Read Achang LUKA 18 Bible Online

LUKA 18 - Achang bible

LUKA 18

¹Hauh thang lhyi, dius gas yom ma gyau gyau vjangh shvmanh dung chah dah cho lhyi Yesu nyamoq lyis dangtoeuq yah taiq zis gas,

²Wusmuhpuk dvkoeuq mas Mangso lhyi ma gyuk, dius lyis eq gungsyaus ma seq yaus dah soetuon soeu dvyuk nyeis.

³Hauh wus mas chauhmuh dvyuk nyeis. Nyang gas nyah jyank mas lyih las sang zis gas, Ngah jeswus yahge ngah jo mas dan khyvlyis soetuon dyei aq, ge.

⁴Nyang gas nyangh shoq soe ma tuon dyei toh tyamp. Hauh thang lhyi nyang taiq zis gas, Ngos gas Mangso lhyi ma gyuk, dius changh lyis eq gungsyaus ma yaus nghuot laus eq,

⁵haih chauhmuh gas ngos lyis dvthauqkhyi nyeis yvmvyah, nyah shot pheh dap las lvto phuk dyei das: housoeh ma nghuot lyis gas nyang ngos lyis lhoq nyung nyeis das, ge.

⁶Housoeh las Yhensain taiq zis gas, Ma dan dah soetuon soeu taiq zis lyis gyo yoeuh geh.

⁷Mangso nyang khyen toh bang, nyang lyis nyeih nyenh dung nyeis shot pheh dap las dan khyvlyis lvnyap soetuon dyei das.

⁸Ngos namoq lyis taiq bah, nyang gas nyamoq xiklyis lvto lvnyap phuk dyei das. Nghuot laus eq cangsoeu Lo jweh lyih buisnyeis lyis haih nyeisjvng mas lomsjingh ehnyet bos bang lyis xo nyvng das lah, ge.

⁹Vsainnyang gungs lyis dan, ge nghamhzo las gohyhamh bang lyis gas cha nho ma doeus bang lyis toeuq las nyang hai dangtoeuq yah eq taiq kyoh.

¹⁰Dius aiq yuk shvmanh dung das xiklyis yhenmuh mas doq loh: dvyuk gas Pharishe, gohtoeu dvyuk gas khoengh khywi soeu nghuot.

¹¹Pharishe gas yap las, Mangso eh, ngos gas lhuot zo lhuot shuk, ma dan, nyi shuot lvng shuot bang teh ma nghuot thoq lyis magoh khoengh khywi soeu yhangteh yangh ma nghuot yvmvyah ngos nvng lyis jyehjuh chungh.

¹²Ngos gas Yuda No Buisnyeis dvdaus lyis aiq lhain womkyi lha, ngos yoh goeu dvnganh mas ciboms dvboms vlu kat, ge dung.

¹³Khoengh khywi soeu ka we mas yap las, nyah nyoq maukhung mha ma womh nghank yoeuh yoeuh nyah yvnggvng mas bat las dung zis gas, Mangso eh, ngos yaunos wons soeu lhyi nhaiqnyen aq, ge.

¹⁴Ngos namoq lyis taiq bah, haih soeu ka thyi gohtoeu dvyuk thoq lyis dan zis yah nyah yhen pheh loh. Khasoeh ge lyis vsainnyang gungs lyis chunghzo soeu hank laus eq o mha khyoq zis xauh das. Vsainnyang gungs lyis o mha gyoh soeu ka chungh zis xauh das, ge.

¹⁵Nyamoq gas lonoeuh jens lyis tanh dyei bas jungh, ge nyah jyank mas shwih lyih yvlyis changlo jens nyvng las nyamoq lyis tsain nyho.

¹⁶Nghuot laus eq Yesu nyamoq lyis khi yoeus las taiq zis gas, Loshang jens lyis ngah jyank mas los nhang geh, nyamoq lyis vtomp toh goh: khasoeh ge lyis, Mangso munghdan gas housoeh teh bang xiklyis nghuot.

¹⁷Ngos namoq lyis jyoengh taiq bah, Hank laus eq Mangso munghdan lyis loshang teh ma lhom yoeus soeu ka, houmha ma yoh wvng loh, ge.

¹⁸Guon soeu dvyuk nyang lyis nyei zis gas, Gis dah Svra eh, ngos vcaiq vto kang yoh das xiklyis cha kuot chah lah, ge.

¹⁹Yesu nyang lyis taiq zis gas, Nvng ngos lyis chamus Gis soeu, oen lui lah? Mangso mha lai las gis soeu dvyuk eq ma bos.

²⁰Lyi mas, nyi shuot lvng vshuot, dius vsat, vkhauh, ma ying kanghjyoeng vkat, nah ungwes uwus lyis phauh nyang aq, ge zis nvng seq toh goeus, ge.

²¹Nyang taiq zis gas, Haih goeu dvnganh lyis ngos loyvm yoq lyis yah chank goeus, ge.

²²Yesu haih yvlyis xauhgyo las nyang lyis taiq zis gas, nvng dvja chah shih: nvng yoh dah goeu dvnganh ungh las nyungs bang lyis gvm dyei aq, housoeh lyis nvng maukhung mha zisyos yoh das; housoeh las ngah thang mha chank los aq, ge.

²³Gvshih, nyang haih zis xauhgyo lyis, nyang svsoh nhaiqkuk: khasoeh ge lyis nyang gas svsoh dis soeu nghuot.

²⁴Nyang housoeh nhaiqkuk yvlyis Yesu nyvng lyis, nyang taiq zis gas, Yoh khuiq bang gas Mangso munghdan mas wvng das zis kha iq yau!

²⁵Khasoeh ge lyis dis soeu Mangso munghdan mas wvng lwis thoq lyis gola-u gas nghvpnho mha wvng das zis zes lwis, ge.

²⁶Hauh dang lyis xauhgyo bang taiq zis gas, Housoeh lyis gas khyuot yoeus zis hank xauh das lah, ge.

²⁷Nyang taiq zis gas, Dius ma gis bweh zis Mangso ka gis bweh, ge.

²⁸Hauh uhlyis Petru taiq zis gas, Yoeuh aq, ngamoq gas dvnganh toh khoq las nah thang mha chank los goeus, ge.

²⁹Housoeh las nyang nyamoq lyis taiq zis gas, Ngos namoq lyis jyoengh taiq bah, Mangso munghdan gvng mas vsainnyang dah yhen, ungwes, uwus, vmang vnoeuh, yhensain nyhiq, lo jens lyis toh khoq soeu hank laus eq,

³⁰gvshih dah vcaiq mas nyoshoq huon xauh yoeus das: hauh thoq lyis jweh los das vcaiq mas eq vcaiq vto kang xauh yoeus das, ge.

³¹Hauh thang lhyi nyang gas dvci aiq yuk moq lyis nyah jyank mas shwih yoeus las nyamoq lyis taiq zis gas, Yoeuh aq, yang gas Yerusalem pheh loh nyeis. Cangsoeu Lo yah sen lha lvpe jens lhaih ya lhaih toh zis dvnganh nyuk los das.

³²Khasoeh ge lyis nyang lyis gohnyau bang loq mas kyauh tyamp las, jwangh, ma phauh gis kuot zis yahge svkanh dyeh gyuon zis xauh das.

³³Nyamoq gas nyang lyis lyuk las sat das: somh vnyeih lyis nyang dwis toq das.

³⁴Nyamoq gas haih zis dvkoeuq eq ma seqgyo: khasoeh ge lyis haih dang gas nyamoq xikkhonh mas nghop shung toh las, taiq kyoh zis dvkoeuq eq ma tsain seq.

³⁵Gvshih nyang Yerikho mas jweh ni los lyis, nyoqjet soeu dvyuk choyvm mas tsung lha dung zo nyeis.

³⁶Moqjens lai sam gyo las, nyang gas hauh zis cha nghuot yvlyis nyei.

³⁷Nyamoq gas nyang lyis, Nazaret Yesu lai loh zis lyis tsain taiq kyoh dyei.

³⁸Housoeh las nyang kaiq sang zis gas, Dawi dah Lo Yesu eh, ngos lyis nhaiqnyen aq, ge.

³⁹Xik lyis loh nyeis bang gas nyang tsoeklo nyeis bas jungh ge, nyang lyis tsain nyho. Nghuot laus eq nyang gas zes kaiq las, Dawi dah Lo eh, ngos lyis nhaiqnyen aq, ge.

⁴⁰Yesu yap las, hauh soeu lhyi nyah jyank mas shwih los das xiklyis vmingh dyei. Housoeh nyah jyank mas ni los lyis nyang lyis nyei zis gas,

⁴¹Ngos nvng lyis cha kuot dyei das zis o lah, ge. Nyang gas, Yhensain eh, ngah nyoq doms nyvng nhang aq, ge.

⁴²Yesu nyang lyis taiq zis gas, Nah nyoq doms nyvng los bas jungh, nah lomsjingh zis gas nvng lyis gis los nhang goeus, ge.

⁴³Houjang yah nyah nyoq nyvng los las, Mangso dah phunk lyis chungh zis yah nyah thang mha chank loh. Dius dvnganh gas hauh zis lyis nyvng las Mangso lhyi chungh.