Read Achang LUKA 19 Bible Online

LUKA 19 - Achang bible

LUKA 19

¹Yesu gas Yerikho wus cho yah wvng las lai loh.

²Yoeuh aq, khoengh khywi bang mas uhjyung nghuot dah Zake ge soeu dvyuk nyeis. Hauh soeu ka dis soeu nghuot.

³Nyang gas Yesu hank nghuot yvlyis nyvng mes las xo laus eq dius puk thoeu lha, nyang gas nyhen yvmvyah ma yoh nyvng.

⁴Housoeh las nyang lyis nyvng shoq, xik lyis uhlhomh wuih las nyang lai loh das choyvm, lvhomp zains mas doq loh.

⁵Yesu hauh yvmas jweh las nghank yoeuh kat lyis nyang lyis nyvng las, Zake eh, lvnyap gyoh los aq, khvnyhik ngos nah yhen mha thoeng das, ge.

⁶Nyang eq lvnyap gyoh las nyang lyis gauslaus gausseq lhom yoeus langh.

⁷Nyamoq hauh zis nyvng lyis, nyamoq dvnganhmoq gas nyang lyis, yaunos wons soeu yhen mha boengh wvng doq, ge lop.

⁸Zake toq yap las Yhensain lhyi taiq zis gas, Yhensain eh, yoeuh aq ngah vyhang dvgohyih nyungs bang lyis dyei das; dvyuk yuk lyis ngos anzo lyis nyei huon doms cap das, ge.

⁹Yesu nyang lyis taiq zis gas, Khyuot yoeus cho ka khvnyhik haih yhen mha los goeus, khasoeh ge lyis nyang eq Abraham dah lo dvyuk nghuot.

¹⁰Cangsoeu Lo gas dyuk loh soeu lhyi xo lha khyuot yoeus das xiklyis los zis nghuot, ge.

¹¹Nyamoq haih zis lyis tsain xauhgyo lyis, nyang gas Yerusalem mas jweh ni los yvmvyah eq, nyamoq gas Mangso munghdan lvnyap thuq los das ge nghamh yvmvyah eq, nyang dangtoeuq dvkoeuq yah doms kyah taiq.

¹²Housoeh yvmvyah nyang taiq zis gas, Nyoqnho bos soeu dvyuk gas, nyang nyang munghdan dvkoeuq xauh yoeus thang lhyi doms los das ge we mau pheh loh.

¹³Hauh uhlyis nyah jyeidwis jens mas dvci yuk lyis khi las, yuk khanghmuh lyis ngwis kyvp dvci ci kyauh toh lho lha taiq zis gas, Ngos doms jweh los shoq haih zis yah soenghi kuot geh, ge.

¹⁴Nghuot laus eq nyah dius jens gas nyang lyis hoeng lha, Haih soeu ngamoq thoq mas guon das zis ngamoq ma o, ge nyah thang mha mang chank kat kat.

¹⁵Hauh thang lhyi nyang munghdan yoh las tauh jweh los lyis, nyang ngwis dyei toh khoq dah jyeidwis jens soenghi kuot las, vmyat khayuk khanyhoq yoh zis seq shoq nyamoq lyis khi nhang kat.

¹⁶Cangxeih vyuk lyih las taiq zis gas, Yhensain eh, nah ngwis kyvp mas dvci kyvp myat goeus, ge.

¹⁷Nyang gas, Gis dah jyeidwis eh, nvng gas vmhauhlo dah muh mas lomluk goeus, wus dvci lhyi guon aq, ge nyang lyis taiq.

¹⁸Aiq vyuk eq, Yhensain eh, nah ngwis kyvp mas oeng kyvp myat goeus, ge.

¹⁹Nyang gas hauh soeu lhyi eq, Nvng wus oeng koeuq lyis guon aq, ge taiq.

²⁰Gohtoeu dvyuk eq lyih las, Yhensain eh yoeuh aq, nah ngwis kyvp lyis ngos misseh yah khoek tsomh toh.

²¹Nvng gas ma toh masyah yoeus las, jyo ma khyoq masyah seq yhomh dah dius yau dvyuk nghuot yvmvyah ngos nvng lyis gyuk, ge taiq.

²²Nyang taiq zis gas, Ma lyungs jyeidwis eh, nvnyang dang khonh yah ngos nvng lyis soetuon das: ngos ma toh masyah yoeus las, jyo ma khyoq masyah yhomh yoeus soeu, yau dah dius nghuot yvlyis nvng seq toh goeus lyis gas,

²³ngos doms los lyis ngah ngwis bonzoe yahge ngwis lhyi yoh shoq ngwis jyi mha chamus ma kat toh, ge.

²⁴Vyvm mas yap joq bang lyis eq nyang taiq zis gas, Nyah jyank masyah hauh ngwis kyvp dvkoeuq lyis yoeus las ngwis kyvp dvci yoh soeu lhyi dyei geh, ge.

²⁵Nyamoq, nyang lyis taiq zis gas, Yhensain eh, nyang ngwis kyvp dvci yoh goeus, ge.

²⁶Ngos namoq lyis taiq bah, Yoh bang lyis lung dyei das. Ma yoh bang jyank masyah gas, nyamoq yoh joq zis yangh yoeus tyamp dyei das.

²⁷Ngos, nyamoq lyis guon das yvlyis ma o dah ngah jeswus lyis heimha shwih los las, ngah xikkhonh mas sat geh, ge.

²⁸Nyang housoeh dye taiq lho lhyi, nyang gas nyamoq xik mas Yerusalem pheh tsoq loh nyeis.

²⁹Tsanlun ge dah boms, Betphage yahge Bethani wukhau nvm mas jweh ni los lyis, nyang nyah changlo aiq yuk lyis nhang lha taiq kat zis gas,

³⁰Nah aiq yuk, xik mas dah wukhau mha loh geh; houmha wvng loh lyis hank eq ma ji ku shih dah mauhlyihzoe lo dvdoeu twih toh zis lyis nah aiq yuk wvng loh lyis nyvng das, hauh yvlyis phui she los geh.

³¹Dvyuk yuk nah aiq yuk lyis, Chamus hauh yvlyis phui goh lah, ge nyei lyis, Yhensain hauh yvlyis yhung chah ge, oen taiq geh, ge.

³²Jyeinhang zis xauh vzomh loh las nyang taiq kat vgus loh nyvng.

³³Nyah aiq yuk mauhlyihzoe lo lyis phui nyeis lyis, yhensain moq gas, Hauh mauhlyihzoe lo chamus phui goh lah, ge nyah aiq yuk lyis nyei.

³⁴Nyah aiq yuk phuk taiq zis gas, Yhensain haih yvlyis yhung chah ge, ge.

³⁵Nyah aiq yuk gas hau mauhlyihzoe lo lyis Yesu jyank mas she loh dyei. Mauhlyihzoe gungs thoq mas nyamoq dah dyimis nyhoeuh las Yesu lyis ji nhang.

³⁶Nyang housoeh ji loh nyeis lyis cho mha dius jens gas nyamoq dah dyi tsain nyhoeuh dyei.

³⁷Gvshih wugungs jweh bah ge dah Tsanlun boms nyeismhung mha jweh lyis, nyah moqjens gas nyamoq nyvng ku dah yomsoq zains muhzoh gvng mas phunk lyis gauslaus las Mangso lhyi yomkat las tsain chungh zis gas,

³⁸Yhensain nyings mas jweh los dah hwankti ka ngelhoq; Maukhung mha nyenstap zis yahge nyhang thank joqyos mas phunk bos nyeis bas jungh, ge.

³⁹Dius moqjens masyah Pharishe dvyhamh nyang lyis taiq zis gas, Svra eh, nah changlo jens lyis nyho aq, ge.

⁴⁰Nyang nyamoq lyis phuk taiq zis gas, Ngos namoq lyis taiq bah, haih bang samlo nyeis nghuot lyis gas lukgoq tsain kaiq los das, ge.

⁴¹Nyang hauh wus mas jweh ni los las, hauh wugungs lyis nyvng lyis, hauh nyhenshang nyang ngaus las taiq zis gas,

⁴²Wugungs nvng eh, nah nyenstap zis yah sen zis cha nghuot yvlyis khvnyhik nvng toq seq ya lhyeh! Nghuot laus eq gvshih gas hauh zis lyis nvng ma nyvng.

⁴³Khasoeh ge lyis, nah jeswus jens gas nah vyvm vwi mas gvduk kuot lho lha, nvng lyis tsain lhaink toh las, nvng lyis shot khanghmuh kyamp gos toh dah buisnyeis jweh los das.

⁴⁴Nvng lyis eq, nah wusciank khau mha nyeis bang lyis eq mhont tyamp das las, nvng mas lukgoq dvlom thoq mas dvlom yangh ma yoh ci toh lo das: khasoeh ge lyis Mangso nvng lyis komh das shishenh lyis nvng ma seq.

⁴⁵Nyang gas yhenmuh mas wvng loh las houmha kaih ungh kaih wis bang lyis khat thuq tyamp.

⁴⁶Nyang nyamoq lyis taiq zis gas, Maussauh mas, Ngah yhen ka shvmanh dung yhen nghuot, ge lhaih toh laus eq namoq gas hauh yvlyis khyanktau khyung tsain kuot, ge.

⁴⁷Nyang gas nyeih khanghmuh yhenmuh mas jyauh nyeis. Nghuot laus eq Phudyei uhjyung jens, maussauh lhaih bang yahge dius jens lyis uhshe bang gas, nyang lyis sat das cho tsain xo.

⁴⁸Nghuot laus eq dius jens dvnganh gas nyah dang mas nhaiq wvng nyeis yvmvyah, nyamoq khasoeh kuot das cho ma xo nyvng.