galile mau gungs cho lai loh.

¹²Wukhau dvkoeuq mas wvng loh lyis, mvnggvng nos dah yukgis dvci yuk we we mas yap joq las nyang yah xauhgoh.

¹³Nyamoq kaiq las taiq zis gas, Yhensain Yesu eh, ngamoq lyis nhaiqnyen aq, ge.

¹⁴Nyang nyamoq lyis nyvng las nyamoq lyis taiq zis gas, Namoq dah gungs phudyei bang lyis loh chixoeuq geh, ge. Nyamoq loh nyeis lyis tsain thyauhlhang loh goeus.

¹⁵Nyamoq mas dvyuk gas, nyang gis goeus zis lyis nyvng lho lhyi, tauh loh las Mangso lhyi yomkat kaiq chungh lho lha,

¹⁶Nyah khyeiyang mas dupaiq las nyang lyis nhaiqshoqlang sang. Nyang gas Samari dius nghuot.

¹⁷Yesu phuk taiq zis gas, Dvci yuk thyauhlhyang loh goeus ma nghuot lhyeh? Gau yuk khapheh loh goeus lah, ge.

¹⁸Haih tungbaus mas lai las gohtoeu ka Mangso phunk lyis chungh das zis doms tauh los soeu ma bos lo nyvng, ge lho lha,

¹⁹Nyang hauh soeu lhyi taiq zis gas, Toq las loh lo aq; nah lomsjingh zis gas nvng lyis gis los nhang goeus, ge.

²⁰Mangso munghdan khanhamp jweh los das cho, Pharishe moq yah nyang lyis nyei lyis nyang taiq zis gas, Mangso munghdan jweh zis gas nyoqjeih yah yoeuh nyeis las nyvng das zis ma nghuot.

²¹Yoeuh aq, heineh, yoeuh aq thyineh, ge yoh taiq das zis ma nghuot: khasoeh ge lyis Mangso dah munghdan gas namoq dah vkhau mha nghuot, ge.

²²Nyang changlo jens lyis taiq zis gas, cangsoeu Lo dah buisnyeis dvnyeih lyis namoq nyvng mes laus eq, ma xauh nyvng das shishenh jweh los das.

²³Nyamoq gas namoq lyis, Heimha yoeuh aq, thyimha yoeuh aq ge lyis eq nyamoq thang mha vchank loh goh.

²⁴Khasoeh ge lyis maukhung dvshot pheh yah maunyoq nyik kat zis gohtoeu dvshot jweh shoq bvng loh zis yah dvyhangteh, Cangsoeu Lo gas nyah buisnyeis lyis housoeh nghuot los das.

²⁵Nghuot laus eq hauh zis ma bweh shih lyis shanghsenh zis nyoshoq yahge haq caiq bang peq tyamp zis xauh shih das.

²⁶Noa zaih lyis bweh yhangteh, hauh Cangsoeu Lo dah buisnyeis lyis eq housoeh nghuot los das.

²⁷Noa gas jeis sangpho khau mha wvng lho lhyi jeis nhauq las, dvnganh yvlyis mhont tyamp dah buisnyeis jweh shoq nyamoq gas, zo, shuk, nyihwank, lonyi dyeizo tsain kuot nyeis.

²⁸Lot zaih lyis eq housoeh vgus nghuot. Hauh uhlyis eq nyamoq gas zo, shuk, wis, ungh, jyo khyoq, yhen kuot las nyeis.

²⁹Nghuot laus eq Lot gas Sodom masyah thuq loh dah buisnyeis lyis maukhung mha dah nyi yahge hwank mau wus las, dvnganh yvlyis mhont.

³⁰Cangsoeu Lo thuq xoeuq dah buisnyeis lyis eq housoeh nghuot das.

³¹Hauh buisnyeis lyis yhenkhung mha nyeis soeu ka, nyah yhen khau mha joq vyhang vlyih gyoh yoeus lo. Yos mas nyeis soeu eq vtauh los lo.

³²Lot dah yhensain nyhiq lyis tsain soh geh.

³³Vsainnyang kang lhyi khyuot yoeus das cho xo soeu hank laus eq, kang dyuk das. Kang dyuk soeu hank laus eq nyang kang xauh dwis das.

³⁴Ngos namoq lyis taiq bah, hauh nyens lyis dvjung mas aiq yuk yhet joq mhayah dvyuk lyis shwih loh las dvyuk gas nyet joq das.

³⁵Vmesbih aiq yuk dvgeh wom mhoq nyeis masyah, dvyuk lyis shwih loh las dvyuk gas nyet joq das.

³⁶Yos mas nyeis dah vbusbih aiq yuk mas, dvyuk lyis shwih yoeus loh las dvyuk gas nyet joq khoq das.[7]

³⁷Nyamoq nyang lyis taiq zis gas, Yhensain eh, khamha bweh das lah, ge. Nyang gas, Mvng joq yvmas lvngda eq houmha zain los das, ge.